Bir verilişdə Qəqəni ləqəbli döyüşçünün söhbətinə qulaq asdım. 15 yaşından döyüşən bu əsgər tez-tez sağ əliylə gözlərini tuturdu ki, ağladığı bilinməsin. Ancaq gözlərindən itirdiyi döyüş dostlarının sayı qədər yaş axdı. Onu ağladan dostlarının yoxluğuydu.
Xankəndi üzümü görüb gül açır, Neçə vaxtdı susan Şuşa dil açır. Hər kəndə-kəsəyə ellər yol açır, Ağlama, türk oğlu ağlaya bilməz.
Torpağım sevinir, daşım sevinir, Gədiyim sevinir, qaşım sevinir. Qurum çiçək açır, yaşım sevinir, Ağlama, türk oğlu ağlaya bilməz.
Ağdamın üstünə qaçın, nə deyir, Murovun yolunu açın, nə deyir. Kəlbəcər, Füzuli, Laçın nə deyir, Ağlama, türk oğlu ağlaya bilməz.
Orda Qubadlının gözü yol çəkir, Zəngilan, Cəbrayıl nəyə qol çəkir?! Ürəyim gül açır, dilim bal çəkir, Ağlama, türk oğlu ağlaya bilməz.
Demirəm o qanlı günləri unut, Başımın üstündən getmir ha bulud. Qurut gözlərinin yaşını, qurut, Ağlama, türk oğlu ağlaya bilməz.
Tanıqdı bu yerlər, bu göylər hələ, Hələ bizim deyil, çox şeylər hələ. Məni sakit qoymur gileylər hələ, Ağlama, türk oğlu ağlaya bilməz.
Qızlar oğul doğar, min eylər səni, Günəşsiz günlərə gün eylər səni. Gözləyir quzeylər, güneylər səni, Ağlama, türk oğlu ağlaya bilməz.
Hələ neçə kəndin yolu bağlıdı, Ora gedənlərin qolu bağlıdı. Sağın yiyəsi var, solu bağlıdı, Ağlama, türk oğlu ağlaya bilməz.
Havam varsa cəmi bir udum, sənsən, Düşməni yandıran buludum sənsən. Bu günə, sabaha umudum sənsən, Ağlama, türk oğlu ağlaya bilməz.
Orda Borçalı var, burda Dərbənd var, Savalan, Urmuya, Təbriz, Səhənd var. Dağılası neçə sərhəd var, bənd var, Ağlama, türk oğlu ağlaya bilməz.
Dirimiz igiddi, ölümüz diri, Yaşayır qəlbimdə onun hər biri. Amanın günüdü, ağlama, kiri, Ağlama, türk oğlu ağlaya bilməz.
Duydum niyə çatdın qaşını da mən, Saydım gözlərinin yaşını da mən. Uca tut, dik görüm başını da mən, Ağlama, türk oğlu ağlaya bilməz.
Dünyada çox işlər saxtadı, saxta, Nə inan taleyə, nə güvən baxta. Çox döyüşümüz var hələ qabaqda, Ağlama, türk oğlu ağlaya bilməz.
Ölən də bizlərik, qalan da bizlər, Doğru da bizlərik, yalan da bizlər. Şimşəyə dönürük dolanda bizlər, Ağlama, türk oğlu ağlaya bilməz.
“Bütün türk dünyasını 28 may münasibətilə təbrik edirəm. “Azərbaycan bayrağı” şeirim bu təbriklərə sözardı olsun.” İSLAM SADIQ
AZƏRBAYCAN BAYRAĞI
Ocaqlar hələ də od umur səndən, Qucaqlar hələ də ad umur səndən. Dodaqlar hələ də dad umur səndən, Ömrümün ən şirin sorağı mənim Sənsən, Azərbaycan bayrağı, mənim!
Qırmızın günəşin alovu, odu, Onunmu nuruydu, içimi yudu?! Könlümdə sevgilər göyərdən odu, Dünyamın işığı, çırağı mənim Sənsən, Azərbaycan bayrağı, mənim!
Yaşılın torpaqdı, çöldü, çəməndi, O yaşıl, bu yaşıl, həmən həməndi. Könlüm duyğu-duyğu onu əməndi, Ömrümün-günümün hər ağı mənim Sənsən, Azərbaycan bayrağı, mənim!
Düşərmi dilimdən mavinin adı, Udduğum havadı, içdiyim sudu. Həyatın mayası, sayası odu, Döyüşdə əlimin yarağı mənim Sənsən, Azərbaycan bayrağı, mənim!
Səhər başın üstdə ucalır günəş, Axşam ayağına alçalır günəş. Sən cavanlaşırsan, qocalır günəş, Ömrümün ən ölməz varağı mənim Sənsən, Azərbaycan bayrağı, mənim!
