Etiket arxivi: SEVGİ

AYŞƏN RƏHİMİN ŞEİRLƏRİ

Ayşən Rəhim – gənc yazar.

SALAM
Gəl, Sən Allah üzürlü say
Buralar tör-töküntüdür
Gözlə açım pəncərəni
Hə Otaq biraz bürküdür.
Bu nəhəng təkliyim səni
Deyəsən yaman hürküdür.
* * *
Əsl qadın faciəsi
Tozlu pəncərə şüşəsi
Dəhlizin ortasındadır
Dağılmış bir zibil qabı
Cırılmış iki-üç şəkil
Çərçivənin sınıqları
Parçalanmış qırmızı don
Və dikdaban ayaqqabı..
* * *
Sükut, vahimə , kölgələr
Dualar çarmığa çəkir
Ümidləri , intiharı ..
Qürur geyinir əzabı
Yalnızlığın taleyimdə
Yaratdığı iltihabı..
* * *
Xatirələr guruldayır
Yağış yağır damır tavan
Zamanın çatlarında qan..
Biraz asta gəz nə olar
Xatirələr oyanacaq
Və qarşında utanmadan
Ağrıları soyunacaq…
* * *
Ayağını qanadacaq
Son arzunun çilikləri
Və anamı ağladacaq..
* * *
Bilirsənmi? sükut səsi
Adamı lap dəli edir
İntəhasız tənhalığın
Darıxmağın iniltisi .
* * *
Bir də gecə olan kimi
Bu itlərin ulaması
Xatirənin tikan kimi
Bədənimi dalaması …
* * *
Hərdən , vahiməli olur
Ayrılıq da udur məni
Bir söz deyim amma gülmə
Düz başımın üstündəki
Bu eybəcər Mona Liza
Hə o da qorxudur məni ..
* * *
Ay yad adam , getmə dayan
Bir çay qoyum , təzə dəmlə
Elə adamsızlaşmışam ..
İstəmirəm itirməyi.
Axşamacan dərdləşirik
Bir mən bir də qara pişik ..
yox onun günahı deyil
Talemin tərs gətirməyi ..

SALAM ƏZİZİZM
Salam əzizim… burda yenə gecədir
Yazıram ki , soruşum Görən halın necədir?
Bircə nigaran qoyma ..bir kəlmə də olsa yaz
Özünə yaxşı bax ha eşitdim ki, soyuqdur
Qalın geyin əynini..
Tamam yadımdan çıxıb,ağlım çaşıb bağışla
Axı sən xoşlamırdın anan kimi danışıb
Qayğını çəkməyimi..
* * *
Nə yeyib nə içirsən?
Yoxsan getmisən bil ki ,gündə ən azı min yol gözlərimdən keçirsən..
İstəmirəm korlayım əhvalını amma ki
Heç özümdə deyiləm..
Yediyim dərddir ancaq, içdiyimsə zəhərdir
Sənsiz məni yaşadan bir quru xatirənsə həsrətində gecələr öldürən bu qəhərdir.
* * *
Ax üşüdür səsinin buz kimi soyuqluğu
Titrəyirəm..tənhalıq iliyimə işləyir
İsti hərarətinlə hansı heykəl baxışa
Ruh üfürdün görəsən?
Yenə hava küləklidir ,üşüməli küləkdir
Gözəl günlər səninlə getdi xatirə olub
Bilirəm ki heç zaman geri gəlməyəcəkdir
Deyirəm ki ,biləsən..
* * *
Payladım ən sonuncu əlvidamı hardasa
Məni yalnız buraxma vidaları sevmirəm
Gəl yenə əvvəlkitək köksünə sıx , qucaqla
Allahhaqqı saçlarım çiynin üçün darıxır
Kəsmirəm heç dəymirəm uzadıram acıqla.
* * *
Bu sərsəri duyğular..yox heç tanış deyildi
Səndən əvvəl o adamın gözü də yaş deyildi
Saçı da payız idi , o balaca qız idi
Sərçətək kövrək idi ürəyi daş deyildi..
Hələ ömrün yazıydı , hələ də qış deyildi..
* * *
İndi bu boz şəhərin bütün küçələrində
Sənin ayaq izlərini baxışlarım yalayır
Hamıya sevgi düşdü, payımasa tənhalıq
“Xalqa it hürüyəndə, mənə çaqqal ulayır”

XATİRƏLƏR
Keçmişin rəflərində itib-batmış xatirələr
Unutmaq zəncirini qırıb
Yapışır darıxmağın yaxasından..
Və vəhşi vüsalın əlləri
ayrılığın ayaqlarını qapır..
Tale xətləri ovucumun qırışlarına hopur
Və qopur ömrümün əqrəbləri saatdan
Əskilir təqvimlər.
Dəhlizin divarlarında son ümid rəqsilə
Tənhalaşır kölgələr.
İndi bu qurumuş cümlələr
Vergüllərə dönən nöqtələrlərlə
Epiloqda bitəcək
Sonuncu səhifədə son sətrinlə..
Neçə güzgüdə ayaqlarını sındırıb arxanca qaçdı baxışlar.
Neçə ip utandı
zaman asarkən
Arzuları boğazından..
Kitabarası qurudulan kəpənəklərin ölü gözəlliyi kimi
Gözəldir təkliyim.
Ehtişam,
İki şam,
Dörd divar ,
Boş otaq fəlsəfəsi
və köhnə grammafonda retro..
Təbəssüm gizlənən dolu qədəh
və Freda kahlo:
“İçimdə qırx qadın
Qırxı da özgə
Qırxı da digəri”.

Müəllif: Ayşən RƏHİM

AYŞƏN RƏHİMİN DİGƏR YAZILARI

Ayşən RƏHİM DİGƏR MƏNBƏLƏRDƏ

PDF>>>ZAUR USTAC UŞAQ ŞEİRLƏRİ

PDF: >>>>> ZAUR USTAC “QƏLƏMDAR-2”

PDF>>> ZAUR USTAC “BB” KİTABI

>>>> ƏN ÇOX OXUNAN HEKAYƏ <<<<

ZAUR USTACIN SATIŞDA OLAN KİTABLARI


YAZARLAR.AZ

===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

ZAUR USTAC – GÜLÜM ŞEİRİ

ZAUR USTACIN SATIŞDA OLAN KİTABLARI

GÜLÜM
Bir ümid həsrəti boylanır yenə,
Qəlbimin ən dərin qatından, gülüm.
Yaradan payıdır, ruhun çeşməsi,
Qaynayır dilimin çatından, gülüm.
* * *
Şükür Yaradanın məsləhətinə,
Heç vaxt mindirməyib nəfsin atına,
Çox salıb toyuna, ya büsatına,
Hər zaman qoruyub matından, gülüm.
* * *
Bu qədim yapının, gedişi bəlli,
Gəlişli qapının, gedişi bəlli,
Şahının, topunun gedişi bəlli,
Ustacın qorxusu, atından gülüm…
06.04.2020. Bakı.
Müəllif:  Zaur Ustac

YAZARLAR

PDF>>>ZAUR USTAC UŞAQ ŞEİRLƏRİ

PDF: >>>>> ZAUR USTAC “QƏLƏMDAR-2”

PDF>>> ZAUR USTAC “BB” KİTABI

>>>> ƏN ÇOX OXUNAN HEKAYƏ <<<<

ZAUR USTACIN SATIŞDA OLAN KİTABLARI


YAZARLAR.AZ

===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

XATİRƏ RƏHİMBƏYLİ – SƏNİ SEVMƏK GÜNAHMIŞ…

XATİRƏ RƏHİMBƏYLİNİN YAZILARI

XƏBƏR ÇATDI?..
Xəbər çatdı axır sənə?Gülürsən…
Üsyan edib göz yaşımı devirdim.
Sən nə deyib unutmusan,bilmirəm,
Mən ki səni əziz bilib sevirdim.
* * *
Fikir vermə,öyrənmişəm dilini,
Danışıram gah ağacla,gah quşla.
Buraxmışam ta başını
Kölgəmi
Sən ürəklə gah qılıncla,gah daşla…
* * *
Başqa cürə düşünür ta adamlar,
Belə sevmək,belə yazmaq günahdı.
Ayrılığa amma düşmür gecələr,
Ürəyimiz açılmayan sabahdı…
* * *
Ləngər verdi,çalxalandı bu dünya,
Hərə tutdu bir ətəyin ücündan.
Ah,neyləyim,bu sevdadan qopmadım,
Kim qopdusa,ruhu ölür acından…
Xəbər çatdı axır sənə?…

SƏNİ SEVMƏK GÜNAHMIŞ…
Səni sevmək günahmış ,
Suç üstdə yaxalandım …
Bir dəlil-sübut kimi
Alındı eşqim , andım …
* * *
İllər uzunu çəkdi
Araşdırma ,təhqiqat .
Ən ağır cəza kəsdi
Mənə bu zalım həyat
* * *
Qəmin boynumda zəncir ,
Mənə məhbəsdir komam .
Eh,o gündən ömürlük
Yaşamağa məhkumam

HARDASAN?!
Adını çəkə bilmirəm,
Ay ismi-pünhan, hardasan?!
Axır məni öldürəcək
Bu dəli hicran, hardasan?!
* * *
Sanma bu üsyan yatacaq,
Əğyar əhdinə çatacaq…
Bir gün səni də tutacaq,
Vallah nahaq qan, hardasan?!
* * *
Gəlsin ürəyimə qadan,
Niyə kəsilib səs-sədan?!
Ürəyimi atıb-tutan,
Fırtına, tufan, hardasan?…
* * *
Yarı yalan,yarı gerçək,
Yarısı daş ,yarı ürək.
Yarı şeytan,yarı mələk,
Ay yarı insan, hardasan?!
* * *
Bu sevda sevdalar xası,
Yox qurtuluşu, xilası…
Adın dilimin duası,
Ay…ismi-pünhan, hardasan?

NAHAQ
Nahaq qarğımışam taleni baxtı ,
Tanrının bildiyin bir kimsə bilməz !
Bu ilahi sevgi , bu ilahi eşq
Qovuşsaq, olmazdı belə müqəddəs
* * *
Bilmirəm savabdı, günahdı yoxsa,
Bağrımın başında bir nisgilim var.
Hamıdan küsəndə xəyalı ilə
İxtilat qurduğum bir sevgilim var!
* * *
Yox insana belə məhəbbət olmaz
Tanrının adından biriymiş adın
Mən Haqqın yolundan çıxa bilmirəm
Adından dönməyi min yol sınadım
* * *
…Nahaq qınamışam taleni, baxtı …
Tanrının bildiyin bir kimsə bilməz!
Bu ilahi sevgi, bu ilahi eşq
Qovuşsaq ,olmazdı belə müqəddəs..

