Babəklər yurdunun hürr övladıyam!

ÖVLADIYAM
Müzəffər ordunun şanlı əsgəri,
Ərənlər yurdunun ər övladıyam!
Zalımın zülmünə təhəmmülüm yox,
Babəklər yurdunun hürr övladıyam!
* * *
Ustadım Nəsimi, sözümüz sözdü,
Ədalət, həqiqət bağrımda közdü,
Ziyadar dühası bir deyil, yüzdü,
Mövlalar yurdunun nur övladıyam!
* * *
Dərvişəm, müqqəddəs sayılır təkkəm,
Hülqumdan yuxarı dayanır öfkəm,
Od, ocaq diyarı tanınır ölkəm,
Alovlar yurdunun nar övladıyam!
* * *
Unutma, şah babam Xətai başdı,
Nadir şah, mətədə tərpənməz daşdı,
İlham, nə keçilməz sədləri aşdı,
İgidlər yurdunun nər övladıyam!
* * *
Tarixdə Nəbisi, Koroğlusu var,
Gen dünya yağıya daim olub dar,
Düşmən qarşımızda yenə oldu xar,
Aslanlar yurdunun şir övladıyam!
* * *
Göydən Yer üzünə ərmağan, payam,
Gündüzlər Günəşəm, gecələr Ayam,
Ən parlaq ulduzdan törəyən boyam,
Ozanlar yurdunun sirr övladıyam!
* * *
Ustacam, vətənim vətən içində,
Axıb duruluruq zaman köçündə,
Min bir anlamı var, adi “heç”in də,
Aqillər yurdunun pir övladıyam!
13.11.2020. Bakı.

Müəllif: Zaur USTAC

Nisə Kərimovanın yazıları

I>>>> Rənglərin Şahzadəsi

Daha çox məlumat burada

ZAUR USTACIN YAZILARI

Oxuyun >> Gözündə tük var

Zaur Ustacın şeirləri haqqında

YAZARLAR.AZ

I>>>>>>BU HEKAYƏNİ MÜTLƏQ OXU<<<<<<I

I>>Mustafa Müseyiboğlu adına kitabxana<<I

NOYABR AHƏNGI

NOYABR AHƏNGI

Payız… Özündə özünəməxsus bir gözəllik cəmləşdirən fəsil.
Elə indicə isti hava bədənimizi qızdırırdı. Sanki əynimizdəki nazik geyim isti havanın hərarətini içəri buraxmırmış kimi hiss olunurdu. İndi isə təbiəti idarəetmə cilovu payız fəslinin ixtiyarına keçib.
Payız hər bir insanı özünəməxsus xəyallar aləminə aparmaq qüdrətinə malikdir. Çünki ətrafda baş verən dəyişikliklərə biganə insanın özü yoxdur. Hərçənd zahirən bu barədə düşünməsək də, batinimizdə müəyyən münasibətin formalaşdığını hiss edirik.
Ağac budaqlarından tökülən saralmış yarpaqlar diqqətimizi çəkir. Zərif əsən meh sanki xəzəlləri haralasa aparmaq istəyir. Bu zaman xəzəllərin topa-topa yığıldığı gözümüzə sataşır. Yenə də müxtəlif xəyallar şüurumuzu məşğul edir. Xəzəllərin torpağı tərk etmək istəmədiyini təsəvvür etməyə çalışırıq.
Hər halda, payızın ovqatı başqadır. Könüllərimiz bir qədər kədərli olsa da, nədənsə təbiətdən hikmət axtarmağa davam edirik. Ətrafı müşahidə etməyə çalışırıq. Müşahidə dedikdə isə iki anlayışı başa düşmək olar. İlk növbədə ətrafın gözəlliyinə, zərifliyinə tamaşa etməyi nəzərdə tuturuq. İkinci anlayış isə ətrafa heyrətlə dolu səmimi baxışlarla nəzər salaraq yurdumuzun qonağı olan payızın özünəməxsus mənzərəsini seyr etməkdir.
Birdən-birə göy üzünün qaşqabağını sallamasında da bir məna var. Sanki payızı seyr etdiyimizə görə göyün də könlü kövrəlib. Bir qədər keçdikdən sonra hisslərini cilovlaya bilməyən səma gizlicə göz yaşı tökür. Xırda-xırda damcılar bədənimizi daha da üşütməyə başlayır.
Bu zaman asfalt küçələrin kənarında həmin xırda damcılar toplanaraq hönkür-hönkür ağlamağa başlayır. Bir yerdə dayanmaq istəmədiklərindən hətta göyə sıçrayırlar… Bu mənzərəni isə yalnız müşahidə etməklə duymaq mümkündür.
Yenə də sonu görünməyən xəyallar şüurumda dolaşır. Hər birinin ardınca gedib baxıram. Ürəyimin pəncərəsini çilik-çilik edib gedən məhəbbətim yadıma düşür. Bu hadisə payız fəslində baş verməsə də, iztirabın ahəngi bənzər idi, vəssalam. Sadəcə, ətrafım sanki zülmətə çevrilmişdi. Günəş qəsdən edirmiş kimi haradasa gizlənib. Məncə, yalnız bulud halıma acıyırdı…
Göylərdə qara buludlar topa-topa, Günəş baş əyibmi, enibmi aşağı? Ürəyimin dərinliyində iztirabım çox, Nə qədər hüznlüsən, noyabr havası.
Könlümü ağaca bənzədərdim. Duyğularım yamyaşıl yarpaqlar idi. Könül ağacımın budaqlarını yarpaqlarının tərk etməsini heç istəməzdim. Yalnız məhəbbətimin qarşılıqsızlığı yarpaqları qopmağa vadar etdi. O zaman duyğularım eynilə xəzəl yarpaqları kimi hər tərəfə səpələnib getdi.
Könlümə bənzəyir uçan hər xəzəl, Bu gün yer qoynunda ayrılıq toyu. Mənim üçün hələ də məhəbbət arzu, Nə qədər hüznlüsən, noyabr havası.
Nəmli hava öz təsirini göstərməyə çalışır, sanki yaranmış vəziyyətdən istifadə edir. Ürəyim doğmalarımın məhəbbətindən uzaqlaşmış kimi hiss olunur.
Göyün göz yaşları bir an da kəsilməz, Burnuma xoş gəlmir yayılan qoxu. Məhəbbətin hərarəti qəlbimi isitməz, Nə qədər hüznlüsən, noyabr havası.
Həmin anlarda könlümün bir küncündə ümid olsa da, görünməz qalır. Fikirlərim qarışır, sonunu tapa bilmir və yenidən sonsuz düşüncələr məkanına doğru addımlayıram.
Füsunkar həyata hələ də müştağam, Ətrafıma sonsuz qəm yığıb, düzüb. Hərçənd sən incidirsən, yenə də oyağam, Nə qədər hüznlüsən, noyabr havası.
Noyabr havası ürəyimi sükut dünyasına aparır. Musiqinin sədaları yüksəldikcə misilsiz zərifliyi daha dərindən hiss edirəm. Adətən, məhəbbətdən söz düşəndə bahar fəslinin daha çox xatırlanması təbiidir. Lakin payız fəslində ayrılıq iztirabından əziyyət çəkən ürəklər ətrafı daha diqqətlə müşahidə etməyə alışır. Nəticədə qəlb iztirab çəksə də, həqiqi məhəbbət duyğusu noyabr havasının ahəngi ilə uzlaşır. O zaman könül istər xoşbəxtliyi, istərsə də qəm-qüssəni hiss etsin, hər halda bunların hamısının məhəbbət sayəsində olduğunu dərk edirsən. İxtiyarsız olaraq Yaradanımıza şükürlər edirsən!

MÜƏLLİF:

Khaitov Khusniddin (Hüsniddin Hayıt)
Halima Xudoyberdiyeva adına Yaradıcılıq Məktəbinin ana dili və ədəbiyyat müəllimi, Azərbaycan Jurnalistlər Birliyinin üzvü, filologiya üzrə fəlsəfə doktoru (PhD)

KİTAB HAQQINDA YAZILAR

Oxuyun >> Gözündə tük var

Zaur Ustacın şeirləri haqqında

YAZARLAR.AZ

I>>>>>>BU HEKAYƏNİ MÜTLƏQ OXU<<<<<<I

I>>Mustafa Müseyiboğlu adına kitabxana<<I

XAQANİ ŞİRVANİ SÖZÜN, FİKRİN VƏ MƏNƏVİ AZADLIĞIN XAQANI

Tanınmış yazıçı, ictimai xadim Sona Abbasəliqızı Türkiyə mətbuatına müsahibə verib. Həmin müsahibəni təqdim edirik:

XAQANİ ŞİRVANİ SÖZÜN, FİKRİN VƏ MƏNƏVİ AZADLIĞIN XAQANI

Müsahib: Yazıçı-publisist Sona Abbasəliqızı İsmayılova
Müsahibəni aparan: Türkmen Dekmen Or

Sona xanım, Xaqani Şirvani Azərbaycan ədəbiyyatı tarixində hansı mövqeyə malikdir? Onu dünya ədəbiyyatının böyük söz ustadlarından biri hesab etməyimizin əsas səbəbi nədir?

Xaqani Şirvani Azərbaycan ədəbiyyatının və bütövlükdə Şərq poetik-fəlsəfi fikrinin ən qüdrətli nümayəndələrindən biridir. O, yalnız öz dövrünün şairi deyil, əsrlərin fövqündə dayanan mütəfəkkirdir. Xaqaninin yaradıcılığında insanın mənəvi azadlığı, ədalət, həqiqət, elm, müdriklik və həyatın fəlsəfi dərki xüsusi yer tutur. Onun poeziyası bədii sözün gücü ilə yanaşı, dərin düşüncə məktəbidir. Xaqanini böyük edən təkcə yazdıqları deyil, həm də əsrlər boyu insanları düşündürməsidir.

Xaqani Şirvaninin yaradıcılığında sizi ən çox cəlb edən, onun haqqında düşünməyə və yazmağa sövq edən əsas cəhət nə olub?

Məni Xaqani yaradıcılığında ən çox cəlb edən onun sözə münasibəti, düşüncə sərbəstliyi və həqiqət qarşısında əyilməzliyidir. O, yaşadığı dövrün çətinliklərinə, saray mühitinin ziddiyyətlərinə baxmayaraq, öz mənəvi mövqeyini qorumağa çalışıb. Xaqaninin şeirlərində insanın daxili dünyası, azad ruhu və zamanla mübarizəsi çox güclü ifadə olunur. Mən bu böyük şəxsiyyətin poeziyasında yalnız keçmişi deyil, bu günümüzü də gördüm.

- Bəs nə üçün məhz Xaqani Şirvani haqqında roman yazmaq qərarına gəldiniz? Bu fikir necə yarandı?

Xaqani haqqında roman yazmaq qərarım təsadüfi deyildi. Onun həyatını və yaradıcılığını öyrəndikcə qarşımda yalnız böyük şair deyil, mürəkkəb taleli, ziddiyyətli bir dövrün içərisində yaşayan, mənəvi mübarizələrdən keçən qüdrətli şəxsiyyət canlandı. Düşündüm ki, Xaqanini yalnız şeirləri vasitəsilə deyil, insan taleyi, düşüncələri, ağrıları, arzuları və yaşadığı tarixi mühitlə birlikdə oxucuya təqdim etmək lazımdır. Roman yazmaqda məqsədim Xaqaninin bədii obrazını yaratmaqla yanaşı, onun mənəvi dünyasına yazıçı baxışı gətirmək idi.

