BİR ƏLƏ
(təcnis)
Ovu bərəsində vurmayan ovçu,
Ha çalışsa, ovu gəlməz bir ələ.
Adil hökmdarsan, ay Allah-taala
Möhtac qoyma, sən bir əli bir ələ.
Günəş sönüb, bənzər olub ay, ağa,
Bəxtim kimi qəddim düşüb ayağa.
Günahkaram, qur divanı, ay ağa,
Tök xəlbirə əməlimi, bir ələ.
Şiruyəyəm, barışmazdım yar ilə,
Mən ay dedim, vədə qoydu yar ilə.
Şərt bağlayıb, zər atanda yar ilə,
Uduzdurdum taleyimi bir ələ.
1970-ci il
Müəllif: Sərraf Şiruyə