GÖRDÜN?
Gördün? Ömrü boyu məni qandırıb,
ömrün nağılında dörd dolandırıb,
elə it hürdürüb, işıq yandırıb,
Divə ürcah etdi bu yollar məni…
* * *
Qatdılar başımı dərs oxumaqnan,
savab işlər görüb, günah yumaqnan.
Demədilər, bir gün bir haqsız “Yox!”nan,
zalımlar qaya tək oyallar məni…
* * *
Atıb ovcundakı bu xəzəlləri,
mənim də gül açar görən əllərim?
Görən hayandasa görünər yerim?
Görən mən deyən tək duyallar məni?
* * *
Dartıb-daşısam da aranı dağa,
bir arzum salamat çıxmır sabaha!
Tanrım, niyə rahat buraxmır daha,
bu yiyəsi ölmüş xəyallar məni…

HƏR DƏFƏ…
Hər dəfə gəlirəm ziyarətinə,
Eşqimə qoyulan ay xəyal heykəl
Çatlayan bağrımın duyğulariyla
Bircə yol xınalan , nolar, lal heykəl!
* * *
Üstündə atılıb- düşürsən elə ,
Eşqin göy qurşağı gen ürəyimdə .
Gecəylə, gündüzlə firlanma çox da ,
Ürəyim səndədir , sən ürəyimdə !
* * *
Dərya gözlərimin ay üzən buzu ,
Dəyəmməz telinə min qəm günəşi.
Üşaq ürəyimin say çöpləridir
Həsrətin üstümə qıcanan dişi ….

DOST OLDUM
Sevdiyin şeirləri əzbərlədim,
Bəyəndiyin mahnıları öyrəndim…
Dəyər verdiyin insanlarla dost oldum.
Aldığın nəfəs canımdı,
Verdiyin nəfəs nəfəsim.
Gözlərin rəssamımdı,
Gülüşün həkimim.
Qalxdığın dağlar qibləm oldu.
Gəzdiyin çəmənlər cənnətim.
Ahh indi “unut” deyirsən,
Nədir niyyətin?!

Müəllif: Xatirə RƏHİMBƏYLİ

XATİRƏ RƏHİMBƏYLİNİN YAZILARI

PDF>>>ZAUR USTAC UŞAQ ŞEİRLƏRİ

PDF: >>>>> ZAUR USTAC “QƏLƏMDAR-2”

PDF>>> ZAUR USTAC “BB” KİTABI

>>>> ƏN ÇOX OXUNAN HEKAYƏ <<<<

ZAUR USTACIN SATIŞDA OLAN KİTABLARI


YAZARLAR.AZ

===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

GECƏNİN BİR ALƏMİ… – Eldar BAXIŞ

ELDAR BAXIŞIN YAZILARI

GECƏNİN BİR ALƏMİ…
Sonra nə oldusa, yadıma gəlmir,
Onu bilirəm ki, qanım qaynadı.
Onu bilirəm ki, ruhum oynadı,
Sonra nə oldusa, yadıma gəlmir.
* * *
Tez durub geyindim, çıxdım küçəyə,
Küçə sizə sarı çəkirdi məni.
Ulduz sizə sarı, ay sizə sarı,
Gecə sizə sarı çəkirdi məni.
* * *
Gecədən, ulduzdan, aydan da betər,
Ürək sizə sarı çəkirdi məni.
Fələyə nə deyim, tutub qolumdan,
Fələk sizə sarı çəkirdi məni.
* * *
Küçənin, gecənin, ulduzun, ayın,
Ürəyin sözündən çıxa bilmədim.
Tanrının sözündən çıxa bilmədim,
Fələyin sözündən çıxa bilmədim.
* * *
Alnıma toxundum, gördüm tərləyib;
Dodağıma baxdım, uçuqdu gördüm.
Bütün darvazalar gördüm bağlıdı,
Sizin darvazanız açıqdı gördüm.
* * *
Keçdim darvazadan, çıxdım həyətə,
Arzu, istək məni yaxalamışdı.
Ulduz oyaq idi, ay oyaq idi,
Tanrı oyaq idi göyün üzündə…
Qapınızın zəngi yuxulamışdı.
* * *
Qapını oyatdım, zəngi oyatdım,
Oyatdım yuxudan zəngin səsini.
Daha düşünmədim, fikirləşmədim
İşin avandını, işin tərsini.
* * *
İş belə oldu ki, zəngin harayı,
Yuxudan yarımçıq qaldırdı səni.
Durna qatarında uçub gedirdin,
Durna qatarından saldırdı səni.
* * *
Sən oyanan kimi, sən duran kimi,
Əllərin oyanıb qalxdı yuxudan.
Yastığın üstünə sərilib qalan,
Tellərin oyanıb qalxdı yuxudan.
Çiyinlər oyandı -pambıq çiyinlər;
Addımlar oyandı- kövrək addımlar.
* * *
Nə gözəl olurmuş, Allah, yuxudan
Yarımçıq duranda gözəl qadınlar.
Həmişəki kimi “eşş” eləmədin,
Bir sözü çevirib beş eləmədin,
Sağını-solunu eşələmədin,
Yüyürdün qapıya, çatdın qapıya.
* * *
Uzandı işığa süd barmaqların,
Evin süd işığı alışdı, yandı.
Sonra nə oldusa, yadıma gəlmir,
Sonra vaxt dayandı, zaman dayandı.
* * *
Sonra söndü evin süd işıqları,
Elə bil əridi, çürüdü, getdi.
Ulduzun yanına, ayın yanına,
Tanrının yanına yeridi getdi.
* * *
O süd işığından nə qaldı bizə?
Ağ yastıq, ağ döşək, ağ yorğanüzü.
Sənin baxışının odu, alovu,
Mənim baxışımın çınqısı, közü.
Od-oda qarışdı, alov-alova,
Köz-közə qarışdı, çınqı-çınqıya.
* * *
Əl ələ qarışdı, barmaq barmağa,
Dil dilə qarışdı, yanğı yanğıya.
Sən mənə dedin ki, lap elə belə?
Mən sənə dedim ki, lap elə belə.
* * *
Bu mənim telimdi, bu sənin telin.
Axtara bilirsən, tapa bilirsən,
Axtar elə-belə, tap elə-belə.
* * *
Gecə çırpınırdı, gecə əsirdi,
Gecə titrəyirdi, nə titrəyirdi,
Sinəmiz gecəni: -bu xoş keçəni
Bir daş ütü kimi ütüləyirdi.
* * *
Gecənin sümüyü sürmə olmuşdu,
Dişinə dəyirdi dişi gecənin.
Bütün qitələri bölüşdürmüşdük,
Biri bizim idi, beşi gecənin.
* * *
Sonra nə oldusa, yadıma gəlmir,
Onu bilirəm ki, səhər açıldı.
Onu bilirəm ki, əlim səyridi,
Açıq pəncərədə baxdım səmaya
Tanrı bizə baxıb gülümsəyirdi…

