GECİKMİŞ ETİRAF Bu ömür azalmış, keçilmiş yoldu, Gəncliyə bənd oldum, aldandım əbəs. Dünyaya gəlişim xəbərsiz oldu, Qəfil gedişimi kim biləcək bəs?! * * * Gənc oldum, yüyürdüm, qanım qaynadı, İnan, qocalığı heç düşünmədim. Od oldum, gözümdə şimşək oynadı, O tərs inadımdan heç vaxt dönmədim. * * * Ağlıma gəlməzdi, sozalar ömür, Yalançı gülüşlər pərt edər məni. Hər gün işlənməsə, paslanar dəmir, Çürüyər, məhv olar, yox olar yəni. * * * Qocalmış ömür də dəmirə bənzər, Gün vurar, qaraldar, yandırar hər an. Bir yandan soldurar acı qəm, kədər, Bir yandan pozular əhvalım inan. * * * Naşükür deyiləm öz qismətimdən, Ay dostlar, bu mənim öz həyatımdır. Səhv başa düşməyin şikayətimdən, Özümün özümə hesabatımdır.
YATIR Güvənmə üzünə hər gülən kəsə, Bilməzsən, içində nə güman yatır. Uçunma duyduğun biqəfil səsə, Xain ürəklərdə ah-aman yatır. * * * İlahi rəngləri çox gözəl seçir, Ayırmır, hamıya ağ kəfən biçir. Ömrünü dağların qoynunda keçir, Dağların başında çən, duman yatır. * * * Bu yalan dünyada yeriyir insan, Döyülür, ağlayır, kiriyir insan. Torpağa qarışır, çürüyür insan, Yanaşı həm yaxşı, həm yaman yatır. * * * Hər məzar şahiddi, yatan başlara, Şəkildən boylanan lal baxışlara, Baxıram sakitcə qara daşlara, Hər daşın üstündə bir zaman yatır. * * * Muradı sən naşı bilmə, əzizim, Saxla yaddaşında, silmə, əzizim. Ağıldan kəmlərə gülmə, əzizim, Neyləsin, ağlında sar-saman yatır.
İNCƏ DƏRƏSİ. Bir ulu diyar var Azərbaycanda, Bir görən istəyər, qayıtsın bir də. Hər kəsin yeri var, ürəkdə, canda, Doğmadı, əzizdi, yad da bu yerdə. * * * Dərdlərə dərmandı quru havası, Bu sakit məkanda ağrımaz canın. Şeirdi, qoşmadı dərdə dəvası, Ürəyi doludu burda insanın. * * * Ləhcəsi doğmadı, şirindi mənə, Bu dili həmişə laylam sanmışam. Nə qədər uzaqda yaşasam yenə, Harada eşitsəm, duyğulanmışam. * * * Bu dilbər guşənin əvəzi yoxdur, İnsanı məst edər quşların səsi. Yaxından, uzaqdan mehmanı çoxdur, Hər kəsi cəlb edər görmək həvəsi. * * * Sığınıb dağların qoynuna çoxdan, Elə bil aləmdən uzaqlaşıbdı. Bu üç kənd qohumdu, qonşudu haqdan, Sanki bir-biriylə qucaqlaşıbdı. * * * Üç kəndin cəmidi, İncə dərəsi, Kəmərli, Qaymaqlı, Astanbəylidir. Adıyla öyünən eldi hərəsi, Məclisi, yığnağı səsli-küylüdür. * * * İncə dərəsidir, bu yurdun adı, Mən də doğulmuşam, burda, oxucu. Peşiman eyləməz tanışı, yadı, Oxu, ziyarət et, baxma göz ucu. * * * Söz demək istədim onun adına, Ağlımdan o qədər fikirlər keçdi. Nə bir zəhmət çəkib, yandım oduna, Nə də bir doyunca suyundan içdim. * * * Ancaq ömrü boyu borc bildim yenə, Ruhumla, canımla yurda bağlıyam. Qorxuram, yapışmaz, yaraşmaz sənə, Çünki, mən də bu torpağın oğluyam. I Tarixin qədimdi, torpağın ulu, Ruhumun canısan, İncə dərəsi. Qazağın sifəti, imzası, qolu, Adısan, sanısan, İncə dərəsi. * * * Nə qədər gözəldi, incədi adın, Cəmi üç kənd olub, qolun-qanadın. Görüşünə gələn tanışın, yadın, Dərdə dərmanısan, İncə dərəsi. * * * Zəhmətiylə təmiz, halal çalışan, Sevincindən ruha gələn, alışan, Qiyasbəylilərin ruhu dolaşan, O yurdun xanısan, İncə dərəsi. * * * Köksündə izi var, neçə illərin, Həmişə şen olsun, görüm ellərin. Biz gəldi-gedərik, sən nəsillərin, Qaynayan qanısan, İncə dərəsi. II Qismətə, taleyə çox inanmışam, Nə gəlib başıma ,qismət, demişəm. Olub ki, on mini qəpik sanmışam, Olub da, quruca çörək yemişəm. * * * Ümiddən əlimi üzmədim heç vaxt, Nə də ki, Tanrıya asi olmadım. İnandım, yazılı bu tale, bu baxt, Məni utandırmaz. Darda qalmadım. * * * Çünki inanmışam Allaha hər an, Bu inam, bəlkə də ruhumdan gəlib. Tanrı, aramızda cavabsız qalan, Nə qədər günah var ,sonlayıb, silib. * * * Bəxtim gəl-gəl deyib, önümdə durub, Gözümü mən bu torpaqda açmışam. Bu torpaq önümdə sədd, divar qurub, Yaramaz işlərdən hər an * * *qaçmışam. * * * Bu yerdə gəzmədim şenlik, abadlıq, Məni dilləndirən havadı, sudu. Quşların səsində ruhi rahatlıq, İnsanı cəlb edən gözəllik budu. III Bu eldə elmiylə dünyalar gəzən, Tanrıya tapınan bir bəndə yatır. O, elə bir övliyya, elə alimdir, Həm mənim ruhumda, həm səndə yatır. * * * Türbəsi dayaqdı bu el-obaya, Onu ziyarətə milyonlar axar. Mübarək ruhuyla yetişər hoya, Hamıya doğmadı, bir gözlə baxar. * * * Məkanı kiçikdi, söhbəti böyük, Adına sınanmış insanlar gələr. Ziyarət eyləsən, nə çaş, nə döyük, Səni qucaqlayar, doğması bilər. * * * Bu yurdda ağıllı insanlar olub, Öz sözü, səsiylə bir elə misal. O elə bir nəsil ki, yenə də qalıb, Həm özü şəxsiyyət, həm ləhcəsi bal. * * * Nə yaxşı könlünə yaxın yerdədi, İlahi, gözündən uzaq olmasın! Bu elə tay olan elin hardadı?! Saxla pənahında, darda qalmasın! * * * İnsanı bağlıdı obaya, elə, Canıyla, qanıyla yurda dayaqdı. Bu dünya durduqca, qalacaq hələ, Bu dərə, həmişə sərvaxt, oyaqdı. IV Nə gözəl mənzərədi, Ruhumu alıb gedir. Bəlkə buna görədi, Əhvalım göylərdədir. * * * Yaradandan bəndəyə, Lütf olan gözəllikdi. Ruhum dil açır deyə, Yarəb, dünya mənlikdi. * * * Ətrafımda quş səsi, Burnumda gül qoxusu. Cəzb eləyir hər kəsi, Cuşa gəlir çoxusu. * * * Bura cənnətin özü, Laylam oxunan yerdi. Azərbaycanın gözü, Mənə səcdəgah, pirdi. * * * Bütün dərdi-sərimi, Burda unutmaq olur. Könlüm məzar yerimi, Sonumda burda bulur. * * * Bura, arxam, güvənim, Mənim qibləgahımdır. Yaşadığım dünənim, Bu günüm, sabahımdır. * * * Yurdumun torpağına, Daşına qurban olum! Gələcəm ayağına, İncə dərəm, son yolum! V Vətənimin sonunda, Həmişə yaz donunda. Mənim ruhum, ürəyim, Canım, İncə dərəsi! * * * Məkkəmsən, Mədinəmsən, Döğma yurdum, binəmsən. Məzar yerim, son qibləm, Yönüm, İncə dərəsi! * * * Çox gəzmişəm, hər yeri, Səndən ayrı sərsəri. Başqa yerə qaynamır, Qanım, İncə dərəsi! * * * Cənnət olsa yan-yörəm, İstəmərəm, mən görəm. Ancaq səndə xoş keçər, Anım, İncə dərəsi! * * * Bezdim insan köçündən, Milyonların içindən, Seçilməz mənim adım- Sanım, İncə dərəsi! * * * Dan yeri söküləndə, Yollarım büküləndə, Çatacaqmı axırım, Sonum, İncə dərəsi?!
ARŞIN (Mənim öz arşınım var.) Quyu qazma başqasına, Yıxılarsan, qəbrin olar! Tələs, qonşunun yasına, Həmin gündən sənin də var! * * * Qorxaq olma, ürəkli ol! Cəsarətdir işin canı. El-obaya gərəkli ol, Keçmişini yaxşı tanı! * * * Böyüyünə hörmət eylə, Üzmə onu, qoy sevinsin! Gördüyünü doğru söylə, Qoy həqiqət səni yensin! * * * Yaddan çıxart, yaxın getmə, Şükür söylə, hər olana. Uzaq dolan, hörmət etmə, Səni hörmətdən salana. * * * Yanma hörmət qoyduğuna, Səndən gələn səxavətdi. İnan, Fələk saydığına, Sən saydığın boş söhbətdi. * * * Üz-göz olma ağılsızla, El içində xar olarsan. Nə ahmır tök, nə də sızla, Öz ağlınla yar olarsan. * * * Anlamaza qəti dinmə, Tərs anlayar, qanar səni. Səviyyəndən heç vaxt enmə, Rəqib zəif sanar səni. * * * Yazdıqlarım ağlımdakı, Beynimdəki fikirlərdi. Bölüşürəm oxuyanla, Qəbul etsən, bu qədərdi. * * * Öz arşınım var həmişə, Bazarda qiymət endirər. Sən can yandır hər an işə, Uca Tanrı sevindirər.
UYMA XƏYALLARA! Xəyallarım yenə pərvaz eylədi, Dolandı göyləri, söndü, qayıtdı. Qovdu gümanları geri teylədi, Peşiman, pəjmürdə, döndü, qayıtdı. * * * Sönən arzularım daha alışmaz, Yüz dəfə qızışdır, yüz ocaq yandır. Köhnə gümanlarım daha çalışmaz, Nə özünü aldat, nə məni qandır. * * * Dolaşır beynimdə bomboş xəyallar, İnanın, bu günlük, dünənlik deyil. Məni yaman yorur bağlı suallar, Cavabı indi də, heç mənlik deyil. * * * Hər kəsi incidər, ağrıdar hər an, Vaxtında, ağılla görmədiklərin. Sənə qismət olmaz bostanda qalan, İş görüb, tər töküb dərmədiklərin. * * * Heç vaxt aldatmadım, özüm özümü, Boyumdan yuxarı addım atmadım. Mənə Tanrı verən səbri, dözümü, Özümə xərclədim, heç vaxt satmadım. * * * Xəyalla yaşamaq vərdişim yoxdu, Reallıq nədisə, ona gəlirəm. Yanan arzularım beynimdə çoxdu, Hamısı qismətdi, bunu bilirəm. * * * Nə xəyal dolandır, nə fikir eylə, Yüz fikir bir borcu ödəmir, vallah! Dərdini dərd bilən bir kəsə söylə, Çarəsi tapılar, böyükdür Allah!
QƏZƏL Nələr çəkdik, nələr gördük, biz, bu yaşa gəlincə, Gözümüzlə od götürdük, ömür başa gəlincə. * * * İnsanlardan kənarlaşdıq, dərdimizlə cüt olduq, Gizlənməyə yer gəzərsən, dərdin qoşa gəlincə. * * * Gözəlliklər bir bəladır, canın alar, öldürməz, Gözəl olan ruh oxşayar, hilal qaşa gəlincə. * * * Ruhum tamam sakit olar, bil, şeytana uymaram, Məni məndən alan olmaz, ürək cuşa gəlincə. * * * Əriyərəm, tər tökərəm, ruhum məni boğanda, Necə darda qan ağlayar, düyü aşa gəlincə. * * * Sən yazmağa gec başladın, səhv elədin, ay Murad, Canın çıxar yox olarsan, sözün xoşa gəlincə.
ÖZƏL DUYĞULARIM Şeir yazmaq vərdişdimi? Bilmirəm, Ya da ruha qidadımı, sudumu? Düşünürəm, bir qərara gəlmirəm, Görən, ruhun oyanışı budumu?! * * * Necə olur o təb, o ruh- möcüzə, Dilləndirir, dilə gəlir misralar. İçdən gələn duyğulardır, tər, təzə, Bir ürəkdən, o birinə yol salar. * * * Mən o ruhda, biləmmirəm sirdimi, Ürəyimdən tikan çıxar bir anlıq. Unudaram həmin zaman dərdimi, Yada düşməz nə bir pislik, yamanlıq. * * * Şeir yazmaq yatan ruhu oyadar, Ürəyinə təpər verər, güc verər. Şair olan eşq şərbətin tez dadar, Tez yetişər, eşq gülünü tez dərər. * * * Azad ruhum cilalanar, parlayar, Saf düşünər, qorxmaz heç vaxt qınaqdan. Yazan ürək nə usanar, nə doyar, Ləzzət alar bu qələmdən, varaqdan.
A DÜNYA Hərif oldum başımı, Yaman qatdın, a dünya! Topa qoydun daşımı, Çox aldatdın, a dünya! * * * Məndən olsa gəlməzdim, Burda qalıb ölməzdim, Dar ayaqda, bilməzdim, Məni satdın, a dünya! * * * Nə qeydimə qalmadın, Nə bir kömək olmadın. Niyə başa salmadın?! Gec oyatdın, a dünya! * * * Gah soyuqda dondurdun, Gah istidə yandırdın. Məni yaman qandırdın, Oda atdın, a dünya! * * * Allah aldı çaramı, Göynətmədi haramı?! Qaysaqlanan yaramı, Off, qanatdın, a dünya! * * * Korun bəxti yatanda, Dayaq oldun batanda. Sıra mənə çatanda, Niyə yatdın, a dünya! * * * Oda düşdün, qaynadın, Başlar yedin, doymadın. Çirkin oyun oynadın, Çirkə batdın, a dünya! * * * İşi saldın düyünə, Murad getdi küyünə. Arzuna, istəyinə, Deyən çatdın, a dünya!
VARMI?! Məni məndən alan gözəl, De, dərdindən ölən varmı?! Cavan ömrü talan gözəl, Dərdlərini bölən varmı?! * * * Artıq ömür oldu yarı, Dərd sağalmır, ha da sarı, Bir yada sal, indi barı Göz yaşını silən varmı?! * * * Bir baxışla oda yaxan, Şimşək kimi alov çaxan, Ey üzümə tərs-tərs baxan, Bir üzünə gülən varmı?! * * * Murad səni çox özləyib, Yaddaşında əzizləyib, Hər gün səhər yol gözləyib, Sənə qarşı gələn varmı?!
MƏNİM BİLDİKLƏRİM. Dünyanı yaxşılıq xilas edəcək, Pislikdən uzaq dur, şeytana uyma! Yaranan bilir ki, bir gün gedəcək, Yaxşılıq etməkdən usanma, doyma! * * * Yaxşılıq ağılda, yaddaşda qalmaz, Təkcə Allah görər, amma ki, itməz. Yamanlıq öldürməz, canını almaz, Ancaq can ağrıdar, ağlından getməz. * * * Gündəlik incitsən, ağrıyar hər can, Bezikər, tablamaz, yanından qaçar. Yamanlıq etməkdən yorulsa insan, Yaramaz əməllər gül-çiçək açar. * * * Dünən gördüyündən dərs götür, anla, Ağılsız insanı yellər oynadır. Nə qədər səhv etsən, özünü danla, Bu dünya naşıya gülən dünyadır. * * * İlahi görk edər, qəti ötürməz, Etdiyin pisliyin bədəli səndə. Əzizim, pisliyi Tanrı götürməz, Ölməmiş, sağıykən ödəyər bəndə. * * * Yaxşılıq gəlmirsə əlindən, dayan, Çəkil, dur qıraqda, yamanlıq etmə! Ayıl röyalardan, yuxudan oyan, Doğru ol, dürüst ol, sən küyə getmə!
YALAN DÜNYA. Dönüb boylanıram geriyə hərdən, Doğru nəyim varsa, aşikardadır. Heç nə anlamıram bu bağlı sirdən, Dünən gördüklərim bu gün hardadır?! * * * Xəyallar geriyə boylanar hər an, Dünənin ləzzəti yadından çıxmaz. Nədənsə, dilbilməz, ağılsız insan, Xəyalla yaşayar, irəli baxmaz. * * * Günlər tez dəyişir, ötür fəsillər, Dəyişən tablodan gözün yorulmur. Yalan danışmaqdan bezikmir dillər, Yalan nəfəs alır, ağlı durulmur. * * * Beləcə doğruya addım atılmır, Nədəndir? Nə üçün? Səbəbi çoxdur. Bu yalan dünyada doğru satılmır, Nə də ki, doğrunun bazarı yoxdur. * * * Həyatdı, dünyadı, yola veririk, Hər gün aldanırıq, ömrümüz gedir. Doymuruq, nə qədər yalan dəririk, Yalan, canımızda doğrunu didir. * * * Dünyanın mayası yalanla olub, Bax buna görədir, aldadır bizi. Baxıram işimiz Allaha qalıb, Doğru da sağaltmır heç dərdimizi.
HAQQ YOLU Tükdən asılıyıq ,sən demə hər an, Ruhumuz göylərdə, cismimiz yerdə. Ay pulla özünü bəxtəvər sanan, O tük üzüldüsə, qapanar pərdə. * * * Bax onda kiməsə nə əlin çatar, Nə də ki, səsinə səs verən olar. Gözlərin yumular, qulağın batar, Dildə, ağızlarda adın hallanar. * * * Bu köhnə mərəkə, köhnə mənzərə, Nə doğma inciyər, nə yad inciyər. Burda növbə yoxdu, sərbəstdi hərə, Gələr köynəyini əyninə geyər. * * * Heç kəs son mənzili seçmir, bəyənmir, Döşənmir, bəzənmir gəbə, xalıyla. Etiraz eyləyib bir söz deyənmir, Çünki yol üstədi cansız halıyla. * * * Bu bir haqq yoludu, gedirik biz də, Dədəmiz, babamız gedib bu yolu. Bir azca təlaş var ürəyimizdə, Baxma, tanış deyil nə sağı, solu. * * * Dünyanın sonu var, sən də bir düşün, Ağlınla çək- çevir, haqq-hesab eylə. Boyundan yuxarı tullanma, kişi, Canın yerdədisə, əlləşmə göylə.
ALDANDIN. Bu daşlı, kəsəkli ömür yolunda, Özünü çox bilmiş sandın, aldandın. Nə olsun qüvvət var, biləyində, qolunda, Çox eşitdin ki, az qandın, aldandın. * * * Başından yel əsdi, oyananmadın, On arif dərs keçdi, susdun, qanmadın. Tamahın güc gəldi, dayananmadın, Sən ki, qul haqqını dandın, aldandın. * * * Ay Murad, göz yetir, bir diqqət ayır, Hörmət et, üz göstər, kim səni sayır, Nanəcib insanla nə çöl, nə bayır, Qapıdan çıxdınsa, yandın, aldandın.
QƏZƏL Bu dünyada minnətini götürmərəm heç kəsin, Düşməniyəm öz nəfsimin,bir duz-çörəkdir bəsim. * * * Allah verən bir ömürdür, saylı ayı, günü var, Boy-buxuna aldanmayın, nə üstündə çox əsin. * * * Nanəcibin üz-gözündən şər süzülər, şər damar, Nə onunla söhbət edin, nə onunla şərt kəsin. * * * Qədərində pulun olsun, möhtac olma kimsəyə, Sonu heç vaxt yaxşı olmur, çox istəyin, həvəsin. * * * Sakit yerdə baş aparar, baş ağrıdar, incidər, Yiyəsinə nə xeyri var, xırıldayan gur səsin?! * * * Ey cavanlar, qulaq asın , siz, Muradın sozünə, Çarəsizə yardım edin, əl tutmağa tələsin!
ACI REALLIQ Ömrü yaşamağın yüz cür yolu var, O qədər seçimi olur bizlərin. Ömür bitər, bir quruca ad qalar, Bir də ki, arxanda ayaq izlərin. * * * Yaşarıq günbəgün arzular üçün, Yaşamaq həvəsi artar ki, ölməz. Sonu görünməyən bu sonsuz köçün, Sirrini bir kimsə anlaya bilməz. * * * Ömür əmanətdi, bizlərə, baxın, Qədrini bilmərik müftə mal kimi. Hər bir yaranışın sonu var axı, Fərqinə varmarıq boş xəyal kimi. * * * Yüz dərdə dözərik, bir an bezmərik, Nə əzab bilərik, nə də ki, ağrı. Heç zaman rahatlıq, dinclik gəzmərik, Qaçarıq sabahkı ümidə doğru. * * * Yelə verib bu ömürü qaçarıq, Neçə təpə, neçə bələn aşarıq. Dönüb ağ buluda göyə uçarıq, Tarix olub yaddaşlarda yaşarıq. * * * Bir də ayılarıq tükəndi ömür, Geriyə dönməyə gücümüz çatmaz. Əksin daş üstündə, nə səs, nə səmir, Qurtardı!!! Bir kimsə başını qatmaz!
YIXILANA GÜLMƏ, QARDAŞ! Zaman ömrə bir qənimdi, Sızıldayan öz tənimdi, Kəsmə, zalım, bədənimdi. Can ağrıdar gözdəki yaş, Yıxılana gülmə, qardaş! * * * Dərd mənimdi, dərman səndə, Bir yaxın gəl, durma gendə. Dar ayaqda neylər bəndə?! Ya kömək ol, ya uzaqlaş, Yıxılana gülmə, qardaş! * * * Sarsılana tez həyan ol, Dərdi anla, bir duyan ol, Ya insan ol, ya o yan ol. Salma məni belə çaş-baş, Yıxılana gülmə, qardaş! * * * Heç vaxt uyma yalan sözə, Çox şey gördüm gəzə-gəzə. Kasıblığı vurma üzə, Nə səhv elə, nə də ki, çaş, Yıxılana gülmə, qardaş! * * * Tərs yozular sözün deyə Cavab vermə hər kəlməyə. Xeyli vaxtdı bilməm niyə Harda aş var, sən orda baş?! Yıxılana gülmə, qardaş! * * * Bir nəzər sal dörd yanına, Ziyan gələr ad-sanına. Yazığın gəlmir canına?! Özünə gəl yavaş-yavaş, Yıxılana gülmə, qardaş! * * * Mənim sözüm hamıyadı, Sağaldandı, mumiyadı. Nə İvana, Tomayadı, Türkdü türkə dayaq, sirdaş, Yıxılana gülmə, qardaş!
ÜRƏYİMİ. Gah istidən, gah soyuqdan Gözləyirəm ürəyimi. Söz anlamır,bax, bayaqdan Bizləyirəm ürəyimi. * * * Çox istəyir məni sıxsın, Məhvərindən qopsun, çıxsın, Ha çalışır tamam yıxsın, İzləyirəm ürəyimi. * * * Olur ki, cana doyuram, Əllərimlə hey oyuram, Sözə baxmır, şumlayıram, Düzləyirəm ürəyimi. * * * Başa salıb qandırıram, Soyuqladıb dondururam, Oda salıb yandırıram, Közləyirəm ürəyimi. * * * Dərdə düşür, karıxıram, Ağrıyıram, qarıxıram, Dalaşanda darıxıram, Özləyirəm ürəyimi. * * * Bax, dilimə o, tam verir, Bədənimə o, qan verir, Söz ruhuma o, can verir, Gizləyirəm ürəyimi.
KİMİ Bu dünyada şah olasan, bəxtin gülə ,sevinəsən, Naümid olmayasan, əlacsız avarə kimi. * * * Qoyalar hökm edəsən,o sağlıq ola canında, Ğözəl imkanın ola, küllü- ixtiyarə kimi. * * * Acı nədi unudasan, yaxınına qoymayasan, Sirin söz eşidəsən, dərdlərinə çarə kimi. * * * Dərd gələndə yar olasan, inciməyə qoymayasan, Aşıb-daşa qövr eləyə, ürəyində yarə kimi. * * * Dörd tərəfin qohum ola, kənar nədi bilməyəsən, Sevəsən, seviləsən yaxın ciyərparə kimi. * * * Murad, sən də sadə dolan,qəti qoyma adına, Ləkə düşə kirlənəsən, ağ üstündə qarə kimi.
YAZDIQLARIM Baxıb od tuturam yazdıqlarıma, Yadda qalacammı, anlayammıram? Bəzən qaralayıb pozduqlarıma, Gülürəm, özümü danlayammıram. * * * Kimdisə, məni də çıxartdı yoldan, Bu sakit ömrümə vəlvələ düşdü. Bəzən bezikirəm bu qeylü-qaldan, İlahi, arxa dur, gör bu nə işdi. * * * Bacara bilmirəm özüm-özümlə, Nə dala çəkilib boş duranmıram. Tək-tənha qalanda gecə sözümlə, Qalıram ortada çaş, duranmıram. * * * Bəzən qar-sazaqlı, soyuq bir qışam, Sanki kimsə mənim qanımı içir. Elə bil gecələr daş daşımışam, Hər sözün ağrısı canımdan keçir. * * * Nə mala hərisəm, nə vara acam, Söz yükü çəkirəm, sözdən halıyam. Bilmirəm yazdığım nəylə qalacam, Bir onu bilirəm sözün quluyam.
YAZ Ay mənim ruhuma sığal çəkən yaz, Niyə gecikmisən, bilmirəm niyə? Tərslikdən canım da üşüyür bir az, Ruhum ki, isinmir, qızışmır deyə. * * * Mən sənə vurğunam, sənə deyəsən, Nəfəsini duysam, ruhum oynayır. İlahi, elə bil dirilirəm mən, Hər bahar gələndə qanım qaynayır. * * * Elə bil yox olur ağrı-acım da, Gül açır könlümdə bənövşə, nərgiz. Nə pislik, yamanlıq qalmaz yadımda, Nə də üzülmərəm bunlardan hərgiz. * * * Bir qarlı, şaxtalı gündə doğuldum, Mən qışı sevmədim, yaza vuruldum. Günəşdən güc aldım, odla yoğruldum, Mayam işıq oldu, axdım duruldum. * * * Nə yaman gecikdin, bu il nə yaman, Gəl gözlər danışsın, dillər dayansın. Tamam yoxa çıxsın çiskin, çən, duman, Gül gülü çağırsın, ruhum oyansın.
QARDAŞ (Avdı Qoşqara) Deyirəm, dünyanın halal insanı, Tək təmiz adamı sənsən, a qardaş. Anlayıb bilənə əzizi, canı, Qanmaza dumansan, çənsən, a qardaş. * * * Dumduru su kimi təmizdir adın, Ağrımaz başını dərdə salmadın. Halaldan doğuldun, halal yaşadın, Haramdan uzaqsan, gensən, a qardaş. * * * Görəndə bar verir arzun, muradın, Sevincdən uçmağa olmaz qanadın. Böyründə, başında qohumun, yadın, Sevincinə yarı, tənsən, a qardaş. * * * Üzündən bəllidir səmimiyyətin, Baxıram hər kəsə xoşdur niyyətin. Nə özün dəyişdin, nə xasiyyətin, Bir azca dəyişsən, dönsən, a qardaş. * * * Səni mən hər yerdə misal gətirdim, İzlədim, çox şeyi səndən götürdüm. Yaxşı nə bildimsə ruha ötürdüm, Ruhumda bar verən dənsən, a qardaş.
YAXINSAN (Həzi Həsənliyə) Ruhuma yaxınsan doğmalar qədər, Bilmirəm bu yanğı haradan keçib? Nə sənin Kəmərli ağlından gedər, Nə Murad Faxralı suyundan içib. * * * Allahın işindən baş açanmarıq, Biz adi bəndəyik, əmrə müntəzir. Ay Həzi, qismətdən heç qaçanmarıq, O, bizi axtarır, soruşur, gəzir. * * * Bir 9 may günü biz tanış olduq, Sevindik pul tapan uşaqlar kimi. Yüz dərdi adladıq, bax, yaşa dolduq, Ağardı saçımız dümağ qar kimi. * * * Bəlkə də o fikrə, ağla düşməzdik, Ümid də, Qorxmaz da bilir ən azı. Onlar olmasaydı, biz görüşməzdik, Bu da bir qismətdi, bu da bir yazı. * * * Həyatın pozulmaz qanunları var, Ondan asılıyıq, tabeyik biz də. Sən, mən icraçıyıq, ağadı onlar, Onlara bağlıdı taleyimiz də. * * * Ay Həzi, darıxma, üzülmə bir də, İncə dərəsinə səfər edərik. Yaxşıca dincəlib o gözəl yerdə, Doğma Faxralıya birgə gedərik.
NƏFS İnsanı pis tamah, pis nəfs öldürər, Bu yola düşdünsə, axırın yoxdur. Bəzən sevindirər, bəzən güldürər, Bəzən də bağrına sancılan oxdur. * * * Yağlı bir kəndirdir boynunda sənin, Gah səni incidər, gah darıxdırar. Nə qədər yığsan da doymaz gödənin, Qoymaz dincəlməyə, hey qarıxdırar. * * * Kənardan eybəcər görünə bilər, Amma ki, bu sənin ağlına gəlməz. Baxarsan, başına min bəla gələr, Nə olsun, ətrafda bir kimsə bilməz. * * * O, elə bir duyğudur, elə bir hissdir, Uydunsa qaynayır, azalmır, itmir. O, səni harama səsləyən səsdir, Şeytana bağlıdır, başından getmir. * * * Nəfsinə hakim ol, ey bəni-insan, Onun girdabında boğulma, ölmə! Bax, nəfsin önündə əyilsən, sınsan, Zəifsən, heç kimi günahkar bilmə!
KİMƏ NƏ?! Arzu bitməz, ömür az, Ölən ruhlar durulmaz. Mənim kefim sazdan saz, Ya da pisəm, kimə nə?! * * * Dünya böyük, naşı çox, Ağlı kəmi, çaşı çox. Dərdim köhnə, yaşı çox, Ona bəsəm, kimə nə?! * * * Ruhum, ənbər qoxuyar, Sözdən çiçək toxuyar, Könlüm, sənsiz oxuyar, Zil, ya pəsəm, kimə nə?! * * * Kasıb evdə doğulan, Bulaq kimi soğulan, Öz içində boğulan Sakit kəsəm, kimə nə?! * * * Utanıb, sonda gələn, Hər an yerini bilən, Tutaq ki, çoxdan ölən, Batan səsəm, kimə nə?! * * * Günah işə mən yadam, Cəhd eyləmə, ay adam! Öcəm, tərsəm, inadam, Ya da nəhsəm, kimə nə?! * * * Öz içimdə azıram, Hər gün nəsə yazıram. Canım, qəbir qazıram, Son nəfəsəm, kimə nə?!
YAĞIŞ Yağışı sevirəm, islanmağı yox, Sanki göz yaşıdı səbri daşanın. Gurultudan, tappıltıdan daha çox, Səsinə heyranam, bu tamaşanın. * * * Durub pəncərənin önündə bir an, Baxıb seyr edərəm bu mənzərəni. Yerin göylə bu təması hər zaman, Xeyli düşündürər, cəlb edər məni. * * * Damlalar yagışın daş-qaşlarıdır, İlahi, çox şükür cah- cəlalına. Yağış da Tanrının göz yaşlarıdır, Ağlayar həmişə yerin halına. * * * Bu yağış Allahın bir möcüzəsi, Yağmasa, bu dünya saralar, solar. Bəzən bezikdirər, yorar hər kəsi, Ancaq suya həsrət canlar həzz alar. * * * Nə qədər yağsa da, görünməz gözə, Dünyanı su basmaz, dünya sağ qalar. Yağış da, dolu da, qar da möcüzə, Vaxtında yağmasa dünya məhv olar.
ADAMLAR Ey Allaha yaxın olan, əqli kamil sağ adamlar, Qoymayın insanlıq ölə, qəlbi böyük, dağ adamlar. * * * Kömək olun, dayaq olun, sipər olun xurafata, Bu torpağa yiyə duran, arxa, sütun, tağ adamlar. * * * Bir görmədim bəhsə girə, kömək ola kasıblara, Ömrü boyu dalda qaldı, girəvədə ağ adamlar. * * * Baxıram ki, milçək kimi yaman artıb, lap çoxalıb, Xeyrə, şərə yaramazlar, el içində lağ adamlar. * * * Bu Vətəni qoruyun siz, üzü gülsün Muradın da, Ey yurduna bağlı olan, bir-birinə bağ adamlar.
