“CƏNUB MİRVARİSİ” layihəsi çərçivəsində “Sım Turu” baş tutdu
16 avqust 2026-cı il tarixində “Təxəyyül Art Group”un təşkilatçılığı ilə “Cənub Mirvarisi” layihəsi çərçivəsində Salyan və Astara rayonlarını əhatə edən, möhtəşəm Sım şəlaləsinə səyahəti nəzərdə tutan “Sım Turu” adlı yaradıcılıq və istirahət səfəri təşkil olundu.
Səfərin ilk dayanacağı Salyan rayonunda yerləşən “Xan Süfrəsi” restoranı oldu. Burada iştirakçılar üçün səhər yeməyi təşkil edildi. Səhər yeməyindən sonra qrup üzvləri Azərbaycanın cənubunun füsunkar təbiəti ilə seçilən Astara rayonunun Sım kəndinə və məşhur Sım şəlaləsinə doğru yola düşdülər.
Uzun və maraqlı dağ yolu boyunca dörd Niva avtomobili ilə hərəkət edən iştirakçılar “Ağ körpü” üzərindən keçərək Sım kəndinə çatdılar. Buradan isə yağışlı və palçıqlı hava şəraitinə baxmayaraq, “Cənub Mirvarisi” adlandırılan möhtəşəm Sım şəlaləsinə doğru yürüşə başladılar.
Yağışlı hava və çətin yol şəraiti səfərə xüsusi macəra və rəng qatdı. İştirakçılar təbiətin yaratdığı çətinliklərə baxmayaraq, yürüşü davam etdirərək şəlaləyə çatdılar. Sım şəlaləsinin möhtəşəm mənzərəsi və ətraf təbiətin gözəlliyi səfərin ən yaddaqalan anlarından birinə çevrildi.
Şəlalə gəzintisindən sonra iştirakçılar Astara kəndində yerləşən marketdən alış-veriş etdilər, təndir çörəyi aldılar və daha sonra “Ümid” ailəvi istirahət mərkəzinə yollandılar. Burada birlikdə nahar edildi. Nahardan sonra isə istirahət mərkəzinin həyətində musiqi sədaları altında şən və pozitiv rəqslər təşkil olundu. Musiqi, rəqs və xoş söhbətlər səfərə xüsusi ovqat qatdı.
Günün sonunda qrup yenidən Salyana qayıdaraq “Xan Süfrəsi” restoranında axşam çay süfrəsi ətrafında bir araya gəldi. Burada səfərin yekun tədbiri keçirildi. Bütün iştirakçılara iştirak sertifikatları təqdim olundu. Şən musiqilər səsləndirildi, rəqslər edildi, şairlər öz şeirlərini səsləndirərək gecəyə xüsusi poetik ab-hava bəxş etdilər.
Beləliklə, “Sım Turu” xoş ovqat, səmimi dostluq və gözəl xatirələrlə yadda qalan bir səfərə çevrildi.
Bu gözəl və yaddaqalan günün təşkilinə görə “Təxəyyül Art Group”un rəhbəri Natiq Nəcəfzadəyə və qrup müavini Vüsalə Yunusovaya bütün iştirakçılar adından təşəkkürümüzü bildiririk.
Səfərin əsas məqsədi yalnız Azərbaycanın gözəl təbiətini kəşf etmək deyil, eyni zamanda sənət adamlarını bir araya gətirmək, dostluq və yaradıcılıq münasibətlərini möhkəmləndirmək, birlikdə xoş və unudulmaz anlar yaşamaq idi.
Səfər zamanı çəkilən fotoşəkillər Nofəl Ümid tərəfindən xatirə olaraq lentə alındı.
“Təxəyyül Art Group” — sənət, dostluq və gözəl xatirələrin bir ünvanı!
Məqaləni yazdı: Qənirə Əsgərova
Redaktə etdi: Vüsalə Yunusov
Xatirə fotolarının müəllifi: Nofəl Ümid
Saytlarda yerləşdirdi: Cəmilə Əsgərov, Zaur Ustac
Oxuyun >> Gözündə tük var
Zaur Ustacın şeirləri haqqında
