Etiket arxivi: Hər şeirə bir şeir

Qəndab – Qurban

QURBAN

Gəlintək bəzənib yolunda durram,
Gözlərəm yolunu hər səhər-axşam,
Bir kəlmə sözündən min xəyal qurram,
Mənə ilham verən selinə qurban!

Həsrətin çəkmişəm illər boyunca,
Başımı sinənə gəlib qoyunca,
Oxşa saçlarımı, oxşa doyunca,
Zərif barmağına, əlinə qurban!

Sən elə qiymətli, əzizsən mənə,
Dünyanı dəyişməm bircə telinə.
Məni sevdiyini Sən də de mənə,
Yalandan olsa da, dilinə qurban!

Unudub dünyanın dərdi-sərini,
Sən düşsən cənnətin gül bucağına,
Bircə gül qoparma, bircə gül qırma,
Qurumuş olsa da, gülünə qurban!

Müəllif: QƏNDAB

QURBAN

(Qəndab – Qurban)

Kölgən düşən yeri türbətlik billəm,
“Qurban”ı yazdığın əlinə qurban.
Ayda da dayanıb, “Gəl!” – desən, gəlləm,
Nabatdan yonulmuş dilinə qurban.

Qıymaram gözlərin qala yollarda,
Min bəla fırlanır sağda, “sol”larda,
Rəvamı yer gəzə özgə qollarda,
Gəlintək bəzənmiş belinə qurban.

Ustacam, səsimi batırıb qəhər,
Sənsiz nəfəs alsam, qoy olsun zəhər,
Oxşaram zülfünü hey axşam, səhər,
Müşki-ənbər qoxan telinə qurban.

29.04.2026. Bakı.

Müəllif: Zaur USTAC

AYB və AJB-nin üzvü, “Yazarlar” jurnalının baş redaktoru, şair-publisist, tərcüməçi-nasir