Ссутнил къиссу
(танец осени)
Мурчал зизин буллай,мурхьирдал ч1ап1ив,
Гьалай бур лагмава,ссутнил къиссуну…
Ят1у-хъахъи ч1ап1ан,щют1уххул макьан
Дуцлай бур мурчалгу,цила зумувну…
Щядик1лай,гьаз хъанай,шархь ттуруллалгу,
Вив ласун кьаст дувай,неххал дарарду.
Мик1лач1лан бивк1укун лахъ барзунтталгу,
Ялтту дичлан бик1ай,к1яла дарайрду.
Ттул Ватан
(Родина моя)
Ттул Ватан, ина ттул къюк1лил парчара,
Гъурбатрал иттату вирххулул к1унт1ра…
Оьрмулул ххуллурдай къурхъ дагьарчангу
Дуцаву дакъасса дак1нил бут1ара…
Ттул оьрмулувусса ссавруннал аьршра,
Вил хъунна аьрщарал нагу ца аьшра,
Гъарившиврул такьва дак1ниву дусса
Вил мархлуя ххявхсса,ца лакку душра.
Агь, дуссия ттулгу ца ч1ун ххарисса,
Ккуччу т1ий, хияллал хханхха бувц1усса,
Ччанналу щаллунна дуниял ч1алай
К1умур оьрмулуя хавар бакъасса…
29.10.2024ш. Баку.
Ниттихь
(Матери)
Дадай,лащан данна ина бургъиха,
Оьрмулул ц1ан хьхьурду чанна дайну т1ий.
Марц1 щинал щаращул ч1у, вил ч1униха,
Дак1нивусса бурса,бассан байну т1ий.
На лащан буванна,яру хьхьириха,
Щюлли хьхьирил зума,дазуну хьурчан…
Яруннал пар-паргу,чанна ц1урттаха,
Так му нур ядуван ттуща бюхъарчан.
На лащан дуванна ина
ссавниха,
Ссавруннал ц1ан ларххун,к1уч1 къадуварчан…
Лащан данна ина, дунияллуха,
Щаллара дуниял, виха лащарчан…
01.09.2024. Баку.
Чикъавчу чагъар
(Недописанное письмо)
Бюхъарчан зана да та ттул оьрч1шиву
Хияллал дунъяллий,хъихъину ларгсса.
Зана да махъуннай ттул жагьилшиву
Цимийгу ц1ансса хьхьу уттара дурсса…
Агарда дак1 ччаврих мюхтаж дуккарчан
Лещан маритара ттул къюк1лил к1алай.
Нац1у хияллаву хъяврин хъанарчан
Хъама мабитара ттул дак1нил балай…
Хханххирал курт1нийсса илкин асардал
Оьрмулул лу хьура,буккин къавхьусса.
Ссутнил гьужум бувсса,дик1уву дак1нил
Чагъар хьура вища чичин къавхьусса…
15.11.2023ш. Баку.
Müəllif: Патимат Штанчаева
Rusiya Yazıçılar Birliyinin üzvü
Патимат Штанчаевanın yazıları
“YAZARLAR” JURNALI PDF
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
