Yol gedir gecənin səssizliyinə
Əlində ağ bayraq qoca gəncliyim…
Geyinib ruhuna Qorqud öyüdün,
Yürüyür dünyanı quca gəncliyim.
Yol gedir zülmətdə sabaha qədər,
Çözür haqq-hesabı günaha qədər,
Yeddi qat torpaqdan Allaha qədər
Həqiqət arayır xoca gəncliyim.
Bitməzmi qilü-qal, bitməzmi, atam?
Qurşun laylasına verməzmi xitam?
Boğulur qapqara sobada dünyam,
Tapmazmı çıxmağa baca gəncliyim?
Ərən meydanından keçməsə yolu,
Döyər qapısını yağış, qar, dolu,
Bükülər dizləri, boşalar qolu,
Enər pərdə-pərdə uca gəncliyim.
Yol alar əzəldən Haqq dərgahına,
Çevrilər yurd – Vətən səcdəgahına,
Tapınıb bir olan Qibləgahına
Tökər dərdi-qəmi saca gəncliyim.
Müəllif: Naibə YUSİF
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru