SƏNDƏN VƏFALIDIR
Hər gün boynubükük bənövşə kimi,
Misramın üzündə varaq ağlayır .
Dili tutulubdur barmaqlarımın ,
Xatirə-xatirə soraq ağlayır .

Səndən vəfalıdır sənin həsrətin,
Dizinə baş qoyub ağlamaq olur.
Ayrılıq qoxulu arzularımın ,
Ümidi Kövrəlir, gözləri dolur.

Taleyim dərdinlə qol-boyun olub,
Kövrək misraları düzdüm vərəqə.
Hər gün misra-misra qoxlayır ürək,
Sevgi ətri verən adını sənin ,

Gözün gülümsəyir yaz çiçəyi tək ,
Ahım yelpikləyir xatirələri.
Yenə qəlbini oxumaq üçün
Sevgi kitabı tək açdım sabahı.