ÖMRÜMƏ BİR PAYIZ HAVASI GƏLİB
Uzun yaşamağa yoxdur gümanım,
Ömrümə bir payız havası gəlib.
Bu qədər ağrıya tab etmir canım,
Ömrümə bir payız havası gəlib.
Coşmur əvvəlkitək damarda qan da,
Arzu ha yandadır, ürək ha yanda?
Bir işıq sozalır qırxdan o yanda,
Ömrümə bir payız havası gəlib.
Qəmlər ürəyimi elə yeyir ki,
Üzü qocalığa yoxdur xeyir ki.
Saçıma ələnən dən də deyir ki,
Ömrümə bir payız havası gəlib.
Kəsibdir önünü qarlı qış elə,
Düzəlməz düşübsə bu qırış, elə,
Aynur, dur toparlan, yır-yığış elə,
Ömrümə bir payız havası gəlib.
Müəllif: Aynur Qafarlı
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru