Gəl səni bağrıma basım, Təbrizim
Hana qur, sinəndə toxu, himnimi,
Gerçək say dilində, yuxu himnimi.
Qaldır bayrağımı, oxu himnimi.
Heç nədən çəkinmə, qorxma, əzizim,
Gəl səni bağrıma basım, Təbrizim.
Yerə haram qatıb “halal” etdilər ,
Səni tapdalayıb işğal etdilər.
Yarana duz basıb, xal-xal etdilər,
Vətən yollarında silinməz izin,
Gəl səni bağrıma basım, Təbrizim.
Qəlbinə ən yaxın sən bizi saydın,
Özünü Bakının varisi sandın.
Sözünü vətənə tamarzı sandın,
Bükülməz qolunam, qatlanmaz dizin,
Gəl səni bağrıma basım, Təbrizim.
Bir yumruq kimiyik, neçə dilliyik,
Biz bir obalıyıq, biz bir elliyik.
Demə ki Mərəndli, Ərdəbilliyik,
Biz də sizlərinik, sizlər də bizim,
Gəl səni bağrıma basım,Təbrizim.
Dinim imanımsan, həyam arımsan,
Səslənən sazımsan, dinən tarımsan,
Qəlbi şeir dolu Şəhriyarımsan,
Dünyaya səs salan milyonlar bizim
Gəl səni bağrıma basım,Təbizim.
Getdi sevincimiz, qaldı vay bizə,
Gah o tay dedilər, gah bu tay bizə.
Vətən hər tərəfdən verdi hay bizə.
Göstər düşmənini, başını əzim,
Gəl səni bağrıma basım, Təbrizim.
Gah mənim qışlağım, gah aranımsan,
Sirli,möcüzəli bir Quranımsan,
Bakımsan, Gəncəmsən Lənkəranımsan,
Qoy gəlim yanına, qoynunda gəzim
Gəl səni bağrıma basım, Təbrizim!
Müəllif: Şahin Həmidi
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru