Bir qaranlıq gecədə qorxmayasan deyə, Bu dəli sevgimizi fərəhlə övə-övə gələcəyəm yuxuna daş kimi yatan vaxtı. Dərdi, qəmi, qüssəni ağlından atan vaxtı. Bir mən olum, bir sən ol, Bir də şirin bir röya. Biz dünyadan xəbərsiz, bizdən də bütün dünya xəbərsiz ola-ola, O xumar gözlərinə Yavaşca dola-dola Gələcəyəm yuxuna. 20.12.2025.
MƏDƏNİYYƏTİN ALİ MƏQAMI – ETİRAF İnsanda təbii olan hər şey doğaldır, həm də gözəl. Uca Yaradanın lütfü olan və insanın da müdaxilə etmədiyi, əl gəzdirmədiyi xarici görünüşdən başlamış, daxili aləminə məxsus olan keyfiyyətlərinə qədər.
Çeşmənin gözündən axan dumduru, büllur, saf suya bənzər hal-xasiyyət kimi. Hiss və duyğuların xəfif bir titrəyişlə oyanışı, bu məqamda gülün tər-təzə ləçəklərinə toxunan ilk nəfəs təki… Bu gözəlliyi, paklığı duyaraq ürəkdolusu yaşamaq, etiraf etmək bəxtiyarlıqdır!
Bir də var, insanın özündən başlamış, ailəsi, dostu, yoldaşı – ümumən onu əhatə edən cəmiyyətə etirafı. Nədən qaynaqlanır, hansı zərurətdən yaranırsa yaransın, bütün hallarda etiraf etmək insanın kin-küdurətdən, riyadan-yalandan, göz-götürməzlikdən, paxıllqdan… azad olması, təmizlənib durulmasıdır. Əgər, bunu bacarırıqsa, nə xoş bizlərə!
Etirafı incəliyinə qədər dərk etməyin yolu qəlbimizdən keçir: əxlaqımızın, mədəniyyətimizin, etik davranışımızın mövcudi-məcmusundan. Ən ümdəsi, mənəviyyat aynasında qüsurumuzu, günahımızı görür və etiraf etməyi bacarırıqsa, eşq olsun bizi doğan analara!
Etiraf qəlb rahatlığıdır. Peşmançılıq ürəyindən dəyirman daşı kimi sallanıbsa, ondan azad olmaq – səhvini etiraf etmək dünyaya təzədən gəlmək kimidir…
Etirafın bir naxışı da ləyaqətdir. “Mən”in daşıdığı ləyaqət və səmimiyyətin meyarı etiraf… Varsa bunlar, hər addımda ona hazır olmalıyıq. İki şəxsin arasında olan ixtilafın yaratdığı küskünlük, anlaşmaya imkan verməyən eqo etirafın qarşısında maneədir, keçilməz səddir. Hətta, dövlətlər arasında mədəni əlaqələrin inkişafına əngəl olan, ona xələl gətirən iddialı münasibətlərin, düşmənçiliyin aradan qaldırılmasında belə, etiraf xalqlar arasında əmin-amanlığın qarantıdır.
Etiraf ailələr, tayfalar, dövlətlər, cəmimiyyətlər arasında sülhün təntənəsidir. Əl-ələ verib şərə, böhtana, acılara birlikdə qalib gəlməyin ipək yoludur.
Etiraf tərəflər arasında əyilməyən, sarsılmayan, sınmayan dostluqdur. Əgər bircə yol ona sarı gəldinsə, niyyətinə, istəyinə işıq çilədinsə, dost özünün şəfqəti, mərhrəməti, xeyirxahlığı ilə hər zaman yanındadı.