– Romanın adını «Sözün Xaqanı» qoymusunuz. Bu adın arxasında hansı məna dayanır?

«Sözün Xaqanı» adı mənim üçün Xaqaninin mənəvi və ədəbi qüdrətinin ifadəsidir. Burada söhbət hakimiyyətdən, taxt-tacdan deyil, söz üzərində qazanılan mənəvi ucalıqdan gedir. Xaqani öz qələmi, düşüncəsi və bədii istedadı ilə zamanın fövqünə yüksəlmiş sənətkardır. Onun ən böyük hakimiyyəti sözdür. Romanın adı da məhz bu düşüncədən doğub.

– Xaqaninin poeziyasında hansı ideyalar və fəlsəfi düşüncələr üstünlük təşkil edir?

Xaqani yaradıcılığında elm və idrak, ədalət və həqiqət, insan ləyaqəti, mənəvi azadlıq, dünyanın faniliyi və insanın əxlaqi məsuliyyəti əsas mövzulardandır. Onun qəsidələrində ictimai düşüncə, fəlsəfi şeirlərində isə insanın daxili aləmi və mənəvi axtarışları öz əksini tapır. Xaqani sözün imkanlarından istifadə edərək dövrünün ictimai mənzərəsini də təqdim edir. Bu baxımdan onun yaradıcılığı yalnız ədəbiyyat nümunəsi deyil, həm də zəngin mənəvi və tarixi qaynaqdır.

– Xaqaninin həyatında həbs və sürgün mövzusu xüsusi diqqət çəkir. Bu ağır sınaqlar onun yaradıcılığına necə təsir göstərib?

Xaqaninin həyatında yaşadığı ağır sınaqlar onun yaradıcılığında dərin izlər buraxıb. Xüsusilə həbs həyatı ilə bağlı şeirləri onun daxili dünyasını, azadlıq arzusunu, haqsızlığa münasibətini anlamaq baxımından əhəmiyyətlidir. «Həbsiyyə» yaradıcılığı bu mənada xüsusi yer tutur. Mənə görə, Xaqaninin faciəsi onun böyüklüyünü azaltmayıb, əksinə, sözünün mənəvi gücünü daha aydın göstərib.

– Xaqani Şirvaninin yaradıcılığında Şirvan mühiti və Azərbaycan mənəvi dünyası hansı şəkildə əks olunur?

Xaqani Şirvani Şirvan ədəbi mühitinin yetirdiyi böyük sənətkardır. Onun yaradıcılığında yaşadığı coğrafiyanın tarixi, mədəniyyəti, ictimai münasibətləri və dövrün düşüncə tərzi öz əksini tapır. Xaqaninin əsərlərində Şirvan yalnız bir məkan deyil, həm də mənəvi yaddaşdır. Mən roman üzərində işləyərkən bu tarixi və mədəni mühitin bədii təsvirinə xüsusi diqqət yetirmişəm.

– Ədəbiyyat tariximizdə Xaqani ilə Nizami Gəncəvinin adları həmişə yanaşı çəkilir. Bu iki böyük sənətkarın yaradıcılığında hansı oxşar və fərqli cəhətləri görürsünüz?

Hər iki sənətkar Azərbaycan ədəbi-fəlsəfi fikrinin dünya miqyasında tanınmasına böyük töhfə verib. Onları birləşdirən əsas cəhət insanı, elmi, mənəviyyatı və ədaləti yüksək dəyərləndirmələridir. Bununla yanaşı, hər birinin özünəməxsus poetik üslubu, düşüncə tərzi və bədii ifadə vasitələri var. Xaqaninin qəsidəçilik ənənəsindəki yenilikləri, mürəkkəb obrazlar sistemi və fəlsəfi düşüncəsi onun fərdi sənətkar kimliyini müəyyənləşdirir. Məncə, bu iki böyük şəxsiyyəti müqayisə etməkdən daha vacibi onların hər birinin ədəbiyyatımıza bəxş etdiyi zənginliyi dərindən öyrənməkdir.

– «Sözün Xaqanı» romanı üzərində işə nə vaxt başladınız? Əsərin yaranma prosesi necə keçdi?

Xaqani mövzusu ilə bağlı ilk bədii düşüncələrim 2014-cü ildən formalaşmağa başlayıb. 2017–2018-ci illərdə roman üzərində ciddi işə başladım. Bu mövzu məndən uzunmüddətli araşdırma, tarixi mənbələrin öyrənilməsi və Xaqaninin poetik irsinə dərindən nüfuz etməyi tələb edirdi. Mən yalnız tarixi hadisələri ardıcıl şəkildə təsvir etmək istəmirdim. Məqsədim tarixi şəxsiyyətin mənəvi portretini yaratmaq, onun dövrünü və düşüncələrini bədii sözün imkanları ilə canlandırmaq idi.
Roman 2020-ci ildə «Elm və Təhsil» nəşriyyatında ilk dəfə çap olundu. 2020–2022-ci illərdə yenidən nəşr edildi. 2025-ci ildə isə dördcildlik «Seçilmiş əsərlərim»in tərkibində yer aldı. Bu, əsərin mənim yaradıcılığımda tutduğu xüsusi mövqenin göstəricisidir.

– Kitablarınızın nəşrində SOCAR-ın dəstəyini də xüsusi qeyd edirsiniz. Bu barədə nə deyə bilərsiniz?

Mən 38 il əməkdaşlıq etdiyim SOCAR-a kitablarımın nəşrinə göstərdiyi maliyyə dəstəyinə görə minnətdarlığımı bildirirəm. Bu əməkdaşlıq mənim üçün həm uzun illərin zəhməti, həm də qarşılıqlı etimad tarixidir. «Sözün Xaqanı» romanının təkrar nəşrləri və dördcildlik «Seçilmiş əsərlərim»in nəşri də bu dəstəyin əhəmiyyətli olduğu yaradıcılıq mərhələlərindəndir. Kitabın yaşaması, oxucuya çatması və yeni nəşrlərlə genişlənməsi yazıçı üçün böyük sevincdir. Mən bu dəstəyi milli ədəbiyyatın və mədəni irsin təbliğinə verilən töhfə kimi qiymətləndirirəm.

– Romanın ön söz müəllifləri arasında tanınmış alimlərin adları var. Bu, əsərin elmi-ədəbi təqdimatı baxımından nə ifadə edir?

«Sözün Xaqanı» romanının elmi-ədəbi təqdimatında tanınmış alimlərin iştirakı mənim üçün xüsusi əhəmiyyət daşıyır. Əsərin ön söz müəlliflərindən biri görkəmli dilçi alim, professor Nadir Məmmədlidir. Digər ön sözlərdən birinin müəllifi isə Türkiyənin professoru Kerem Karabulutdur. Bu alimlərin əsərə münasibəti və elmi baxışları romanın təqdimatına əlavə dəyər qazandırıb. Mənim üçün sevindiricidir ki, Xaqani irsi müxtəlif ölkələrin alimlərinin də diqqət mərkəzindədir.

– «Sözün Xaqanı» romanının beynəlxalq səviyyədə tanıdılması istiqamətində hansı işlər görülüb?

Mənim üçün Xaqani yaradıcılığının Azərbaycan sərhədlərindən kənarda tanıdılması xüsusi əhəmiyyət daşıyır. «Sözün Xaqanı» romanım Türkiyədə türk, Özbəkistanda özbək, Gürcüstanda isə gürcü dilinə tərcümə olunub. Bu üç ölkədə əsərimə və ədəbi fəaliyyətimə görə mükafatlara layiq görülmüşəm.
Hazırda romanın Pakistan üçün urdu dilinə və fars dilinə tərcüməsi üzərində iş davam edir. Bu məsuliyyətli işi doktor, professor Əli Kumail Qızılbaş həyata keçirir. Tərcümələrin 20 dekabr 2026-cı il tarixinədək tamamlanması nəzərdə tutulur.
Beləliklə, romanın üç dildə nəşr olunmuş variantı var, daha iki dilə tərcüməsi isə hazırlanır. Bu, Xaqani irsinin beynəlxalq miqyasda tanıdılması istiqamətində mənim üçün mühüm mərhələdir.

– Özbəkistanda Heydər Əliyev Mərkəzində romanınıza həsr olunmuş tədbirin keçirilməsi sizdə hansı təəssüratları yaratdı?

Özbəkistanda romanımın tanıdılması istiqamətində keçirilən tədbir mənim üçün xüsusi əhəmiyyət daşıyır. Heydər Əliyev Mərkəzində «Sözün Xaqanı» romanıma həsr olunmuş tədbirin keçirilməsi Xaqani Şirvani irsinin və Azərbaycan ədəbiyyatının qardaş Özbəkistanda təbliği baxımından əlamətdar hadisədir. Kitablarımın həmin Mərkəzə təqdim olunması da mənim üçün böyük mənəvi sevincdir. Mən bunu Azərbaycan-Özbəkistan ədəbi-mədəni əlaqələrinin inkişafına xidmət edən dəyərli addım hesab edirəm.

– Romanınızdan parçaların ali məktəb dərsliyinə daxil edilməsi də diqqətəlayiq hadisədir. Bu barədə fikirlərinizi bilmək istərdik.

Bu, mənim üçün xüsusi sevinc və böyük məsuliyyətdir. «Sözün Xaqanı» romanımdan 6–7 cümlə nümunə kimi ali məktəb dərsliyinə daxil edilib. Mən bunu yalnız şəxsi yaradıcılığıma verilən qiymət kimi deyil, Xaqani irsinin müasir bədii ədəbiyyatda yaşadılmasına göstərilən diqqət kimi qəbul edirəm. Bir yazıçı üçün qələmindən çıxan fikirlərin ali məktəb auditoriyasına, tələbələrin təhsilinə və elmi mühitə çatması böyük mənəvi qazancdır. İstəyim odur ki, romanım Xaqaninin həyat və yaradıcılığının öyrənilməsinə, onun yeni nəsillərə tanıdılmasına töhfə versin.

– Xaqaninin 900 illik yubileyinin qeyd olunması Azərbaycan ədəbiyyatı və elmi qarşısında hansı vəzifələri qoyur?

Xaqaninin 900 illiyi yalnız yubiley tədbirləri ilə məhdudlaşmamalıdır. Bu tarix onun əsərlərinin yenidən nəşri, elmi tədqiqatların genişləndirilməsi, xarici dillərə tərcümələr, beynəlxalq konfranslar və yeni nəsil oxucular arasında təbliği üçün böyük fürsətdir. Xaqani irsi dünya ədəbi-mədəni məkanında daha geniş təqdim olunmalıdır. Mən hesab edirəm ki, bu böyük sənətkarı yalnız xatırlamaq deyil, onu yenidən oxumaq və dərindən anlamaq lazımdır.

– Dövlət tərəfindən yaradıcılığınıza göstərilən diqqət, Prezident təqaüdünə layiq görülməyiniz sizin üçün nə ifadə edir?

Dövlət tərəfindən yaradıcılığıma göstərilən diqqəti yüksək qiymətləndirirəm. Prezident təqaüdünə layiq görülməyim mənim üçün böyük şərəf olduğu qədər, həm də məsuliyyətdir. Bu etimad məni ədəbiyyatımız, milli-mənəvi dəyərlərimiz və tarixi şəxsiyyətlərimizin tanıdılması istiqamətində daha böyük həvəslə çalışmağa ruhlandırır. Mən bu diqqəti gələcək yaradıcılığım üçün mənəvi stimul hesab edirəm.