AY ÜRƏYİM Bənzəməzsən, heç kimə sən, Yer üzündə, ay ürəyim. Can evimdə bir dənəsən, Əvəzin yox, mən nə deyim? * * * Sənlə nəfəs alıram mən, Sənə baglı bir ürəyəm. Sən olmasan, həmin gündən, De görüm, nəyə gərəyəm. * * * Sən ruhumun işığısan, Sönsən əgər, ruhum sönər. Ömrümün yaraşığısan, Solsan, canım buza dönər. * * * Tanrı sevən cüt bəndəyik, Qovuşmuşuq yaşamağa. Axır ki, bir bədəndəyik, Daha nə qoruq, nə qadağa. * * * Tanrı bizə bir can verdi, Dərdimizi bilə-bilə. Salamladıq neçə dərdi, Yola saldıq gülə-gülə. * * * Sanma, ömür əbədidir, Daimidir bizdən ötrü. Nə gedirsə, bizdən gedir, İncimə hər sözdən ötrü. * * * Dünya, sirli bir müəmma, Gözünü yum, bircə andır. Yaşa, dolan, çalış, amma, Sevmə onu, bir yalandır. * * * Nə yaşasaq, mükafatdır, Üç il, beş il, ona kimi. Bizə qalan təmiz addır, Qorumuşuq sona kimi. * * * Məyus olma, heç vaxt, gülüm, Nəvələrdir qalan sənə. Nə ayrılıq, nə də ölüm, Qaçılmazdır, inan mənə.
ÇƏKİR İnsanı dərd boğur, qarışır başı, Darda gah sıxıntı, gah ölüm çəkir. Üzümü yandırır gözümün yaşı, Gör, yazıq gözlərim nə zülüm çəkir. * * * Əlimi uzatsam, göylərə çatan, Elə bir yerdəyəm, işvə, naz satan, Gözəllər önümdə, əlimdə kətan, Nə ruhum oynayır, nə əlim çəkir. * * * Allah pis tamahı nəfsindən asıb, Ömrə qul olmuşam, özümü qısıb. Duyuram, içimi tor, qurum basıb, Nə içim isinir, nə çölüm çəkir. * * * Ay Murad, karvanın, köçün yoldadı, Görəcək günlərin hələ daldadı, Dilimin ucundan başım qaldadı, Bu dərdi nə ağlım, nə dilim çəkir.
DEYƏN Deyən soyuqlamışam, Üşüdürəm səhərdən. Sanki dinməz, sal daşam, Düşdüm deyən təhərdən. * * * Ağrılarım başqadı, Hamı bilir nədi bu. Qara günlər başladı, Limon, şirə, bir də su. * * * İştahım yoxa çıxıb, Hamı bürünüb yasa. Allah üzümə baxıb, Şirə var heç olmasa. * * * Gur yağışın bazıyam, Sel, su axır canımdan. O qədər çox razıyam, Hoya yetən xanımdan. * * * Neçə ildir dərdimi, Çəkir ömür yoldaşım. Mən bilmirəm sirdimi?! Şükür, ağrımır başım. * * * Həkim deyil, ay canım, Bir sadə müəllimdi. Vallah, billah, nə danım, Mənim vuran əlimdi. * * * Sizcə kimə borcluyam, Tanrıya, ya xanıma?! Bəlkə Tanrı qoruyub Calayıb can canıma.
MƏHƏBBƏT Kim deyir, ağlamaq, göz yaşı tökməkdir, məhəbbət. Əzizim, can evində sevda əkməkdir, məhəbbət. * * * Sevda ki var, ağılla, ruhla idarə olunur, Demirəm, ağlın alıb, sağ ruhu sökməkdir,məhəbbət. * * * Tələsməyib, min sehr ilə, ovsunla qəlb ovlayıb, Bənna kimi kərpic-kərpic can tikməkdir, məhəbbət. * * * Həya, abır olmasa, qiyməti olmaz sevdanın, Nə bilim, bəlkə də, abırı bükməkdir, məhəbbət. * * * Ay Murad, can verib, can aldığın şux baxışlının, Tək nazını yox, həm qəhrini çəkməkdir, məhəbbət.
İNCİMƏRƏM Səhvlərimi deyən olsa, Tez silərəm, incimərəm. Lap malımı yeyən olsa, Tən bölərəm, incimərəm. * * * Söz verdimsə, mən sözümə, Qul olaram, de üzümə. Yalan çıxsam, mən özümə, Ar bilərəm, incimərəm. * * * Düz işimi hey əyənə, Arxamca nələr deyənə, Mənə ölüm diləyənə, Can dilərəm, incimərəm. * * * Üzünə maska geyənə, Tam qaraya ağ deyənə, Məni başa düşməyənə, Off!!! Gülərəm, incimərəm. * * * Heç ərinmə, son halında, Cəfa çəksən, yar yolunda. Rahatca sənin qolunda, Bax, ölərəm, incimərəm. * * * Murada can vermisən,can, Sənlə nəfəs alır hər an. Əzizim, dərdinə dərman San, gələrəm, incimərəm.
DÜŞÜNCƏLƏR Yuz fikir dolaşır beynimdə indi, Azıram, yol tapıb çıxa bilmirəm. Elə bir zamandı, elə bir gündü, Dönüb dünənimə baxa bilmirəm. * * * O qədər qarışıq vaxta çatmışıq, Dərd-azar içində çabalayırıq. Ömür quş tək uçdu, sanki yatmışıq, İndi ayılmışıq, ay, gün sayırıq. * * * Nə vaxta acıdıq, nə də ömürə, Bir giley-güzara varmı vəsilə? Düşünə bilməzdik, qurd tək gəmirə, Zaman ömrümüzə qənim kəsilə. * * * Nə qədər səhvlərin günahı bizdə, Niyəsə, tənbəllik canımızdadır. Çox şey arzularıq fikirdə, sözdə, Əməldən yayınmaq qanımızdadır. * * * Bu da bir həyatdır, səhvi, düzüylə, Öyündük hər zaman öz pulumuzla. O qədər səhv etdik yadın sözüylə, Ərindik getməyə öz yolumuzla. * * * Bir dəfə gəlirik həyata yalnız, Səhvləri düzəltmək imkanımız yox. Tanrı qarşısında qalanda yalqız, Bax, aciz oluruq onda daha çox.
RUHLARLA SÖHBƏT İlk dəfə deyil ki, ayaq basıram, Yenə üz tuturam məzarıstana. İlk dəfə deyil ki, qulaq asıram, Ruhlarla aramda olan dastana. * * * Yuxuda görərəm, uzaqdan baxar, Mənə yaxın olan, simsar olanlar. Ayılsam, elə bil yadımdan çıxar, Gecə əhvalımı xəbər alanlar. * * * Deyirlər, ruhlar da izləyər səni, Bəzən çevrilərlər dayaqlarına. Elə hey qoruyar, gözləyər səni, İstəməz daş dəysin ayaqlarına. * * * Ruhlar yol ölçərlər, gedib, gələrlər, Göylərdən asılmış körpü salarlar. Burda nə baş versə, orda bilərlər, Çünki mələklərdən xəbər alarlar. * * * Bu fani dünyada ömrümüz qısa, Bizim ruhlara da yer verər göylər. Oğlumuz, qızımız gəlib nə vaxtsa, Yəqin bizləri də anar, yad eylər. * * * Ruhum sakitdirmi, bilmirəm vallah, Niyəsə rahatdır, məni incitmir. Ruhumla yaxınam, dostam, ay Allah, Hələ ki, yaşamaq həvəsim bitmir.
ÖLÜM YOLU Ayılırıq hər səhər, Yol tutub yeriyirik. Dərdimizi bir təhər, Unudub, kiriyirik. * * * Səhv eləsək ,bu yolda, Bu yolu qısaldarıq. Başımız qeylü-qalda, Səhvlə həmişə varıq. * * * Baş qarışır gülməyə, Həyasız bir bəndəyik. Göz yaşını silməyə, Əl yetmir, nə gündəyik?! * * * Hamı gedir bu yolu, Sərt yoxuşu, enişi. Nə sağı var, nə solu, Nə də geri dönüşü. * * * Gedirik, gülə-gülə, Arzu bitməz, kam çoxdur. Nə arzula, nə dilə, Bu yolun sonu yoxdur. * * * Ölüm yoludur, bu yol Otunu biçəcəksən!!! Şah ol, kim olursan ol! Bu yoldan keçəcəksən!!!