Etiraf etmək təbiəti, insanları sevərək, həzzi duyaraq yaşamaqdır. Bunu bacarırıqsa, aləm gözümzdə başdan-başa işıqdır, gözəllikdir, gözəllik. Demək ki etiraf bütün sevgilərin açarıdır, özü də qızıl açarı…
P.S. Yağışdan sonra göy üzü durulur, az sonra Günəş doğur, zərrin şəfəqlər bütün aləmə səpələnir, yer üzü gözəlliklə süslənir. Belə bir füsunkarlıq bütün canlıları ehtizaza gətirir. İnsan həyatının fövqündə ömrə zinət, təravət, lətafət bəxş edən duyğular oyanır. Bunlar romantika, səmimiyyət və mənəvi gözəlliyin etirafı, deyil, bəs nədir…
Realizm və absurd iç-içə (Zaur Ustacın “Gözündə tük var” novellası) Azərbaycan ədəbi mühitində çağdaş proza ənənələri müxtəlif səpkilərdə inkişaf edir. Bu mühitdə öz dəsti-xətti ilə seçilən, oxucu ilə birbaşa dialoqa girə bilən qələm sahiblərindən biri də şair-publisist, nasir və “Yazarlar” jurnalının baş redaktoru Zaur Ustacdır. Onun “Gözündə tük var” adlı novellası məhz bu kontekstdə meydana çıxan maraqlı ədəbi cəhd kimi qiymətlidir. Zaur Ustacın ədəbi fəaliyyəti çoxşaxəlidir. O, həm poeziya, həm publisistika, həm də nəsr sahəsində aktivdir. Onun yaradıcılığı milli-mənəvi motivlər, gündəlik həyatın detallarına estetik yanaşma və simvolik məna qatları ilə zəngindir. Yazarın “Gözündə tük var” novellası bədii mətn kimi bu fikri təsdiq edən ən gözəl nümunə hesab oluna bilər. Gündəlik həyatın içindən yüksələn bədii təsvirlər oxucuya yalnız bir hekayə deyil, həm də bir düşüncə dünyası təqdim edir. “Gözündə tük var” sadə, lakin metaforik dildə qələmə alınmış bədii mətndir. Novellada hadisə real ünsiyyət səhnəsində cərəyan edir: bir televiziya verilişinə qonaq çağırılan Hacı Fağır Naxırçıyev öz həyatına, keçmişinə və baxışlarına dair söhbət edir. Mətndə həm gündəlik həyatın məqamları, həm də simvolik element kimi “gözündə tük” motivi fəlsəfi-bədii məna daşıyır. Novellanın girişində canlı yayım konteksti yaradılır — buradan oxucuya real həyatla bədii məkanın üst-üstə düşməsi barədə siqnal verilir. Hacı Fağır “Gözündə tük” kooperasiyasının prezidenti kimi təqdim olunur və bu obraz həm komik, həm də dərin məna daşıyan bir personaj kimi çıxış edir. Bu personaj dünyagörüşü, peşə fəaliyyəti, ailə tarixi və şəxsi taleyi ilə oxucu qarşısında canlı insana çevrilir. Novellanın mərkəzi metaforik elementi — “gözündə tük” — simvolik olaraq insanın daxili baxışını, dünya ilə dialoqunu ifadə edir. Hacı Fağırın gözündəki tük sadəcə fiziki detal deyil; o, insanın idrak, arzular, niyyətlər və həyat təcrübəsi ilə bağlı fəlsəfi işarə rolunu oynayır. Belə motivlər müasir realist Azərbaycan ədəbiyyatında çox rast gəlinməsə də, Zaur Ustac bu motiv vasitəsilə oxucuya daha dərin və təsirli duyğular ötürməyi bacarır. Novellanın dili sadə görünə bilər. Lakin bu sadəlikdə bir tutarlılıq var. Zaur Ustac həm dialoq dilini, həm də gündəlik danışıq ləhcəsini bədii mətnin vahid ritminə çevirməyi bacarır. Beləliklə, o, real həyatdan alınmış elementləri ədəbi-simvolik kontekstə keçirir. Bu texnika bir növ magik realizmə yaxınlaşır: real hadisələrin içində absurd elementlərin ortaya çıxması oxucunu həm düşündürür, həm də güldürür. Novellada