İlaxır çərşənbəniz , Novruz bayramınız mübarək!
Səni bu dünyaya sevgi göndərir
Həsrətin alıbdır, yəqin huşların.
İtirib göylərdə səmtin, tuşların…
Xəbəri yox səndən qaranquşların,
Xəbər göndərdiyin sən gərək, bahar.
Qoyma ki, adını edib şəkk, deyək,
Fəsillər içində sənsən tək, deyək,
Sənə hər addımda mübarək deyək,
Sən ey, hər addımı mübarək bahar.
Yolları nə qədər hörmək olarmış,
Nə qədər ayrılıq görmək olarmış?
Bu qışı nə qədər bölmək olarmış,
Nə insan baş açır nə fələk, bahar.
Nəfəsin xəyalı, ruhu çöndərir,
Həvəsin suları selə döndərir.
Səni bu dünyaya sevgi göndərir,
Sevgidir açdığın hər çiçək, bahar…
Soyuğu salırsan taxtından, üstündən,
Sonra baxt yazırsan baxtın üstündən.
Ürəkdə gəlirsən vaxtın üstünən,
Bir sən şad olursan bir ürək bahar.