İlkin mənbə: edebiyyatqazeti.az

Müəllif: Eldar BAXIŞ

ELDAR BAXIŞIN YAZILARI

PDF: >>>>> ZAUR USTAC “QƏLƏMDAR-2”

PDF>>>ZAUR USTAC – “BB” HEKAYƏLƏR

>>>> ƏN ÇOX OXUNAN HEKAYƏ <<<<

Əbdürrəhim bəy Haqverdiyev – 150

“Tərəfsiz ədəbiyyat tarixdir” layihəsi

ZAUR USTACIN SATIŞDA OLAN KİTABLARI


“YAZARLAR”  JURNALI PDF

YAZARLAR.AZ
===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

MUSA ƏLƏKBƏRLİ – ŞEİR MÖCÜZƏDİR

MUSA ƏLƏKBƏRLİNİN YAZILARI

YUXUDA GÖRDÜM Kİ…
Yuxuda gördüm ki, saraydayam mən,
Xalı döşəməli geniş bir saray.
Ayrı bir həşirdə, haraydayam mən,
Qapılar açılır önümdə tay-tay.
* * *
Gördüm başı açıq, ayağı yalın,
O başa-bu başa gəlib gedirəm.
İçində itmişəm yaşılın, alın,
Bir şahzadə qıza təzim edirəm.
* * *
Başına qoyduğu zərli tacından,
Üzündə ay doğur, gün halələnir.
İncilər, almazlar yağır saçından,
Baxıram üstümə işıq ələnir.
* * *
Uçmaq istəyirəm, bir himə bəndəm,
Tanrıdanmı gəlir bu boyda işıq?!
Hər təzim etdikcə göyə büləndəm,
Qürur yaşayıram qorxu qarışıq.
* * *
Baxır, gülümsəyir şahzadə gözəl,
Qəlbimdən keçəni gözümdən duyur.
İşarə edir ki, bir yaxına gəl,
Nədir iltimasın, ərz elə, buyur…
* * *
Dinmək istəyirəm tutulur dilim,
Mənə nələr deyir bu heyrət, nida?
Qəfildən alışır çəmənim, çölüm,
Mən səni görürəm demə yuxuda.
* * *
Sakitcə üzünə boylanıram mən,
Baxışın mehriban, gözlərin duru.
Yuxuda yuxudan oyanıram mən,
Sən günün işığı, sən ayın nuru.
* * *
Ağzım yaman yerdə dirənib dağa,
Yanıl yanaqların bir dağ laləsi…
Məni öldürməyə, ya yaşatmağa,
Bəs edər əlinin bir işarəsi.
* * *
Əmr elə, cəlladlar boynumu vursun,
Nə əcəb görünmür, bəs onlar hanı?
Çağır fərraşların çubuğa tutsun
Səndən sevgi uman kövrək insanı.
* * *
Duyğulu bir qəlbin tamam bəsisən,
Bülbül istəyim var dil-dil ötməyə.
Sən mənim könlümün şahzadəsisən,
Hazıram bir ömür səcdə etməyə!