subyektivlik, insanın özünü təqdim etməsi və auditoriya qarşısında özünü reallaşdırması əsas mövzulardandır. Hacı Fağırın həyat hekayəsi — ailə problemləri, karyera yolu, laboratoriya işçisi ilə münasibətləri — sadəcə bir fərdin bioqrafiyası deyil; bu, həm də müasir cəmiyyətin gündəlik insanı necə formalaşdırdığına dair bir mikromodeldir. Bu baxımdan Zaur Ustac yazıçı kimi yalnız bədii təsvir yaratmır, eyni zamanda sosial psixoloji müşahidəsini də mətndə canlandırır. Novellada dialoqlar hadisələrin inkişafında aparıcı rol oynayır. Həqiqi televiziya proqramı çərçivəsində qurulan söhbətlər personajların dialoqları vasitəsilə həm informativ, həm də emosional profil yaradır. Bu yanaşma oxucunu mətnə daha yaxınlaşdırır və hadisələrin ritmini sürətləndirir. Ümumiyyətlə, Zaur Ustac öz yaradıcılığında poeziya, publisistika və nəsr üslublarını özündə birləşdirən vahid autentik bir məzmun formalaşdırmağı bacaran sənətkarlardandır. “Gözündə tük var” kimi novellalar onun bu cəhdinin aydın göstəricisidir. Bu əsər oxucu üçün yalnız əyləncəli mətn deyil, həm də həyatın absurd tərəflərinə dair əks-nümunə kimi çıxış edir. Mətn vasitəsilə müəllif həyatın kiçik, göründüyü qədər də sadə olmayan detalına diqqət çəkir və oxucu üçün geniş düşüncə sahəsi açır. Oxu>>> Gözündə tük var
Cəlilabadda şeir müsabiqəsinin II turu keçirildi Cəlilabad rayon Veteranlar Təşkilatı, Lənkəran-Astara Regional Təhsil İdarəsinin Cəlilabad sektoru və Lənkəran-Astara Regional Mədəniyyət İdarəsinin birgə təşkilatçılığı ilə bu gün (18.12.2025) Cəlilabad şəhər Heydər Əliyev Mərkəzində şagird və tələbələrin iştirakı ilə vətənpərvərlik ruhunda yazılmış şeirlərin ən yaxşı ifaçıları üzrə şeir müsabiqəsinin II turu həyata keçmişdir. Müsabiqənin bu mərhələsində münsiflər heyəti, Cəlilabad ədəbi mühitinin tanınmış simaları, şəhid ailə üzvləri və ictimaiyyət nümayəndələri yaxından iştirak etdilər. İlk mərhələdə müsabiqənin bu mərhələsinə yol tapmış 13 şagird və tələbə çıxış etdilər və münsiflərin verdikləri bal əsasında növbəti final mərhə üçün müəyyənləşdilər. Yeri gəlmişkən bildirmək lazımdır ki, bu gün Cəlilabad rayonunda keçirilmiş şeir müsabiqəsinin II turunda münsiflər heyəti aşağıdakılardan ibarət idi:
Cəlilabad Rayon Ağsaqqallar Şurasının üzvü, veteran pedaqoq, ədəbiyyatşünas, ziyaıl şair Zülfi Vellidağ;
Ədalət Salman (“Sözün işığı” mətbu orqanının baş redaktoru, AYB və AJB-nin üzvü, Cəlilabad rayon Veteranlar Təşkilatının sədri, “Həməşəra” və “Nizami Gəncəvi” Fəxri Diplomları laureatı, Prezident təqaüdçüsü, jurnalist, şair-publisist);
Müşahidə Nərimanova (Cəlilabad ədəbi mühitinin xanım nümayəndəsi, Cəlilabad MKS-nin əməkdaşı, kitabxanaşünas, “Həməşəra” Fəxri Diplomu laureatı, bədii qiraətçi, şair);
Arzu Əyyarqızı (Cəlilabad ədəbi mühitinin xanım nümayəndəsi, “Mirvarid Dilbazi Poeziya Məclisi İctimai Birliyi”nin üzvü və Cəlilabad rayonu üzrə rəsmi təmsilçisi, “Həməşəra” Ədəbi Məclisinin yaradıcısı və rəhbəri, “Zərif kölgələr” ədəbi saytının idarə heyətinin üzvü, “Həməşəra” və “Nizami Gəncəvi” Fəxri Diplomları və “Ziyadar” Mükafatı laureatı, AYB və AJB-nin üzvü, esseist, şair-publisist).
