WWW.YAZARLAR.AZ

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Qəzənfər Məsimoğlu – Halallıq

Oktyabr 3, 2025 www.yazarlar.az Bir şərh yazın

HALALLIQ

Müqəddəs amaldı, ali məramdı,
Həyatdı, ömürdü, yaşdı halallıq.
Nə qədər bəzəsən haram haramdı,
Dünyada hər şeydən başdı halallıq.

O kənardan gəlib cibinə dolmur,
Şaxtada üşümür, bürküdə solmur.
Dükanda satılmır, bazarda olmur,
Qiyməti ölçüsüz qaşdı halallıq.

Əyri olanlara haqqı qandırıb,
Dəryanı qurudar oda yandırıb.
Zülmət qaranlıqlar işıqlandırıb,
Ün yetməz zirvələr aşdı halallıq.

Qəzənfər, ən ali düşüncə budu,
Sevgini canında yaşadan “Qu”du.
Qayanın gözündən süzülən sudu,
Üstə gül bitirən daşdı halallıq.

Müəllif: Qəzənfər MƏSİMOĞLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Qəzənfər Məsimoğlu – Qoşma

Avqust 16, 2025 www.bitik.az Bir şərh yazın

QOŞMA

Vaqifdən, Vurğundan yadigar qalıb,
Hər zaman təzəmdi, tərimdi qoşma.
Qəlbimi oxşayıb, könlümü alıb,
Gözəlim, göyçəyim, pərimdi qoşma.

Elə möhtəşəmdi, elə ucadı,
Dillərdən düşürmü görün heç adı.
Ruhu qafiyədi, canı hecadı,
Noğuldan, şəkərdən şirindi qoşma.

Sevən ürəklərə sevinc payladı,
Barışa səslədi, sülhə hayladı.
Əsli bayatıdı, kökü layladı,
Dəryadan, ümmandan dərindi qoşma.

Uludu, yüyrəkdi, ozan dilidi,
Bir sözü yüz yerə yozan dilidi,
Din-iman dilidi, azan dilidi,
Müqəddəs ocağım, pirimdi qoşma.

Hökmüylə adillik gətirər şaha,
Saraya çevrilər ən uçuq kaha.
Qəzənfər, dünyada qiymətli, baha,
Yaqutum, gövhərim, zərimdi qoşma.

Müəllif: Qəzənfər MƏSİMOĞLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Qəzənfər Məsimoğlu – Dağlara

İyun 25, 2025 www.yazarlar.az Bir şərh yazın

DAĞLARA

Səhərdi, quşların cəh-cəhinə bax,
Dil açar gətirsən lalı, dağlara.
İsmətli analar, qoçaq gəlinlər
Sağıb, ötürdülər malı dağlara.

Bura qonaqpərvər eldi, obadı,
Mehriban qarşılar yaxını, yadı.
Getməz damağımdan qaymağın dadı,
Necə söyləməyim halı, dağlara?

İllər ələnsə də tellərin üstə,
Murazım o incə əllərin üstə.
Arılar ətirli güllərin üstə,
Çəkib gətirəcək balı, dağlara.

Qəzənfər, bu eşqin görünməz sonu,
Əyilməz vüqarı, bilirəm onu!
Nə gözəl yaraşır çiçəkli donu,
Buluddan örtdüyü şalı, dağlara.

www.USTAC.az

Qəzənfər Məsimoğlu – Şeir

Aprel 6, 2025 www.bitik.az Bir şərh yazın

BİR ŞEİR YAZMIŞAM

Bir şeir yazmışam, cırıb atacam,
Mələklər oxuyub bildisə yetər.
Bu gecə yuxuma qatıb yatacam,
Yastığım gözümü sildisə yetər.

Bir şeir yazmışam, bilən olmasın,
Yerlərə, göylərə açılmaz sirdi.
Qönçə misraları heç vaxt solmasın,
Hər sözü qəlbimlə, canımla birdi.

Bir şeir yazmışam, çağlayır elə,
Qaynayan çeşmədi, axan bulaqdı.
Əyri zəmanəyə ağlayır elə,
Halaldı, doğrudu, düzgündü, haqqdı.

Bir şeir yazmışam, qaralı ağlı,
Pozub düzəltdiyim səhvlərim olub.
Pəncərəsi bağlı, qapısı bağlı,
Tanrı dərgahından ruhuma dolub.