DEMƏYİN Heç kimə, ay yetim, deməyin dostlar, Hamımız insanıq, kimsə baş deyil. Bu sözdə təənə var, daha nələr var, Açıb ağartmaq da mənə xoş deyil. * * * Qismətdən, yazıdan qaçan olmayıb, Bu dünya yazılı kitaba bənzər. Bağlanmış bir bəxti açan olmayıb, Hər kəs öz bəxtini soraqlar, gəzər. * * * Kimsəyə yetimdir, söyləyib durma, Onun da hifz edən Allahı vardır. Gəl ürək sındırma, gəl könül qırma, Düşünmə ki, ona bu dünya dardır. * * * Heç kəsin taleyi əlində deyil, Kimsəyə lağ edib, sındırma onu. Çalış bu kəlməni yaddaşından sil, Çünki könül qırmaq dünyanın sonu. * * * Bu söz yoxa çıxsa dildən, ağızdan, Hər kəs öz adıyla öyünər məncə. Bu adın əsiri oğuldan, qızdan, Dünya xeyir görər hər şeydən öncə.
BELƏDİR İnsan robot deyil ki, Həmişə düz işləsin. Sadə məntiq deyir ki, Səhvi olur hər kəsin. * * * Bu səhvlərin içində İtib-batan çox olar. Hamısı bir biçimdə, Olmur, çaşan yox olar. * * * Çalışırıq hamıda Qüsur tapaq, səhv tutaq. Ağzımızda tamı da Az qalır ki, unudaq. * * * Bu dünyanın gərdişi Bizi maraqlandırmaz. Bir insanın səhv işi Qəti bizi yandırmaz. * * * Acımasa xəmiri, Küt gedəcək kündələr. Yola verər ömürü, Saf, əlacsız bəndələr. * * * Ağıllı baş seçilər, Düz əməli, işiylə. Yaşandıqca kiçilər Dərd, ağıllı kişiylə. * * * Bu dünya hamı üçün Gör-götür dünyasıdı. Baxın, yaşayın, keçin, Həyat ömrün yasıdı.
ŞEİR (Bir şeir kitabını oxuduqdan sonra…1982ci il.) Şeirə meyl eləyin, şeir oxuyun, Sevinclə, kədərlə dost olmaq üçün. Şeirə meyl eləyin, şeir oxuyun, Şeir dünyasından zövq almaq üçün. * * * Mənimçün şeirdir, hər açılan gül, Mənimçün şeirdir, oxuyan bülbül. Mənimçün şeirdir, o şehli çəmən, Şeirdir mənimçün o ağ yasəmən. * * * Mənimçün şeirdir, gördüyüm gözəl, Şeirdir mənimçün tökülən xəzəl. Mənimçün şeirdir, payızın sonu, Yazda göz oxşayan nərgizin donu. * * * Şeirdir həyatım, şeirdir canım, Şeirsiz keçməyir vaxtım, zamanım. Deyirəm a dostlar, şeir oxuyun, Duyun, duyğulanın, çələng toxuyun. * * * Şeirdir mənimçün var da, dövlət də Şeirdir sevinc də, qəm də, nifrət də. Şeirdir həmişə, hər an, hər zaman Mənimçün edilən quru hörmət də.
Səma cisimlərinə həsr olunmuş şeirlər 2003-cü ildə baş vermiş tutulma zamanı bu şeiri yazmışdım. Günəş tutulması onda cəmi 4 dəqiqə ərzində baş vermişdi və tam tutulma olmuşdu. Bundan (2003 ) 7 il əvvəl (1996) olan tutulma bir də 50 il sonra baş verəcəyi proqnozu verilmişdi. Hamısını şeirdə qeyd edilmişdir.
ƏBƏDİ SEVGİ Bu gün iki sevgili Uzun həsrətdən sonra Sevinclə görüşdülər. Bu gün iki sevənlər – Ayla Günəş qovuşdu, Sevən qəlblər alışdı. Cənnət oldu onlara fəza- əngin sonsuzluq. Bir çox sevən ürəklər gizlin görüşür ikən, Onlar aşkar görüşdü. Çox qısa görüş idi.
Zaman sevən qəlbləri yeddi il bir-birinə möhtac qoyurkən niyə Onlara görüş verdi ancaq dörd dəqiqəliyə?.. Həyat necə amansız, Zaman necə zamandır?..
İnsanlar böyük eşqə Təlatümlə baxırkən Buna bir ad verdilər- “Gün tutulur”,- dedilər. Ay Günəşi tutmadı, Bu gün Ay da yatmadı, Bu gün Gün də batmadı, Bu gün onlar görüşdü. Dörd dəqiqə vaxt keçdi. Bu nə qısa görüşdü?
Hələ bu yetməz ikən Tam əlli il ayrılıq verdilər sevənlərə.
Budur əbədi sevgi- Ay həsrətdə qalsa da Özgəsini sevməyir. Günəş tel sığalını Özgəsinə verməyir. 2003.
AY Yenə görünürsən, axşam düşübdür, İşığı uzaqdan sevgilin verir. Toxunmur, toxunmur, toxunmur sənə, Uzaqdan, uzaqdan, uzaqdan sevir.
BATAN GÜNƏŞİN O al şəfəqləri süzülüb gedir, Dünyadan ürəyi üzülüb gedir. Arzusu qəlbində büzülüb gedir batan Günəşin.
Göylərdən qaranlıq qoxusu gəlir, Ürəyə ayrılıq qorxusu gəlir. Gündüzdən yorulub, yuxusu gəlir batan Günəşin.
İndi kölgə vermir yalqız duran ev, Qaranlığa doğru o kölgələnir. Yığışıb getdikcə qəlbi kövrəlir batan Günəşin.
Son dəfə şəfəqlər suda bərq vurur, Dalğalar içində itib qərq olur. Yeni səhər üçün indi yox olur Şeiri, şərqisi batan Günəşin. 13.03.2023.
Söz sərrafı, gözəl insan, incə ruhlu şair Murad Memmedovun “Ömrün payız duyğuları” adlı yeni kitabı işıq üzü görüb. Şair bu münasibətlə “Yazarlar” jurnalı tərəfindən yeni kitabların nəşrinə görə eyni şəxsə yalnız bir dəfə verilən “Ziyadar” mükafatına layiq görülüb. Təbrik edirik! Uğurlarınız bol olsun, Murad müəllim! Hər yeni saat yeni gün yeni il uğur gətirsin inşəAllah!
Ön sözün müəllifi Həzi Həsənli , dost sözünü əsirgəməyən qələm adamı isə, Avdı Qoşqar.
YANDIRIR Cəfasını çəkmirsən, Yar adamı yandırır. Yağış qoymur, əkmirsən, Var adamı yandırır. * * * Hərdən şimşək tək çaxan, Yurd dağıdan, ev yıxan, Baxıram, yoxa çıxan, Ar adamı yandırır. * * * Min bəlanı addayan, Neçə dizi qatdayan, Dərd azardan çatdayan, Gor adamı yandırır. * * * Toz-torpağa bələnən, Hey seçilən, ələnən, Qapı-qapı dilənən, Kor adamı yandırır. * * * Od, ocaqdan yan dursan, Yanmamış kimi varsan, Çaşıb külə əl vursan, Qor adamı yandırır. * * * Ney ağlayır, inləyir, Kaman ruha dil deyir, Saz səsi cingildəyir, Tar adamı yandırır. * * * Zəmanə tələ qurur, Səni bezdirir, yorur, Qəfildən dolu vurur, Bar adamı yandırır. * * * Dərd içində iş getmir, Həvəs ölür, baş ötmür, Dərdə bax, heç üşütmür, Qar adamı yandırır.
BİR ÖMÜR YAŞADIM Bir ömür yaşadım bildiyim kimi, Səssizcə gedəcəm gəldiyim kimi, Neçə günahları sildiyin kimi, İlahi, rəhm elə keç günahımdan. * * * Bilmədim kiminsə haqqına girdim, Bəzən gec anladım, səhvimi gördüm, Oldu ki nahaqdan yüz günah dərdim, İlahi, rəhm elə keç günahımdan. * * * Mən elə yaşdayam məramım bəlli, Üzümdə yalvarış, gözdə təsəlli, Nə desən razıyam indi beş əlli, İlahi, rəhm elə keç günahımdan. * * * Sənin rəhiminlə dünyaya gəldim, Oxudum özümü ağıllı bildim, Gah yersiz ağladım, gah yersiz güldüm, İlahi, rəhm elə keç günahımdan. * * * Mən yaxşı bilirəm səbrin böyükdü, Mənim günahlarım çiynimdə yükdü, Üç övlad böyütdüm, üç ağac əkdim, İlahi, rəhm elə keç günahımdan. * * * Ömür sınağıymış, gec başa düşdüm, Bütöv qınağıymış gec başa düşdüm, Gələn qonağıymış, gec başa düşdüm, İlahi, rəhm elə keç günahımdan.
ETİRAF Ağlımın ucundan keçmir inan ki, Nə məşhur yazıçı, nə şair olum. Beynimdə yüz fikir dolanır, sanki, Bağlanır qollarım, kəsilir yolum. * * * Elə bir yaşdayam hamıya bəlli, Məqsədim, məramım məndən vaxt alar. Söz ilə oynamaq acı təsəlli, Qırxında öyrənən gorunda çalar. * * * Deyibsə atalar günahkar mənəm. Neynəyim söz məni rahat buraxmır. Gah rahat oluram, gah dolur sinəm, Ha daşır, kükrəyir sularım axmır. * * * Söz elə bir möcüzə, elə bir yara Düşdüsə sinənə çağlayır, dolur. Heç özüm bilmirəm aparır hara Gah mənsiz dolaşır, gah mənnən olur. * * * Baxıram bu ömrə, bu günə yadam Söz məni dünyadan özümdən alır. Ona sevinirəm, bir ona şadam Yazdığım nə varsa nişanə qalır.
DOĞRUYA DOĞMAYAM Doğruya doğmayam, yalana yadam, Dilbilməz naşını qarsıyan odam, Ay haqqı-salamı tapdayan adam, Bu dünya fırlanır, anlamadınmı?! * * * Böyüdün, boy atdın bizi saymadın, Yığdın, yığışdırdın vardan doymadın, Böyüyə, kiçiyə hörmət qoymadın, Bu dünya fırlanır, anlamadınmı?! * * * Günlər yel tək ötər, aylar dəyişər, Ömür buxarlanar, qaynayar, bişər, Nə vaxtsa sənin də kəmərin düşər, Bu dünya fırlanır, anlamadınmı?! * * * Nə olsun qismətin, əlin gətirir, Qursağın böyüyür, mədən götürür, Ömrü kin, küdurət, tamah bitirir, Bu dünya fırlanır, anlamadınmı?! * * * Gənclik uçar gedər, cavanlıq ötər, Qamətin əyilər, gözəllik itər, Qismət daşa dəyər, qırılar, bitər, Bu dünya fırlanır, anlamadınmı?! * * * Tanrıya şükr elə, qəflətdən oyan, Kimdi bu dünyada həyatdan doyan? Adam ol! Az danış yalandan, dayan! Bu dünya fırlanır, anlamadınmı?!
QƏLBİ TƏMİZ (Ceyhun Haşımova) Qəlbi təmiz, ədalətli, Saf ürəkli gözəl hakim. Sənətində bir zirvəsən, Sən ürəkdə olmaz heç kim. * * * Neçə könül sevindirdin? Neçə ürək şad elədin? Qulaq asdın, gah dindirdin! İçində fəyad elədin! * * * Əl tutmağın savabını Bu dünyada hamı bilir. O dünyada cavabını Bəndə verir, Tanrı silir. * * * Qazandığın sevinc olur Əziyyətin bada getmir. Bu savabdan gözlər dolur Ömür bitir, arzu bitmir. * * * Arzuların qoy çin olsun! Əməllərin gül açdıqca. Bir manatın qoy min olsun! Möhtac kəslər dil açdıqca. * * * Ay qəlbləri gəzən oğlan Ruhunu Tanrı dindirsin! Kasıblığı əzən oğlan Allah səni sevindirsin!
ÖMRÜM Günlər uçur, aylar gedir, İllər ömrə sığal çəkir. İçimizi ağrı didir, Qəlbimizdə yüz dərd əkir. * * * Günlər, aylar qayıtsa da, Heyif illər geri dönmür. Səhvlər bizi ayıltsa da, Xatirələr bəri dönmür. * * * Keçən illər ömrümüzə Qətrə-qətrə yaş çiləyir. İllər geri dönmür, bizə Gələn illər daş çiləyir. * * * Ömür ötür sətir-sətir Fikir kimi, kəlmə kimi. Yaş artdıqca sanki bitir Gödək ömür ilmə kimi. * * * Günlər ötür, bayram gəlir Biz bu günə şad oluruq. Yaxşı günü sevinc bilir Yaman günə yad oluruq. * * * Hansı ki bu günlərimiz Ömrümüzün bir parçası. Yelə verdik günləri biz, Bu dərdi kimə açası?! * * * Aylar, illər tez ötsə də, Keçən ömür geri dönmür. Arzu, kamın lap bitsə də, Gözün doymur, həvəs sönmür. * * * Bu illərin savaşında Hər gün başa qar ələnir. Alnımıza qırış gəlir Çöhrəmizdən nur ələnir. * * * Ay illərin arasında Xatirəyə dönən ömrüm! Qırılacaq harasında?! Neçə dərdi yenən ömrüm!
DÜNYA Dünyaya gələndə anlamadım ki, Bu dünya kəmfürsət, səbri darıymış. O qədər çalışdım nəbzini tutam, Önümdə nə qədər kölgə varıymış?! * * * Yüz dərdin içində bir can bəslədim, Dünyanı xeyirə, haqqa səslədim, Çətinə düşəndə kömək istədim, Gözü kor, qulağı tamam karıymış. * * * Gün vurdu qaraldım, istidən yandım, Aza qane oldum, nəfsimi dandım, Özümü dünyanın halalı sandım, Qazancım halallıq, namus, arıymış. * * * Bu dünya əzəldən sirli bir otaq, Sonda hamımıza qaranlıq yataq, Üzümə gün doğdu, bəxtimə bir bax, İçimdə sırsıra, çovğun, qarıymış. * * * Murad geri döndü, xəyala daldı, O ötən günləri yadına saldı, Beynimdə o qədər arzu, kam qaldı, Neyləyim?! Puç olan arzularıymış.
OLMAZ İnsan vardan ötrü göz yaşı tökməz, Qismətdən kənarda dövlət, var olmaz. Ağlını işlətsə, başı dərd çəkməz, Ailə yanında heç vaxt xar olmaz. * * * Dəyər ver, məna ver işə, əməyə, Əziyyətin itməz, gələr köməyə, Çəkinmə dərdini dosta deməyə, Ağzı bütöv olsa, eldə car olmaz. * * * Paxıllıq, xəbislik ziyandı cana, Kişi ol, sadə ol, baxma heç yana, Vaxtında kömək ol, əl tut insana, Dost, tanış yanında yerin dar olmaz. * * * Çətinə düşəni qəti qınama! Dayaq ol bacarsan, heç nə unama! Kasıbı aclıqla, pulla sınama! Varlıda səxavət, düz ilqar olmaz. * * * Tanrıya yaxın ol, Allaha əyil, Yaramaz işlərə eyləmə meyil, Zahiri gözəllik əbədi deyil, Sifəti yanandan sənə yar olmaz. * * * Muradın məna var hər an üzündə, Əbədi gülüş var daim gözündə, Nifrət toxumları gəzmə sözündə, Şairlər heç zaman zülümkar olmaz.
BACIM (Bacımın 55 illiyinə) Küsmə vəfasız həyatdan, Ömür sənin taleyindir. İncimə qohumdan, yaddan, Xoş üz göstər, yaxşı dindir. * * * İncidiyin fani dünya, Sənə doğru yol göstərdi. Üç övladı olan kəsin, Üzü gülər, olmaz dərdi. * * * Gileylənmə öz bəxtindən, Taleyini Tanrı yazdı. Qismətinə şükr elə sən, Şükr eləmək inan azdı. * * * Ömür gödək olur bacı, Gülüşünü kəm eləmə! Bu ömürdə ağrı, acı, Olmalıdı qəm eləmə. * * * Bu rəqəmlər heç nə demir, Sənə ruhu Allah verdi. İstəyincə sağlam ömür Diləyirəm rəqəm sirdi.
DAĞLAR Nə yaxşı ki, sizi gördüm, Bir dəyişdi halım ,dağlar! Yaddan çıxdı bir an dərdim, Ay fidəniz olum ,dağlar! * * * Neçə vaxtdı yoxdu tünlük?! Nə sizlikdi, nə də mənlik, İmkan verin onca günlük, Sizdə mehman qalım, dağlar! * * * Ətəyində binə salıb, Bir doyunca nəfəs alıb, Neyləyim ki, sirdaş olub, Sizə mehir salım, dağlar! * * * Bir xeyir var hər səbirdə, Dözümlü ol gələn dərdə, Sağlıq olsun siznən bir də, Kəsişərmi yolum, dağlar! * * * Hər nakəsi yar etməyin, Çox sirrimi car etməyin, Siz Muradı xar etməyin, Qadanızı alım, dağlar!
BU DAĞLARIN Bu dağların əzəməti, duruşu, Qarşısında baş əyirəm dünəndən. Nə cəzb etdi? Nə gözəldi? Soruşun, Sadalayım, töhvə olsun bu məndən. * * * Baxıram, papağım düşür başımdan, Balaca nöqtəyəm ətəyində mən. Göz yaşı car olur çınqıl, daşından, Baxır, sanki, qan ağlayır ürəkdən. * * * İlahi zövqü var ulu Tanrının, Nəyi yaradıbsa, şövqlə yaradıb. Burda gözəl keçir zamanın, anın, Gərək zövq alasan tamını dadıb. * * * Neçə nəsil görüb yaranışından, Başından tüfənglər, toplar atılıb. Baxıb zövq alıram şax duruşundan, Görən nə düşünür, qaşı çatılıb?! * * * Şahanə gözəllik var bu yerlərdə, Ruhumu oxşayır, ruh verir mənə. Havası dərmandı sağalmaz dərdə, Qismətdə olarsa gələrəm yenə.
EY KÖNÜL Ey könül, ovutma məni, Dərd, azardan gəl qıraq ol! Sözə bağlı bu bəndəni, Qoyma sönə, gur çıraq ol! * * * Demirəm ki, nəşəli ol, Ömrüm keçsin yuxu kimi. Yol seç, olsun şərəfli yol, Qınanmayım çoxu kimi. * * * Təpər olsun qoy canında, Haqdan nisyə gün diləmə. Qohum, qonşu, dost yanında, Məni peşiman eləmə! * * * Həyatda yaşadığın yox, Yaşatdığın yadda qalır. Səni, sonradan daha çox, Əməllərin yada salır. * * * Neyləsən də saf, təmiz qal, Uzaqlaşma təmiz addan. Səhvim varsa, sən yada sal, Qoyma, küsüm bu həyatdan.
DAĞLARIN Baxıram duvağı dumandı, çəndi, Çəkilsə gül açar gözü dağların. Bağlansa yolları, bərəsi, bəndi, Danışmaz, qurtarar sözü dağların. * * * Gülünü tapdama, kolunu əymə, Zirvəyə dırmanıb özünü öymə, Nəbadə dağların xətrinə dəymə, Dil deyib ağlayar özü dağların. * * * İlahi hüsnündən mehmanı doymaz, Gözündən kənara kimsəni qoymaz, Pulsuzu xar etməz, pullunu saymaz, Yandısa kül olmaz közü dağların. * * * Zirvəsi sıldırım silsilə daşdır, Söykənib bel-belə hey başa-başdır, Yayı, payızı da, qışı da xoşdur, Murada ruh verər yazı dağların.
YAŞADIM Mən ruhla yaşadım, qalmadım onsuz, Bir sifət daşıdım boyasız, donsuz, Geriyə boylandım, xəyallar sonsuz, Ruhum yamyaşıldı abad bağ kimi. * * * Gəl ruha toxunma, qanatma, oyma, Həzz al gözəllikdən, arif ol, doyma, Qara çirk götürməz deyiblər, uyma, Qara da çirklənər bəyaz ağ kimi. * * * Sağ var ki, kimsənin yadında qalmır, Bir salam verən yox, vecinə almır, Ölü var dəyəri ölmür, azalmır, Qalır yaddaşlarda, yadda sağ kimi. * * * Dünyada dərd etmə hər kiçik dərdi, Bu dünya dərdliyə müəmma, sirdi, Kim ki bu dünyanın gözünə girdi, Ay Murad, ucaldı uca dağ kimi.
DÖYÜNƏN ÜRƏYİM Döyünən ürəyəm, təntiyən nəfəs, Əlçatmaz arzuyam, sönməyən həvəs, Ay Allah bəndəsi, neyləyim ki, bəs, Sən məni anlayıb başa düşəsən. * * * Nə qədər aşağı enim görəsən?! Nə qədər özümü yenim görəsən?! Nə qədər danışım, dinim görəsən?! Sən məni anlayıb başa düşəsən. * * * Nəyi bağışlayım, mən nəyi keçim, Doğrumu, yalanmı? Sən eylə seçim, Nəyi girov qoyum, nəyə and içim, Sən məni anlayıb başa düşəsən. * * * İnsana ruh verər xoş sözün ətri, Duyub anlayanda hər fikri, sətri, Bu Murad neyləsin de, səndən ötrü, Sən məni anlayıb başa düşəsən.
OLSA Dünyanın dərd, səri vecimə olmaz, Yanımda bir nəfər dərd bilən olsa. Nə pislik, yamanlıq yadımda qalmaz, Niyyət gözəl olsa, üz gülən olsa. * * * Məni aldadammaz şirin yalanar, Ruhumla oynayıb, ləzzət alanlar, Canımda o qədər arzu, istək var, Aşaram yüz təpə, yüz bələn olsa. * * * Baxaram, üşütsə dərdimin nəmi, Yaxına qoymaram qüssəni, qəmi, Yanaram oduna pərvanə kimi, Dərdimi anlayıb tən bölən olsa. * * * Ay Murad, gözəldi hər keçən anın, Canına ziyandı qaralsa qanın. Başı ağrıyarmı görən insanın? Sözü əməliylə düz gələn olsa.
QORXMAZ Bu bazar təzə nırxdan, Qorxmaz, əzizim, qorxmaz. Cana doyan çarmıxdan, Qorxmaz, əzizim, qorxmaz. * * * Qəvvas olan dərindən, Kim inanır, pirindən, İnsan dünya şərindən, Qorxmaz, əzizim, qorxmaz. * * * Pulu olan bazardan, İmanlı kəs məzardan, Salim olan azardan, Qorxmaz, əzizim, qorxmaz. * * * Başı çəkən yamandan, Dolu başlar gümandan, Dərdli ahdan, amandan, Qorxmaz, əzizim, qorxmaz. * * * Yolu azan qabaqdan, Kasıb olan yamaqdan, Taleyi kəm sabahdan, Qorxmaz, əzizim, qorxmaz. * * * Xəbərsiz can olumdan, Zulum çəkən zulumdan, Saf bəndələr ölümdən, Qorxmaz, əzizim, qorxmaz. * * * Çünki dünya dəyirman, Bəndə, bozaran xırman, Allah vuran heç zaman, Qorxmaz, əzizim, qorxmaz.
YURDUMUN (İncə dərəsi, Kəmərli.) Sarsılmaz ruhu var baxsan əzəldən Ağıllı başlarla dolu yurdumun. Sevilər, az olmaz ruhu gözəldən Tanrıdan lütfü var ulu yurdumun. * * * Qaydası, nizamı öz yerindədir, Hamı eyni kökdə, eyni dindədir, Tarixi varaqla, çox dərindədir, Mübarək imzası, qolu yurdumun. * * * Əlini uzatsan göylərə çatan Dağların qoynunda başını qatan Köksündə pir olmuş insanlar yatan Türbəyə açılır yolu yurdumun. * * * Qazaxdan çıxanda görünür məncə, Adı Kəmərlidir, soyadı İncə, Görən nə baş verir?! Murad gəlincə, Dəyişir növrağı, halı yurdumun. Müəllif: Murad MƏMMƏDOV