AXŞAMDAN YAĞAN BU YAĞIŞ
Axşamdan yağan bu yağış
Gecəni sona yetirdi.
Göyün yerə deyəcəyi
Nə varsa, ona yetirdi.
* * *
O dolan qara buludlar
Sübhə kimi damcıladı.
Payızın göz yaşlarını
Qansız külək qamçıladı.
* * *
Mən də yağdım ağ varağa
Gilə-gilə, damcı-damcı.
Kirpiyimdə salxımlandı
Ürəyimdən qopan sancı.
* * *
Ac köçkünlər muncuq-muncuq
Avropanın yaxasında.
Bu sahibsiz məzlumların
Kimdi duran arxasında?!…
* * *
Arxalı qaniçənlərin
Əmri qandı, hökmü qandı…
Bu dünyanın hər yerində
Ölən ancaq müsəlmandı!
* * *
Axşamdan yağan bu yağış
Ilmə-ilmə sökür məni.
Yurdsuzların yurd gəzimi
Bir üsyana çəkir məni.
* * *
Elə yanıb yaxılıram,
Söz ağzımda kömürləşir.
Xocalıda ruhlar gəzir
Dərd ömrümdə ömürləşir.
* * *
Cövlan edir dalğa, tufan,
Bu dəryada sal köməksiz.
Külək vurur, qayıq aşır,
İnsan oğlu, qal köməksiz…
* * *
Batır gücsüz qoca, qarı,
Körpəyə bax, əl-qol atır…
Bu boğulan məzlumların
Ah, naləsi hara çatır?!…
* * *
Hara çatır haqsızlığın
Batırdığı haqqın səsi?!
Aman allah, bu dəhşəti
Bir daha kimsə görməsin!
* * *
Axşamdan yağan bu yağış
Ürəyimə damcılayır.
Külək çöldə yağışı yox,
Evdə məni qamçılayır!

BU SƏNİN DEDİYİN SEVGİDİ
Seyrələn saçların ağına gəlir,
Boranlı, çiskinli dağına gəlir.
Ömrünün ixtiyar çağına gəlir
Demə daşan selim səngidi vallah,
Bu sənin dediyin sevgidi vallah.
* * *
O gülü bu sayaq üzə bilməzdin,
Arxayın, təmkinli gəzə bilməzdin.
O boyda sevincə dözə bilməzdin
Onunçün yollarda ləngidi vallah,
Bu sənin dediyin sevgidi vallah.
* * *
Bilməzdim “hə” imiş dilindəki “yox”,
Onluğa hədəfmiş kipriyində ox.
Mən elə sevirəm bu sevgidən çox
Ömrün qocalıqla cəngidi vallah
Bu sənin dediyin sevgidi vallah.

NEYNİRDİN ŞAİRİ YARADIB, ALLAH
Bağladın həyata min sirli bağla,
Qəlbinə coş dedin, gözünə ağla.
Bir belə ağrıyla, bir belə dağla
Neynirdin şairi yaradıb, allah?!
* * *
O, dönə bilmirsə kor ağacına
Ya batan gəminin dor ağacına.
Quş olub uçmursa dar ağacına
Neynirdin şairi yaradıb, allah?!
* * *
Aldanıb kimisə öyəcəkdisə,
Sonra öydüyünü söyəcəkdisə.
Kükrəyib “Həqq mənəm” deyəcəkdisə
Neynirdin şairi yaradıb, allah?!
* * *
Ərzi hökmdara yetməyirdisə,
Dərdi, şikayəti bitməyirdisə.
Zindana könüllü getməyirdisə,
Neynirdin şairi yaradıb, allah?!
* * *
Qılınctək kəsməyən şeirə nə deyim,
Şeirdən gələcək xeyirə nə deyim?
Bu bitib-tükənməz sehrə nə deyim,
Neynirdin şairi yaradıb, allah?!
* * *
Onu zaman-zaman oda salırsan,
Öldürüb sonra da yada salırsan.
Səndəmi şeirlə nəfəs alırsan,
Neynirdin şairi yaradıb, allah?!
* * *
Günəşə calanan hörükmü gəzdin,
Zamana od vuran körükmü gəzdin,
Yoxsa öz dərdinə şərikmi gəzdin,
Neynirdin şairi yaradıb, allah?!
* * *
Yurdu dərd bürüdü, ələm götürdü,
Ürəyi yananlar qələm götürdü.
Yeri də, göyü də bu qəm götürdü
Neynirdin şairi yaradıb, allah?!
* * *
Sirrinə müvafiq elmin yoxdumu,
O elmə yönəlik filmin yoxdumu,
Bizə bundan artıq zülmün yoxdumu?
Neynirdin şairi yaradıb, allah?!
* * *
Ömrümüz-günümüz bir yuxu, röya,
İllər ötüb keçdi… Yaşadıq guya?!
Şeirlə düzələn deyilsə dünya,
Neynirdin şairi yaradıb, allah?!

BİLMİRƏM
Ürəyim dönübdür ağlar bir neyə,
Hardan tapdı məni qəza, bilmirəm?
Göylərlə əlaqəm yoxdumu deyə
Yerin yer dərdini yaza bilmirəm?!
* * *
Əlimdən, dilimdən daş asılıb daş,
Sözümdən tez gəlir gözümdəki yaş,
Elə yazılıb ki yazım, a qardaş,
Ömrüm sona yetir, poza bilmirəm.
* * *
Qocalıq günbəgün qəddimi əyir,
Yanımdan yel ötsə dizim titrəyir.
Yaş artır, önümə daş diyirləyir,
Daha düz yolda da gəzə bilmirəm.
* * *
Tanrıya çatmırsa səsim, xitabım,
Deməli bağlanıb şeir kitabım.
Daha bu hicrana qalmıyıb tabım,
Daha bu həsrətə dözə bilmirəm.
* * *
Musa, su üstündə susuz qalmışam,
İçmək yasaq olub, içdən yanmışam..
Təşnə olduğumu ancaq danmışam
Varmı bundan ağır cəza, bilmirəm?!

ŞEİR MÖCÜZƏDİR
Haçan ağ ümidi üstələyir qəm,
Mənə qəhqəh çəkib qara şər gülür.
Elə ki, şeirdən uzaq düşürəm
Yerdən də, göydən də əlim üzülür.
* * *
Sağalmaz göynəkdir könül yaramda,
Şeir möcüzədir, – danışsam haqla.
İlham bir körpüdür mənim aramda,
Göydə mələklərlə, yerdə torpaqla.
* * *
Açılsın gözümdə göylərin qatı,
Uçmaq eşqim varsa ölməyəcəyəm.
Əzrayıl da bilsin mən bu həyatı
Şeirsiz bitirə bilməyəcəyəm!

Müəllif: Musa ƏLƏKBƏRLİ

MUSA ƏLƏKBƏRLİNİN YAZILARI


YAZARLAR.AZ

===============================================

<<<<<<WWW.YAZARLAR.AZ və  WWW.BİTİK.AZ >>>>>>

Əlaqə:  Tel: (+994) 70-390-39-93     E-mail: zauryazar@mail.ru

شوکرانلیق – زائـــور اوستاج

زائـــور اوستاج

شوکرانلیق
سلام اولسون سه نه ای گؤزه ل اینسان؛
مین شوکور حاققاکی؛حاققا چاتمیسان.
حه له گؤرونمه ییب؛اولسون بئله حال؛
بیر کیتاب اوخویان گؤره قئیل وقال.
بوتون عورفان اهلی بو رای ده یئک دیل؛
کیتاب سایه سینده؛زه ن گین له شیر دیل.
شوکور یارالدانا قیلیبدیر ایمکان؛
بئله بیر گؤروشو ائدیپ آرماغان.
هر یئنی فورصه تی مه نه وئره ن ده؛
ایلکین شوکرو ثنابیتیر دیلیمده.
لینده ن توتدوغون بیر ییغین کاغیذ؛
کیتاب اولاجاقدیر دیندیکجه آغیز.
قوتلو یارانیشین اشرفی اینسان؛
عالی اولدوغونو خاطیرلا هر آن.
آند گه ل دی قه له مه؛قه له م توتانا؛
قه فیل له ر اویانا بلکه اوتانا.
وخوماق اؤیره تدی ؛یازماق اؤیره تدی؛
قوروجا تاختادان بیر دیل اوره تدی.
کاغیذی موقه دده س بیلمیشیک هر واخت.
اوستونده جانلی سؤزیاشاییر حیات.
شوکور بو نعمه ته شوکورقیسمه ته.
ایسده ره م بوپایدان هامییا یئته.
شوکوریارالدانا نئچه کی ساغام؛
اونون ساراییندا سیزه قوناغام.
مه ن یازیم بولاقلارسوزولسون گؤله؛
میرواری کلمه له ر دوزولسون دیله.
مین شوکورحاققا کی دیل وئریب بیزه؛
سیزین له گؤروشه یول وئریب بیزه…

“”پوئما) “”علیش و آننا )

Müəllif: Zaur USTAC (زائـــور اوستاج) ,

“Yazarlar” jurnalının baş redaktoru,

şair-publisist.


ZAUR USTACIN YAZILARI

“YAZARLAR”  JURNALI PDF

YAZARLAR.AZ
===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

SƏNİ UNUTMAQ OLMUR – BALAYAR SADİQ

Balayar SADİQ – şair-publisist.

SƏNİ UNUTMAQ OLMUR
Rekviyem çələngi
I
Belə qərib-qərib ağlama, qızım,
Bir az da mənimçün göz yaşı saxla.
Balaca əllərin çətirim olsun,
Ömrümü isladan yağışı saxla.
* * *
Ta uçdu könlümün arzu qoxusu,
Baş qoyub sinəmə ümidim ağlar.
Hər gün göz yaşımda dəstəmaz alır,
Əcəl köynəyini geymiş ağrılar.
* * *
Dilimdə sözlərin dili quruyub,
Könlü qancır olub bu sətirlərin.
Yellənir bir ömrün əcəl bayrağı,
Gözü doluxsunub xatirələrin.
II
Gözü doluxsunub xatirələrin,
Qırpır kirpiyini sözlər içimdə.
Könlümün ətrinə tamarzı qalan,
Bir məzar yolumu gözlər içimdə.
* * *
Mələk göyə uçar, mənim mələyim,
Niyə uçub getdin torpağa sarı?!
Götür öz əlinlə öz məzarından,
Könlümə bir ovuc torpağı sarı.
* * *
Kədər təbəssümlə baxır üzümə,
Sözüm, sətir-sətir gəl, ayağa dur.
Mənim pəncərəmdə üşüyən işıq,
Nakam bir ananın son məktubudur.
III
Nakam bir ananın son məktubudur,
Gözümü oxuyan payız yağışı.
Əcəlin köynəkdən çıxdığı yerdə,
Yağış-payız oxur, payız-yağışı.
* * *
Ürəyimdən keçən tənhalıq yolu,
Özünə don biçib sənin səsindən.
Asılıb kədərin nəm təbəssümü,
Bəxtimin qırılmış pəncərəsindən.
* * *
İlahi, könlünü mən necə alım,
Sinəmdə hönkürən qərənfillərin.
Ovcunda bir layla buz bağlayıbdı,
Göz yaşı qoxulu çiçək əllərin.
IV
Göz yaşı qoxulu çiçək əllərin,
Əyninə dar gəlir sükut köynəyi.
Alnımdan torpağa yıxılan yolun,
Üstündə bir əlçim ümid göynəyir.
* * *
Ürəyim, səbrimə daha qar yağır,
Götür qalan ömrü yığışdır, gedək.
Üzündə xəfifcə qəm gülümsəyir,
Bu qəbri mənimlə danışdır, gedək.
* * *
Könlü məzar-məzar hönkürən sözün,
Gözündə ünvansız qəbrim islanır.
“Təsəlli” sözünü külək apardı,
Payızın ovcunda səbrim islanır.
V
Payızın ovcunda səbrim islanır,
Boğazı quruyub təsəllilərin.
Daha ürəyimdə ürək qalmayıb,
Geysin köynəyini sənsiz illərin.
* * *
Nəm çəkməz bu qəbir göz yaşlarımdan,
Sükutu sərmişəm başdaşın altda.
Saçların torpağa qoy dağılmasın,
Götür ürəyimi qoy başın altda.
* * *
Adın damcılayır, adın, əzizim,
Yaralı sükutun qara səsindən.
Ümid sahilləri görünmür daha,
Yelkənsiz qayığam dərd dənizində.
VI
Yelkənsiz qayığam dərd dənizində,
Gözümün yaşından su içir sular.
Payız yarpağıtək düşür gözümdən,
Əlləri qoynunda qalan arzular.
* * *
Geyib köynəyini “gedər-gəlməz”in,
Ümid xəcalətdən üzümə baxmır.
Sən mənim əlimi buraxıb getdin,
Nə yaxşı həsrətin məni buraxmır.
* * *
Yeriyən bir damla göz yaşıyam mən,
Səbrimin yarası qan verir hər gün.
Sən gedən yolların dodaqlarında
Könlüm sətir-sətir can verir hər gün.
VII
Könlüm sətir-sətir can verir hər gün,
Hüsnün ləpələnir baxışlarımda.
Gecələr yuxunu yuxuya verib,
Gəzirəm alnımın qırışlarında.
* * *
İslanmış məktubdu gözümün yaşı,
Xəttimi min dəfə oxuyanım, gəl.
Ölümün əlləri sevgiyə çatmır,
Məzarı məhəbbət qoxuyanım, gəl.
* * *
Ətri burda qalıb qədəmlərinin,
Ahım tonqal çatıb göyün üzündə.
Hər gün ürəyimi dəfn eləyirəm,
Sənin ləpirində, sənin izində.
VIII
Sənin ləpirində, sənin izində,
Mənim ağrılarım gül-çiçək açır.
Asıram gecəni kirpiklərimdən,
Hər səhər dərdlərin dodağı qaçır.
* * *
Əcəlin çiynində gedən baharım,
Bir bənövşə ömrü dur, ayaq saxla.
Sinəm arzuların məzar yeridir,
Məni başdaşıtək bir az qucaqla.
* * *
Mənim gözlərimin payız günüydü,
Əcəl qəfil dərdi bənövşəm – səni.
Yığıb göz yaşımı ümid əvəzi,
Yenə görüşünə gəlmişəm sənin.
IX
Yenə görüşünə gəlmişəm sənin,
Gözümdə min ilin həsrət buludu.
Qəlbimdə bir sətir yer qoymamısan,
Barı bircə sətir səni unudum.
* * *
Ta ömrüm bir gündü – sənsizlik günü,
Ayrılıq qolunu boynuma salıb.
Söylə Əzrayıla saata baxsın,
Yanına gəlməyə nə qədər qalıb.
* * *
Surələr yüyürür, ayələr qaçır,
Solur çiçək-çiçək sonuncu güman.
Səsimi isladır sükutun şehi,
De, niyə dinmirsən, səbrinə qurban?!
X
De, niyə dinmirsən, səbrinə qurban?!
Adını asmışam öz ürəyimdən.
Bəyaz varaqları camalın bilib,
İntihar eləyir söz ürəyimdə.
* * *
Üzü göyə gedən tənha cığırdı,
Bu qəbrin başında dalğalanan daş.
Dur, gəl əllərimlə dara saçını,
Çatlamış güzgündü gözlərimdə yaş.
* * *
Elə sakit-sakit baxır üzümə,
Bu dərdin Allahdan xəbəri yoxdur.
Üstümə qar kimi yağır ayrılıq,
İsin göz yaşımla, hava soyuqdur.
XI
İsin göz yaşımla, hava soyuqdur,
Kövrəlib sözümün sehri, ovsunu.
Yumdu gözlərini insaf yolları,
Apardı ömrümün yar qoxusunu.
* * *

