M Ə N İ M D İ
Qəlbimi didib-sökən,
Hər daşına qəm çökən,
Gözlərindən qan tökən,
O yurd yeri mənimdi.
Elə vurğun dəliyəm,
Quru çaylaq seliyəm,
Ağır köçkün eliyəm,
Dərdin nəri mənimdi.
Dərd qatlayır dizimi,
Həsrət qarsır sözümü,
Unutmuşam özümü,
Utanc təri mənimdi.
Kor dumana qatılan,
Ocaq kimi çatılan
Yurda sarı atılan
Tale zəri mənimdi.
Qəlbində gor qazılan,
Diləkləri pozulan,
Yana – yana yazılan,
Yurd şeiri mənimdi.