Yamanca darıxdım yadın içində
Bu da son çərşənbə, yanır tonqallar
Odunlar ağlayır odun içində
Baxıram gözlərdə təbəssümlərə
Nə qəmlər gizlənir “şadın” içində?
Bir qışda ömürdən beləcə köçdü
Lalələr sevindi, güllər gülüşdü
Doğma elim Obam yadıma düşdü
Yamanca darıxdım yadın içində.
14.03.2023.
Müəllif: Murad Eloğlu
Oxuyun >> Gözündə tük var
Bayram qabağı
Sevən qovuşsun
Həsrət sovuşsun
Duyulmasın ahh
Hər evin Allah
Yansın ocağı
Bayram qabağı.
Bərəkət gəlsin
Göylərdən ensin
Hər ev isinsin
Hamı hər kəsin
Gülsün yanağı
Bayram qabağı.
Xalqım sevinsin
Fərəhlə dinsin
Sevib sevilsin
Ucadan gəlsin
Səsi-sorağı
Bayram qabağı.
Şöhrətim, şanım
Azərbaycanım
Nura boyansın
Hey dalğalansın
Gözəl bayrağı
Bayram qabağı.
Murad, ”asilər”
Umu-küsülər
Keçmişdə qalsın
Hər qəlbdə yansın
Ümid çırağı
Bayram qabağı.
11.03.2023.
Müəllif: Murad Eloğlu
Oxuyun >> Gözündə tük var
QADIN
Qadın kimdir?
Anadır
Bir mələkdir, sonadır
Dünya aləm bir yana
Analar bir yanadır.
Qadın kimdir?
Bacıdır
Başımızın tacıdır
Könlümüzün həmdəmi
Qəlbin ehtiyacıdır.
Qadın kimdir?
Qızımız
Baharımız, yazımız
Bizdən bezməz, usanmaz
Çox olsa da nazımızı.
Qadın kimdir?
Qadası?
Balamızın anası
Ömrünü fəda verər
Üzülməsin balası.
Qadın kimdir?
Məhəbbət
Abır, həya, ar, ismət
Qadınlar olmasaydı
Bəşər olmazdı əlbət.
Qadın kimdir?
Eloğlu
Bir qayğıya marağlı
Qadın olan ev ki var
Olar odlu ocağlı.
07.03.2023.
Müəllif: Murad Eloğlu
Oxuyun >> Gözündə tük var
YARAMAZ BƏXTİM
Mən onsuzda zəhmətimə güvəndim
Gül açmır açmasın yaramaz bəxtim
Vüsalın ummuram, barı kədərin
Dalınca qaçmasın yaramaz bəxtim.
Dünyaya gələndən qaradır, qara
Yolunu salmadı bir güllizara
Neynirəm ətrini bu yaşdan sonra?
Saçmırsa saçmasın yaramaz bəxtim.
Eloğlu ümidim qalıb Allaha
Qismətə gümanım qalmayıb daha
Bircə yol oyanıb üzü sabaha
Uçmursa uçmasın yaramaz bəxtim.
28.02.2023.
Müəllif: Murad Eloğlu
Oxuyun >> Gözündə tük var
Qardaş
Gəlmir səs sorağın neçə zamandır.
Olmaya küsmüsən məndən a qardaş?
Soyuqluq ucalıq gətirməz sənə
Uzaq dur məkirli kindən a qardaş.
Nə yaxşı varımsan, nə yaxşı varsan.
Var ikən yoxluqdur könlümü ‘sarsan’
Dünya dağılmaz ki halımı sorsan
Mən ki pay ummuram səndən a qardaş.
Çalınır ömrümün qocalıq sazı
Götürmür ürəyim, götürmür nazı
Gəncliyi, təpəri, baharı, yazı.
Ötürdüm ömürdən, gündən a qardaş.
Muradam, dağ boyda qəmim var mənim
Sevincdən, sevgidən kəmim var mənim
Bəs səndən səvai kimim var mənim?
Niyə dolanırsan gendən a qardaş?
24.01.2023
Müəllif: Murad Eloğlu
Oxuyun >> Gözündə tük var
Getmişdim Şəhidlər xiyabanına….
Getmişdim Şəhidlər xiyabanına
İlahi, nə igid oğullar yatır?
Gözlərdə parlayan nakam arzular
Yarımçıq dastanlar, nağıllar yatır.
Çiçəkli qəbirlər, əlvan məzarlar
Qürür mənbəyidir ,mərd ocağıdır
Burda alovlanan bu məşəl ki var
Vətən yanğısıdır, dərd ocağıdır.
Bir ana söykənib qəbir daşına
Yanır xısın- xısın alışır san ki
Bir ata əllərin qoyub başına
Daşla danışmağa çalışır san ki
Bir qardaş gözlərin dkib məzara
Şəhid qardaşına baxıb ağlayır
Bir bacı göz yaşın töküb məzara
Mərməri köksünə sıxıb ağlayır.
Oğulsan na məlum məzara yanma
Bu dəhşət önündə donub qalmışam
Mən onun adını bilmirəm amma,
Onun sayəsində azad olmuşam.
Sırayla düzülmüş naxışlı daşlar
Qoynunda kimləri saxlayır Allah?
Bu nurlu simalar,məsum baxışlar
İnsanın ürəyin dağlayır Allah.
Hər biri bir hünər səsi, səmiridir
Vətəni çiynində daşıyır onlar
Şəhidlərin ömrü Vətən ömrüdür
Nə qədər Vətən var yaşayır onlar.
Ömrünü xalqına qurban verənlər
Xalqın ürəyində yaşayacaqlar
Yenə doğulacaq ərlər, ərənlər
Vətən qeyrətini daşıyacaqlar.
Onlar fəda oldu müqəddəs haqqa
Şəhidlər ölməzdir, unudulmazdır
Nə qədər yazsaqda Şəhidlər haqda
Ay Murad, yenədə, yenə də azdır.
20.01.2023.
Müəllif: Murad Eloğlu
Oxuyun >> Gözündə tük var
Bacarma qızım…
Qızım, gəldiyimiz qoca dünyada
Allahdan özgəsi yetişməz dada
Lap dərdin özündən ağır olsada
Özün öz yükünü dartmağı bacar
Boynunu bükməyi bacarma qızım
Hər qədir bilməzin oduna yanma
Məğrur tut başını, əzilmə, sınma
Ehtiyac önündə aciz dayanma
Gecəni gündüzə qatmağı bacar
Göz yaşı tökməyi bacarma qızım
Səni sarsıtmasın hər acı, ağrı
Şux yaşa, parlasın xainin bağrı
Üz tut yoxuşlara zirvəyə doğru
Dizin qanasada çatmağı bacar
Diz üstə çökməyi bacarma qızım
Savab əməllərin çıx sorağına
Atanın, ananın dön fərağına
Yaxşılıq əkməklə ömür bağına
Hər kəsin könlünə yatmağı bacar
Yamanlıq əkməyi bacarma qızım
Ol təmiz adınla evin dirəyi
Murad eloğlunun budur gərəyi
Dərmanın olsada namərd çörəyi
Nəfsini cilovda tutmağı bacar
Gözünü tikməyi bacarma qızım
Boynunu bükməyi bacarma qızım.
17.12.2022.
Müəllif: Murad Eloğlu
Oxuyun >> Gözündə tük var
ÖZ DİLİM
Dəhşətdir, yurdumun gənc övladları
Nə öz dilin bilir, nə də özgəsin
Olmazmı bu gənclər ana dilimi
Ya heç danışmasın, ya da düz desin?
(X)ya (h) deyillər, (h)da (q) olub
Bu hansı modadır? Bu hansı dəbdir?
Öz dili dilində saralıb, solub
Özgə dil danışmaq sanır ədəbdir!
Mən demirəm özgə dil öyrənməyək
Deyirəm öz dilin düzgün danışaq
Özgənin oduna biz isinməyək
Özümüz od olaq, yanaq, alışaq.
Dil bilmək, öyrənmək, danışmaq olar
Gərək öz dilini unutmayasan
Özgəyə qaynayıb, qarışmaq olar
Gərək özününkün sən atmayasan.
Fizuli bu dildə qəzəllər deyib
Nizami bu dili yayıb aləmə
Ay Murad, bəlkə də düzələr deyib
Özüm öz dilimi aldım qələmə.
21.02.2022
Müəllif: Murad Eloğlu
Oxuyun >> Gözündə tük var
Murad Eloğlu (Məmmədli Murad Elburus oğlu ) 12 iyul 1988 – ci ildə Ağcabədi rayonu, Yeni Qaradolaq kəndində anadan olub. Əslən Ağdam rayonunun Yusifcanlı kəndindədən olan Murad ana tərəfindən Şəhrilidir.
Murad Eloğlu digər mənbələrdə:
Oxuyun >> Gözündə tük var
MƏN SƏNƏ NƏ NAĞIL DANIŞIM BALA?
Nağıl istəyirsən yatanda məndən
Fikirdən düşürəm mən haldan hala
Böyüyüb cırtdanlar, kiçilib divlər
Mən sənə nə nağıl danışım bala?
Çörəyə möhtacdır indiki divlər
Ehtiyac önündə dönüb hambala
Anasın bəyənmir o şəngülümlər
Mən sənə nə nağıl danışım bala?
Şüngülüm pullanıb, buynuzu çıxıb
Fatmalar dubayda pul demir pula
O tıq-tıq xanımın qunduzu çıxıb
Mən sənə nə nağıl danışım bala?
Göydən üç alma yox, indi daş düşür
Ayıq ol, altında kim qala-qala
İndiki keçilər qurdla döyüşür
Mən sənə nə nağıl danışım bala?
Yaman xəsisləşib qarı nənələr
Özləri möhtacdır bircə noğula
Getdi o Bəhlullar, o Danəndələr
Mən sənə nə nağıl danışım bala?
Qarğalar tülküyə aldanmır daha
Götürür pendirin, düzəlir yola
Keçəl tük axtarır düşüb tamaha
Mən sənə nə nağıl danışım bala?
Muradam, sən məndən nağıl dilədin
İstəyin gözümdə döndü suala
Rüşvətə satılır indi Ələddin
Mən sənə nə nağıl danışım bala?
06.04.2021
Müəllif: Murad Eloğlu
Oxuyun >> Gözündə tük var