Getdin, bu dünyanı çırpdın üzümə,
Utandı bəxtindən bütün qapılar.
Nə mənim könlümtək bir eşq yolçusu,
Nə sənin hüsnündə gözəl tapılar.
* * *
Məhəbbət ətirli başdaşınam mən,
Səsimlə-güzgülən, sözümlə-daran.
ənim gözlərimin yaraşıq yeri,
Əyninə geydiyin qəbrinə qurban.
XII
Əyninə geydiyin qəbrinə qurban,
Dərdimin boynuna qolunu sal, get.
Sənin saçlarında qalıb əllərim,
Gəl, bu son ümidin tozunu al, get.
* * *
Ocaq qalamışam göz yaşlarımdan,
Külümü ovcunda tutub mələklər.
Hər gün gülümsəyir dağlar sinəmdə,
Ətrindən danışır hər gün çiçəklər.
* * *
Elə qəfil əsdi əcəl küləyi,
Düşüb çilikləndi bu alın yazım.
Bir layla üşüyür bu məzar üstə,
Belə qərib-qərib ağlama, qızım.
XIII
Belə qərib-qərib ağlama, qızım,
Gözü doluxsunub xatirələrin.
Nakam bir ananın son məktubudur,
Göz yaşı qoxulu çiçək əllərin.
* * *
Payızın ovcunda səbrim islanır,
Yelkənsiz qayığam dərd dənizində.
Könlüm sətir-sətir can verir hər gün,
Sənin ləpirində, sənin izində.
* * *
Yenə görüşünə gəlmişəm sənin,
De, niyə dinmirsən, səbrinə qurban?!
İsin göz yaşımla, hava soyuqdur,
Əyninə geydiyin qəbrinə qurban…
Müəllif: Balayar SADİQ

BALAYAR SADİQİN YAZILARI


“YAZARLAR”  JURNALI PDF

YAZARLAR.AZ
===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

ZAUR USTAC – NƏDƏNDİ

 Zaur USTAC

NƏDƏNDİ
Yanağına qəmzə atan gülüşün,
Ürəyimə nizə atır nədəndi?!
Ədasıyla meh gətirən yerişin,
Ürəyimi közə atır nədəndi?!
* * *
Sən gələndə yoxa çıxır dərd, ələm
Cismim dəftər olur, ruhumsa qələm,
Bir baxış atəşli gözümə məlhəm,
İynə tək dizimə batır nədəndi?!
* * *
İstədim deyəm ki, olasan agah,
Mat qaldım, bu işə özüm də Billah,
Ustacın işləri Vallahi dəsgah,
Qan-tər içrə buza batır nədəndi?!

Müəllif: Zaur USTAC,

“Yazarlar” jurnalının baş redaktoru,

şair-publisist.

ZAUR USTACIN YAZILARI

YAZARLAR.AZ
===============================================

<<<<<< WWW.USTAC.AZ və  WWW.BİTİK.AZ >>>>>> 

Əlaqə:  Tel: (+994) 70-390-39-93     E-mail: zauryazar@mail.ru

ZAUR USTACIN “YARIM BARDAQ” ŞEİRİ SƏMA MUĞANNANIN TƏQDİMATINDA

YARIM BARDAQ

O yarım buraxdığın

Bardaq, de yadındamı????

Sen gedəndən düz üç gün

Söndürübdü yanğımı….

* * *

Dodağın dəyən yerdən

Öpmüşəm, neçə kərə….

Dadsız şüşə o gündən

Dönüb bala, şəkərə….

* * *

Sənin tutduğun yerdən

Çalışmışam tutmağa….

İz tapanda izindən

Qanad olmur uçmağa….

* * *

Bütə dönüb, bu bardaq

Bəzəyidir evimin….

Üstündə barmaq-barmaq

Bəzəyi var əlinin….

* * *

Qalan son damlaları

Qıymadım. içəm özüm….

Qonaq etdim gülləri,

Belə bulundu çözüm…

* * *

Dibçəklər Yer kürəsi,

Güllər Mən, Sənsə susan…

Heç nə yox itirəsi,

Tay canıma hopmusan…..

01.08.2016. Bakı.
Müəllif: Zaur Ustac

SƏMA MUĞANNANIN TƏQDİMATINDA:



Zaur Ustac
ın  Mucrunesriyyati.az saytında satışda olan kitabları haqqında məlumat:

  1. Mucrunesriyyati.az , 1. Arxiv: Archive.vn

ZAUR USTACIN DİGƏR YAZILARI


SƏMA MUĞANNANIN DİGƏR YAZILARI


YAZARLAR.AZ

===============================================

<<<<<<WWW.YAZARLAR.AZ və  WWW.BİTİK.AZ >>>>>>

Əlaqə:  Tel: (+994) 70-390-39-93     E-mail: zauryazar@mail.ru

ÜLYAHƏZRƏT – ZAUR USTAC

Zaur Ustac – şair, publisist.

ÜLYAHƏZRƏT
Könül sarayımın sultanı sənsən,
Qəlbimdə qurduğun taxtın mübarək!
Ruhum təbəəliyi özü üstənib,
Biətin mübarək, andın mübarək!
* * *
Zaman neçə kərə dayandı, durdu,
Adi təbəssümün bir dünya qurdu,
Baxışın isitdi viranə yurdu,
Ocağın mübarək, odun mübarək!
* * *
Sözdən ilmə – ilmə toxunub tacın,
Nəyim var, nəyim yox qoy olsun bacın,
Bu yolda qurbanlıq özü Ustacın
Məqamın mübarək, adın mübarək!
18.03.2020. Bakı.


Müəllif: Zaur USTAC

YAZARLAR.AZ
===============================================

<<<<<<WWW.YAZARLAR.AZ və WWW.USTAC.AZ>>>>>>

Əlaqə:  Tel: (+994) 70-390-39-93     E-mail: zauryazar@mail.ru