Əcəb tənhalıqdı
İlahi, sənin də minnətin olsun,
Sənin də dünyanda qalan deyiləm.
Sal məni çarmıxdan aşağı, görüm,
Mən sənin müjdəli balan deyiləm.
Sus daha səsin də başıma düşür,
Yoxsa ki gedərəm sükutu tapıb.
Göyləri özümə çətir tutaram,
Yağış yağdıraram buludu tapıb.
Əcəb tənhalıqdı, vaxt da vaxt deyil,
Getməyə bir ünvan harasa olur,
Çiynimin üstündə qanad çəkirəm,
Çevrilib ovcumda yarasa olur.
Götürüb dünyanı, yuxu götürüb,
Düşüb yer üzünə mürgüsü, düşüb.
Min ildir Tanrı da özünü görmür,
Bəlkə də əlindən güzgüsü düşüb.
İ̇lahi, sənin də minnətin olsun,
Sənin də dünyanda qalan deyiləm.
Sal məni çarmıxdan aşağı görüm,
Mən sənin müjdəli balan deyiləm…
Müəllif: Vasif Zöhraboğlu
Oxuyun >> Gözündə tük var