Bir şeir yazmışam, sabaha çatan,
Zülmət qaranlığa qılınc çalacaq.
Qələmdə oyanan, vərəqdə yatan
Arzu, istəyimi nişan alacaq.

www.USTAC.az

Qəzənfər Məsimoğludan bir şeir

Mart 26, 2025 www.bitik.az Bir şərh yazın

BİR SİRLİ QÜVVƏ VAR, QORUYUR MƏNİ

Hara gedirəmsə mənimlə gedir,
Bir sirli qüvvə var, qoruyur məni.
Tanrıdır, mələkdir, pirdir, ya nədir?
Bir sirli qüvvə var, qoruyur məni.

Süzülər, qəlbimə hey axar, dolmaz,
Ətirli nərgizdi, saralmaz, solmaz.
Mənsiz rahatlığı, dincliyi olmaz,
Bir sirli qüvvə var, qoruyur məni.

Qoynunda saxlayar, bələyə qıymaz,
İstiyə, soyuğa, küləyə qıymaz,
Böhtana, yalana, kələyə qıymaz,
Bir sirli qüvvə var, qoruyur məni.

Onunla bağlıdır hər bir anım da,
Yatır axşamımda, durur danımda.
O həm ruhumdadı, həm də canımda,
Bir sirli qüvvə var, qoruyur məni.

Yazılan şeirimin təzə- təridi,
Özümdən özümə bir az bəridi.
Ürəkdən sevdiyi Qəzənfəridi,
Bir sirli qüvvə var, qoruyur məni.

Müəllif: Qəzənfər MƏSİMOĞLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Qəzənfər Məsimoğlu – Nəvələr

Dekabr 15, 2024 www.bitik.az Bir şərh yazın

MƏNİM TUNAR BALAM

Nəvələrin uğuru ən böyük sevincimizdi.
İndi hərəsi 10 yaş böyüyüblər…

Hər övlad payının öz dadı olur,
Oğul dadı olur, qız dadı olur,
Amma bir nəvənin yüz dadı olur,
Mənim Tunar balam, bəxtiyar balam.

Tanrıdan bəxtimin ağı gəlibdi,
Arxamın vüqarlı dağı gəlibdi,
Yaşımın babalıq çağı gəlibdi,
Mənim Tunar balam, bəxtiyar balam.

Nuray, Tural, Turan, Məryəm var olsun,
Dedim bu nəvəm də qoy Tunar olsun.
Arzumdu adına bəxtin yar olsun,
Mənim Tunar balam, bəxtiyar balam.

Vallah, nəvələrlə gözəldi dünya,
Ulu babalardan əzəldi dünya.
Gəldin, gəlişinlə düzəldi dünya,
Mənim Tunar balam, bəxtiyar balam.

Xalqıma oğulam Qəzənfərimlə,
Yaşadım ömrümü alın tərimlə.
Azərbaycan qurdum nəvələrimlə,
Mənim Tunar balam, bəxtiyar balam.

Müəllif: Qəzənfər MƏSİMOĞLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Qəzənfər Məsimoğlu – Biz

Dekabr 14, 2024 www.bitik.az Bir şərh yazın

İNTERNAT UŞAQLARI

Bir ailə kimi böyüdüyümüz, doğmalaşdığımız 1N-li fizika-riyaziyyat təmayüllü internat məktəbindəki (1978-1980) sinif yoldaşlarıma…

Sabahınız işıqlı,
Gözünüz aydın olsun.
Hər biri yaraşıqlı
Dostlarım Ay, Gün olsun.
Sevinci bayraq kimi
Ürəyinizdən asın.
Qoruyaq doğmaları,
Arzumdu qırılmasın
Heç vaxt dostluq bağları,
İnternat uşaqları.

Elm adlı bir qazanda
Qaynadınız, daşdınız.
Yorulmadan fəth edib
Zirvələri aşdınız.
Dəyişmədi heç zaman
Məsləkiniz, andınız.
Kor olsun paxıl, yaman,
Arxa, dayaq sandınız
Uca-uca dağları,
İnternat uşaqları.

Xatirələrsiz ömür
Ya havayı, ya heçdi.
Tanımadıq şər, xata,
İllər yel kimi keçdi.
Gənclik qaldı arxada,
Bənzərsiz günlərimiz
Bir-bir düşürlər yada.
Unutmayaq o xoşbəxt,
O qayğısız çağları,
İnternat uşaqları.

Müəllif: Qəzənfər MƏSİMOĞLU