Ruhun şəfalanması
Yer öz oxu ətrafında dönmür daha,
Sən gələndən gecələr də gündüz oldu.
Hamarlandı kələ-kötür bütün yollar,
Qədəmlərin dəyən hər yer dümdüz oldu.
Dəyişdin bu təbiətin qanununu,
Bir insana uçmaq üçün qanad verdin.
Sudan çıxmış, can üstündə bir balıqdım,
Ürəyinə alıb yeni həyat verdin.
Tərsə döndü çərxi Günəş sisteminin,
Hisslərinlə yeni dövr hasil etdin.
Fələyə də ram olmayan bu qadını
Öz sevginə bir ömürlük əsir etdin.
Milyonillik qaranlıqlar yoxa çıxdı,
Günəş doğdu bu küləklər şəhərinə.
Nəfəsinlə şəfalandı yaralı ruh,
Məlhəm oldun tənhalığın zəhərinə.
Keçmişimin izlərinə süngər çəkib,
Boz ömrümə sən rəngində yol dilədim.
Gəlişinin şərəfinə şeir süzdüm,
Sevgimizi misralarda qeyd elədim.
-
- 2026
- 2026
Müəllif: SEVİL GÜL NUR
Oxuyun >> Gözündə tük var
Zaur Ustacın şeirləri haqqında