Ruhiyyə Abaszadə (Cəlilabad ədəbi mühitinin xanım nümayəndəsi, Azərbaycan Yazıçılar Birliyinin üzvü, “Həməşəra” Fəxri Diplomu laureatı, yazıçı-şair); Məlumat üçün qeyd etmək lazımdır ki, müsabiqənin son və final mərhələsi gələn həftə keçiriləcək və qaliblər mükafatlandırılacaq.
USTACAM Müzəffər ordunun şanlı əsgəri, Ərənlər yurdunun ər övladıyam! Zalımın zülmünə təhəmmülüm yox, Babəklər yurdunun hürr övladıyam! * * * Ustadım Nəsimi, sözümüz sözdü, Ədalət, həqiqət bağrımda közdü, Ziyadar dühası bir deyil, yüzdü, Mövlalar yurdunun nur övladıyam! * * * Dərvişəm, müqqəddəs sayılır təkkəm, Hülqumdan yuxarı dayanır öfkəm, Od, ocaq diyarı tanınır ölkəm, Alovlar yurdunun nar övladıyam! * * * Unutma, şah babam Xətai başdı, Nadir şah, mətədə tərpənməz daşdı, İlham, nə keçilməz sədləri aşdı, İgidlər yurdunun nər övladıyam! * * * Tarixdə Nəbisi, Koroğlusu var, Gen dünya yağıya daim olub dar, Düşmən qarşımızda yenə oldu xar, Aslanlar yurdunun şir övladıyam! * * * Göydən Yer üzünə ərmağan, payam, Gündüzlər Günəşəm, gecələr Ayam, Ən parlaq ulduzdan törəyən boyam, Ozanlar yurdunun sirr övladıyam! * * * Ustacam, vətənim vətən içində, Axıb duruluruq zaman köçündə, Min bir anlamı var, adi “heç”in də, Aqillər yurdunun pir övladıyam! 13.11.2020. Bakı.
Cəlilabadda kitab təqdimatı Bu gün (18.12.2025) Cəlilabad Mərkəzləşdirilmiş Kitabxana Sistemi və “Həməşəra” müstəqil, elmi, tarixi, mədəni və ictimai rüblük mətbu orqanının birgə təşkilatçılığı ilə Cəlilabad şəhər Mərkəzləşdirilmiş Kitabxana Sistemində (MKS) Cəlilabad ədəbi mühitinin xanım nümayəndəsi, “Həməşəra” və “Nizami Gəncəvi” Fəxri Diplomları laureatı, şair Sevinc xanım Şirvanlının “Həsrətimi çəkəcəksən” adlı yeni nəşr edilmiş şeirlər kitabının təqdimat mərasimi keçirildi. Vətən və dövlətçilik yolunda canını qurban vermiş əziz şəhidlərimizin xatirəsinə hörmət əlaməti olaraq bir dəqiqəlik sükutla başlayan tədbir rayonun tanınmış ziyalı simaları, Cəlilabad ədəbi mühitinin parlaq nümayəndələri və Cəlilabad MKS-nin əməkdaşlarının iştirakı, eyni halda fəlsəfə üzrə fəlsəfə doktoru, “Həməşəra” mətbu orqanının təsisçisi və baş redaktoru, Azərbaycan Jurnalistlər Birliyi və Azərbaycan Yazıçılar Birliyinin üzvü, yazıçı-publisist İlqar İsmayılzadənin aparıcılığı ilə olduqca səmimi və mənəvi aurada keçdi. Tədbiri öz nitqi ilə açan yazıçı-publisist İlqar İsmayılzadə ilk öncə Lənkəran-Astara Regional Mədəniyyət İdarəsinin