– Sizcə, Xaqaninin bugünkü gəncliyə verə biləcəyi ən mühüm mənəvi mesaj nədir?

Məncə, Xaqaninin gənclərə ən böyük mesajı elmə, biliyə, düşüncəyə və həqiqətə bağlılıqdır. O, insanın mənəvi zənginliyini hər şeydən üstün tutan sənətkardır. Gənclər Xaqanini oxuyarkən yalnız qədim şeirlərlə tanış olmurlar, həm də düşünməyi, sual verməyi, həyatın mahiyyətini anlamağı öyrənirlər. Xaqani bizə göstərir ki, insanı ucaldan onun vəzifəsi və sərvəti deyil, ağlı, sözü və mənəvi mövqeyidir.

– 2026-cı il həm Xaqaninin 900 illiyi, həm də sizin 65 illik yubileyinizlə əlamətdardır. Bu iki tarixi necə qarşılayırsınız?

Bu il mənim üçün həqiqətən də xüsusi və unudulmaz bir ildir. Bir tərəfdə ədəbiyyatımızın böyük dühası Xaqani Şirvaninin 900 illik yubileyi, digər tərəfdə isə mənim 65 illik ömür və yaradıcılıq yolum dayanır. Mən bu iki tarixi mənəvi baxımdan bir-birinə yaxın hesab edirəm. Çünki ömrümün müəyyən bir mərhələsini Xaqaninin həyatını, yaradıcılığını öyrənməyə və onun haqqında roman yazmağa həsr etmişəm. Ən böyük arzum dekabrın 20-dək urdu və fars dillərinə tərcümələrin də tamamlanması və bu yubileyləri yeni bir ədəbi uğurla qarşılamaqdır. İstəyirəm ki, 65 yaşımda özümə ən böyük hədiyyəm Xaqani sözünün daha geniş coğrafiyada səslənməsi olsun.

– Xaqani haqqında yenidən düşünərkən özünüzü onun qarşısında hansı mənəvi məsuliyyət daşıyan müəllif hesab edirsiniz?

Xaqani haqqında yazmaq mənim üçün həm böyük şərəf, həm də məsuliyyətdir. Mən özümü bu böyük sənətkarın irsini mənimsəyən, onu bədii sözün imkanları ilə oxucuya çatdırmağa çalışan bir müəllif hesab edirəm. Əlbəttə, heç bir roman Xaqani kimi nəhəng şəxsiyyətin bütün dünyasını əhatə edə bilməz. Ancaq mən çalışmışam ki, «Sözün Xaqanı» vasitəsilə oxucunu onun həyatına, düşüncələrinə və yaradıcılığına daha yaxınlaşdırım.

– Sonda oxucularımıza və gələcək nəsillərə Xaqani ilə bağlı hansı fikirlərinizi çatdırmaq istərdiniz?

İstərdim ki, gələcək nəsillər Xaqanini yalnız dərsliklərdə adı çəkilən tarixi şair kimi tanımasınlar. Onun əsərlərini oxusunlar, düşüncələrini öyrənsinlər, sözünün dərinliyinə varsınlar. Çünki Xaqani zamanın sınağından çıxmış böyük sənətkardır. Mən «Sözün Xaqanı» romanını yazarkən məhz bu məqsədi qarşıma qoymuşam… unudulmayan bir adı yeni oxucu nəsilləri ilə yenidən görüşdürmək.
SÖZÜN XAQANI, SÖZÜN ÖZ YOLU VAR!

KİTAB HAQQINDA YAZILAR

Oxuyun >> Gözündə tük var

Zaur Ustacın şeirləri haqqında

YAZARLAR.AZ

I>>>>>>BU HEKAYƏNİ MÜTLƏQ OXU<<<<<<I

I>>Mustafa Müseyiboğlu adına kitabxana<<I