SALAM, EY ŞƏHİDİM
(Neftçala rayonundan şəhid pilot
İbrahim Möhsüm oğlu Mənəfovun əziz xatirəsinə)
Salam, ey şəhidim! İbrahim balam,
Müqəddəs şəhidlik adın müəbarək.
Vüqarım, qürurum, iftixar qalam,
Əbədi məşəlin, odun mübarək.
Arzu toxumutək, ümid dənitək,
Anan ürəyinə əkmişdi səni.
Qürur mənbəyitək, inam kanıtək,
Atan zirvələrə çəkmişdi səni.
Ananın diləyi çin olsun deyə,
Sən neçə arzular göyərtməliydin.
Ata inamıyla ucalıb göyə,
Nə qədər zirvələr fəth etməliydin.
Fəqət, arzularla üzü inama,
Ucaldın əlçatmaz ucalara sən.
Dedin: -Əziz anam, məni qınma,
Bu gün oğul qurban istəyir Vətən.
Adın şərəf yeri, and yeri oldu,
Ucaltdın başını bir boy da xalqın.
Canınla Vətənin sipəri oldun,
Yurd saldın qəlbində bu boyda xalqın…
07.02.2018
Müəllif: Müzəffər MƏZAHİM
Oxuyun >> Gözündə tük var
Zaur Ustacın şeirləri haqqında
GÜNNUR AĞAYEVANIN DİGƏR YAZILARI