Cəlilabad rayonu üzrə nümayəndəsi Fuad Əzizov və eləcə də Cəlilabad MKS-nin direktoru Qənimət xanım İsrafilovaya yaratdıqları şəraitə və ədəbi tədbirlərə verdikləri səmimi və təmənnasız dəstəyə görə təşəkkürünü bildirdi və rayonun ədəbi mühitinin müxtəlif ədəbi tədbirləri keçirmək üçün xüsusi bir otağa zəruri ehtiyacı olduğunu vurğuladı. O, sözünün davamında Sevinc Şirvanlını Cəlilabad ədəbi mühitinin 30 illik əməyi olan və öz imzası ilə şairlik bacarığını təsbit etmiş bir xanım nümayəndəsi olaraq təqdim edərək onun qələmə aldığı şeirlərin səlis, aydın və rəvan olduğu, eyni halda səmimiyyəti tərənnüm etdiyini bildirdi və yenicə nəşr olunmuş kitabı münasibəti ilə onu ürəkdən təbrik etdi… Ardınca tədbirdə iştirak edən rayon ziyalıları və tanınmış simaları: “Əmək zərbəçisi” və “Əmək veteranı” Hacı Paşa Rüstəmov, Azərbaycan Respublikasının Əməkdar mədəniyyət işçısı, kitabxanaşünas Cahangir Muradov, tanınmış pedaqoq Dadaş Bayramov və tanınmış bədii qiraətçi və pedaqoq Adıgözəl Nuriyev, şair Sevinc Şirvanlının anası Xanımgül ana, Cəlilabad rayonunda Təsviri incəsənət sahəsinin kraliçası kimi tanınan “Həməşəra” Fəxri Diplomu laureatı Laləzar Sadıqova, Cəlilabad MKS-nin əməkdaşı Zaur Hüseynli, Cəlilabad ədəbi mühitinin tanınmış nümayəndələrindən: Cəlilabad Rayon Ağsaqqallar Şurasının üzvü, veteran pedaqoq, ədəbiyyatşünas, “Həməşəra” Fəxri Diplomu laureatı, ziyalı şair Zülfi Vellidağ, AYB və AJB-nin üzvü, Prezident təqaüdçüsü, “Həməşəra” Fəxri Diplomu laureatı, yazıçı, şair-publisist Əfrahim Abbas, AYB və AJB-nin üzvü, “Sözün işığı” mətbu orqanının təsisçisi və baş redaktoru, Prezident təqaüdçüsü, Cəlilabad Rayon Veteranlar Təşkilatının sədri, şair-jurnalist Ədalət Salman, “Həməşəra” Fəxri Diplomu laureatları: bədii qiraətçi, şair Mikayıl İnçəçaylı, yazıçı-jurnalist Sakir Orduxanlı, şəhid qardaşı və yazıçı-şair Sakit Üçtəpəli və hərbi jurnalist, “Haqq.az” portalının əməkdaşı Zaur Talıblı, həmçinin, Cəlilabad ədəbi mühitinin xanım nümayəndələrindən “Həməşəra” Fəxri Diplomu laureatları: “Qızıl Qələm” Media Mükafatı laureatı, şair Gülşən Şahmuradlı, bədii qiraətçi və şair Müşahidə Nərimanova, şair Gülcahan Xürrəm, şair Seylan Abbas, “Mirvarid Dilbazi Poeziya Məclisi İctimai Birliyi”nin üzvü və Cəlilabad rayonu üzrə rəsmi təmsilçisi, “Həməşəra” Ədəbi Məclisinin yaradıcısı və rəhbəri, “Zərif kölgələr” ədəbi saytının idarə heyətinin üzvü, “Həməşəra” və “Nizami Gəncəvi” Fəxri Diplomları laureatı, AYB və AJB-nin üzvü, şair-publisist Arzu Əyyarqızı və “Həməşəra” Fəxri Diplomu laureatı, yazıçı-şair Atlaz Rzayi öz çıxışlarında Sevinc Şirvanlı poeziyasından söz açaraq onun poeziya aləmindəki dəsti-xətti və səmimiliyindən, eləcə də əxlaqi keyfiyyətlərə malik olmasından söz açaraq yenicə nəşr edilmiş şeirlər kitabı münasibəti ilə onu təbrik etdilər. Tədbirin sonunda çıxış edən “Həməşəra” və “Nizami Gəncəvi” Fəxri Diplomları laureat, şair Sevinc Şirvanlı təşkil edilmiş təqdimat mərasiminə görə təşkilatçılara və tədbir iştirakçılarına öz səmimi minnətdarlığını bildirdi. Çay süfrəsi ətrafında keçirilən səmimi tədbirdə Sevinc xanımın Zeynəb, Zəhra və Aydan adlı üç əziz qız övladı onun şeirlərindən qiraət edərək tədbir iştirakçılarının alqışı ilə qarşılaşdılar. Tədbirin yekun mərhələsində “Yazarlar” Jurnalının baş redaktoru, AVMVİB-nin, AJB və AYB-nin üzvü, “Qızıl Qələm” Media Mükafatı laureatı, Prezident təqaüdçüsü, tanınmış nasir, şair və publisist Zaur Ustac tərəfindən Cəlilabad ədəbi mühitinin bir neçə xanım nümayəndəsinə təqdim etdiyi “Ziyadar” Mükafatı (Fəxri Fərman və döş nişanı) Sevinc Şirvanlı, Arzu Əyyarqızı və Atlaz Rzayiyə təqdim edildi. Tədbir xatirə şəkillərinin çəkilməsi ilə tamamlandı.
GÖZ ÜSTƏ – Qurbandı sənə Bu şirin canım, Sənsən əzəldən Dinim, imanım. – Çox sağ ol, dostum, Bilirsən nə var?.. Bircə aylığa bir az borc… olar? – Eh, pul nədir ki, Məndən can istə. Pul can deyil ki, Deyəm göz üstə.
ZƏNGLİ SAAT Sübhdən elə bağırır Maşınlar dar dalanda… Susub zəngli saat da Mat qalır həmin anda.
«Rуsca – Turqcə Lugət» Cild I və cild II. Baqь. Azərnəзr, 1928 – 1929. (Bakı, Azərnəşr) Birinci təb`i. (Birinci nəşri) Sajь 10400. (Sayı) Ölçüləri 270 x 180 mm. Nəşrin redaktoru Ruxulla Axundov. İki cilddə.
Ruhulla Əli oğlu Axundov (1 (13) Yanvar 1897, Şüvəlan, Bakı qəzası – 21 Aprel 1938, Kommunarka poliqonu, Moskva vilayəti) – dövlət və partiya xadimi, publisist, alim. Xalq düşməni elan edilərək qüllələnəndən sonra bu nəşrlərin əksəriyyətinin titul vərəqləri uzərindən onun adı qaralanıb və ya kəsilib.
Bu kitablar repressiya illərinin şahidi və qurbanıdır. 1936-cı ildən normativ sənədlərdə dövlət dili Azərbaycan dili qeyd edilir. Moskva hakimiyyəti Türk olmağımızı özünə təhlükə hesab edərək bizi azərbaycanlı adlandırmağa məcbur olub. Həmin vaxtdan bu kitablar geniş istifadədən yığışdırılıb.
