Etiket arxivi: Məhəmməd Yəhyayev

Məhəmməd Yəhyayev – Gəlməmisənki?

Gəlməmisənki?

Zəngimi açmırsan,halım xarabdı,
Sinəndə daş barı hörməmisənki?
Qəmim siqaretdi,dərdim şərabdı,
Dərdindən keflənən,görməmisənki?

Kəsib,doğrayırsan kündə,əzizim,
Ölüb,dirilirəm gündə ,əzizim.
Nöqsan axtarırsan məndə,əzizim,
Sevgimdən dönməzəm,bilməmisənki?

Ağızda,damaqda xoş dad var idi,
Sevincdən uçmağa qanad,var idi.
Könül dəftərində bir ad var idi,
Üstündən xətt çəkib,siməmisənki?

Bu da yaşadığım bir cür ömürmüş,
Yanıb,tüstülənir,qalan kömürmüş.
Sənin ki ürəyin daşmış,dəmirmiş,
Cavab ver zəngimə,ölməmisənki?

Məhəmməd qalıbdır qulağı səsdə,
Gözləri yol çəkir,olubdur xəstə.
Dərd gəlir hər gündə dərdinin üstə,
İnsafa,mürvətə gəlməmisənki?

Aprel 2025

Köpəkoğlu

Babanı öpürsən, qucaqlayırsan,
Arada döyürsən, döy”köpəkoğlu”.
Saçını yolursan, daraqlayırsan,
Qulağın burursan, “vay”, “köpəkoğlu”.

Sevinci ürəyə hörənə qurban,
Xeyirxah işləri görənə qurban.
Deyirəm, bax səni verənə qurban,
Yox imiş nəvəyə tay, “köpəkoğlu”.

Sevinci, fərəhi yaşatdın mənə,
“Dövlətdə dəvəymiş,övladda nəvə”.
Babanın sözünə baxmayır nənə,
Nənəni söyürsən, söy, “köpəkoğlu”.

Şirinim, şəkərim, noğul balamsan,
Tanrının verdiyi, oğul balamsan.
Başqa bir dünyamsan, nağıl balamsan,
Başını sinəmə qoy, “köpəkoğlu”.

İncitdim mən səni, bağışlayarsan,
Əl çalıb,babanı alqışlayarsan.
Hava çox soyuqdur, “naxoşlayarsan”,
Bircə tez gələydi yay, “köpəkoğlu”.

Könlümə düşübdür toy, “köpəkoğlu”,
Toyunu görəydim ay, “köpəkoğlu”.

Mart 2025