13 il…
Bu gün bizim evliliyimizin 13 ili tamam olur.
8 ili birlikdə sevgi ilə,güvənlə,gülüşlərlə keçdi…
5 ili isə sənsiz səssiz,amma qürurla, həsrətlə,yanğıyla…
Hər il bu gün gələndə içimdə qəribə bir sükut çökür.Bir tərəfim ağrıyır çünki sənsizəm.Digər tərəfim gülümsəyir çünki səninlə yaşadığım hər anım bir ömür qədər dəyərlidir.
Mən çox xoşbəxt idim,Fariz…
Həyatın çətinlikləri olsa da,yanımda sən var idin dağ kimi,dayaq kimi…
Gözlərindəki sevgi mənim üçün bütün dünyanın səssiz və dərin səadəti idi.
Mən sənin gözlərinə baxıb gələcəyimizə inanırdım.Amma sən getdin…
Vətəni,bizi,gələcəyimizi qorumaq üçün canını fəda etdin.Və mən qaldım yarımçıq bir hekayənin içində,amma qürurla başım dik “Mən şəhid həyat yoldaşıyam” deyərək.Sən tək getmədin,bir parçanı da apardın özünlə.Amma içimdə elə bir iz qoydun ki,zaman belə silə bilmədi.Sənin adını hər çəkəndə nəfəsim titrəyir…Amma bu titrək nəfəsin içində həm sevgi,həm həsrət,həm də qürur var.Çünki sən həm mənim həyatımın sevgisi,həm də bu millətin əbədi qəhrəmanısan.
Bu gün səninlə olan evliliyimizin 13-cü ili tamam olur.
Sənsiz 5 il keçdi…
Amma sanki sən hələ də burdasan nəfəsimdə,dualarımda,qəlbimin hər guşəsində.
Səni unutmadım,unuda bilmərəm.
Çünki mən hələ də səni sevirəm…
Sanki bu gün yenidən “hə” deyirəm sənə səssizliyə,xatirələrə,dualara…
Ruhun şad olsun,Farizim…Səni sevən qəlbimlə bu günü yaşayıram həm ağrıyla,həm təbəssümlə…
Müəllif: Əzizə Fariz
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru