Rəşad Məcid “Şuşa” şeiri. Təqdim edir: Nuray Şahsuvarlı.
ŞUŞA Min şəhər adı var dillər əzbəri, Adların ən üstün adıdı Şuşa. Musiqi notudur cüt hecasıyla: Şu-Şa Dilimin şəhdidir, dadıdı Şuşa. * * * Ciyərdə nəfəsdir, damarda qandır, Ruha qanad verən sirli məkandır, Bilib eşidəndir, güc artırandır, Qoşundur, əsgərdir, ordudur Şuşa. * * * Qoynuna hər gələn yüz xəyal eylər, Qıraqda qalanlar qeylü-qal eylər, Birini coşdurar, birin lal eylər, Tilsimdir, ovsundur, cadudur Şuşa. 2021
“Şuşa ili”nə həsr olunmuş pyes müsabiqəsi elan olunub
Azərbaycan Respublikası Mədəniyyət Nazirliyi “Şuşa ili”nə həsr olunmuş pyes müsabiqəsi elan edir
* Müsabiqəyə göndərilən pyeslər indiyə qədər heç bir teatrda səhnələşdirilməməlidir;
* Müxtəlif janrlı əsərlərin yazılması arzuolunandır;
* Bir müəllif müsabiqəyə yalnız bir əsər təqdim edə bilər;
* Müsabiqəyə qatılmaq üçün yaş məhdudiyyəti yoxdur;
* Əsərlər sentyabrın 1-nə qədər qəbul edilir, son tarixdən gec göndərilən əsərlər müsabiqəyə qəbul olunmayacaq;
* Qalib pyes müəllifi 2000 azn məbləğində pul mükafatı ilə təltif olunacaq və dövlət sifarişi əsasında tamaşaya qoyulacaq;
* İştirakçılar pyes ilə birlikdə özləri haqqında məlumatı, şəxsiyyət vəsiqəsinin surətini, əlaqə nömrələrini em.aliyev@culture.gov.az ünvanına göndərməlidirlər.
YALANÇI ŞƏHƏR Səndən xəbərsizik gör neçə ildı, Gözlərin yollara dikili qalıb. Qaçıb gələrdınmi, ayağın olsa. Qolların qoynunda bükülü qalıb. * * * Bəlkə ayağını özün kəsmisən, Atib gəlməyəsən bezib ağrıdan. Bizim yollarimiz kəsilməyib ki… Kəsik ayaqlardı ürək ağrıdan. * * * Ayaqlar kəsildi, cığırlar itdi, İtmiş cıgırlarla qalandı Şuşam. Ayağın olsaydı yenə gəlməzdin, Yalandı, yalandı, yalandı, Şuşam. Müəllif: Sehran Allahverdi
ŞUŞA Yolları bağlanıb düşüncə daşa, Baharı dönüncə şaxtalı qışa, Naxələf satqınlar keçincə başa, Dizləri qatlandı, yıxıldı Şuşa! * * * Namərdlər hiylədən toru hörüncə, Saldıran yağılar alıb girincə, Məzar sükutuna dalmış görüncə, Odlara qalandı , yaxıldı Şuşa! * * * Qəlbindən vuruldu, köksü didildi, Döyüldü dağ-daşı orden edildi, Qanla yoğrulmuşdu, sanki ödüldü, Erməni boynuna taxıldı Şuşa! * * * Verdik əlimizdən bizim olanı, Tuş etdik yurduma dərdi, bəlanı, Ələyib gözlərə falşı, yalanı, İllərlə lentlərdə baxıldı Şuşa! * * * Bircə gün qeyd edib işğal gününü, Sonra unuduruq səsi, ününü, Riyakar bir tarix biçir donunu, Böyüyən nəsilə nağıldı Şuşa! 08.05.2017. Müəllif: Təvəkkül Goruslu Məmmədov
QÜRBƏT KÖYNƏYİ Oxsa bu dərdin saçını, Körpə, dəcəl balan kimi. Pıçılda bir qulağına, Doğruları yalan kimi. * * * Qeyrət də çırpıb qapını, Adını süpürüb, gedib. Nə yaxşı ki, son gedişdə Üzünə tüpürüb, gedib. * * * Havalar ta istiləşir, Çıxar olmayan papağı. Birdən səni kişi bilib, Soruşarlar Qarabağı… * * * Ömrü Ağdam şərabı tək, Bala-bala çək başına. Təsəlli ver öz-özünə: “Mən neyləyim tək başına?!. * * * Eynimde qurbet koyneyi, Her gun tezelenir,veten. Sairler oz derdi ile Bele mezelenir,veten! * * * Əynimdə qurbət koynəyi, Hər gun təzələnir,vətən. Sairlər oz dərdi ilə Belə məzələnir,vətən! Müəllif: Balayar Sadiq
ŞUŞA MÖVSÜMÜ Tut bu səbrin yaxasından, Vur o daşa, vur bu daşa. Bir sətir Şuşa ətri səp, Ruhunda donan savaşa. * * * Qəlbindən bir dağ boylanır, Qeyrət gəzsin qoy o dağda. Qanını sürt gözlərinə, Güllər açsın Qarabağda. * * * Hünəri çixar köynəkdən, Qala qisas ocağını. Arzusu üşüyənlərə, Aç ümidin qucağını. * * * Güllə səsi gülə – gülə, Qoy sinəndə qapı açsın. Düşmən görsün cürətini, Ölümünü qapıb qaçsın. * * * Şükür,zəfər qoxuludur, Şəhidlərin təbəssümü. Qalıbdır gözü yollarda Könlümün ŞUŞA mövsümü ! Müəllif: Ülkər Nicatlı
BU YAZ DA GƏLƏ BİLMƏDİK… Gün-güzaran başımızı yenə qatdı, Biz sızladıq, namərd səndə at oynatdı, Bizsiz yenə yamacların şehə batdı, Bu yaz da gələ bilmədik… * * * Buzdan çıxdı, qırçınlandı bulaqların, Lalələndi, oda düşdü yanaqların, “Hardasınız”- pıçıldadı dodaqların, Bu yaz da gələ bilmədik… * * * Damarımda qaynamırsa qanım, Şuşam, Səni hələ hansı üzlə anım, Şüşam? Yolumuzdan yığ gözünü, canım Şuşam- Bu yaz da gələ bilmədik… 09 may 2012 Müəllif: Vahid Çəmənli
HÜNƏR GÖSTƏRMİSƏNMİ? (BU GÜN YARALI YERİMİZ OLAN ŞUŞANIN İŞĞALINININ İLDÖNÜMÜDÜR.) Dinlə sözlərimi: Ey vətən oğlu, Düşmən işğal edib, bağlayıb yolu. Qəlbində intiqam odlu, alovlu, Yandırıb, qisasa döndərmisənmi? * * * Bir vaxt Erməniylə can, qardaş kimi, Yeyərdin, içərdin dost, sirdaş kimi. Güllələr yağdırıb, qara daş kimi, Özünü döyüşə, kökləmisənmi? * * * Yağı, düşmən kəsibdi yollarını, Çalın, çarpaz bağlayıb qollarını. Vətənin, qeyrətli oğullarını, Düşmənlə, döyüşə səsləmisənmi? * * * Türklərə bir bəla, yaratdı Allah, Başları əzildi, olmadı islah. Durub keşiyində, əlində silah, Başına igidlər, cəmləmisənmi? * * * Səslə Koroğlumu, ya Babəkimi, Gəlsin şah Xətai, Qaçaq Nəbimi. Vətənə layiqli, bir övlad kimi, Qəlbində, məhəbbət bəsləmisənmi? * * * Partizan Mehdinin, olmuş əvəzi, Nümunə göstər sən, gəl Mübarizi. Gəray, Hüseynbala, qəhrəman Həzi, Onlar tək, bir hünər göstərmisənmi? * * * Əlif, Əlyar, Asif, İbadla, Yaqub, Şirin,Allahverdi, Yelmar, həm Raqub. Arxalı düşməni, edərək məğlub, Döyüşüb, heç ölmək istəmisənmi? * * * Qoru bu torpağı, torpaq sənindir, Doğma yer, yurd, yuva öz vətənindir. Döyüş meydanıdır, Qarabağ indi, Canını sipərə, döndərmisənmi? * * * Axdı torpağına, şəhid qanları, Gərəkdir, alınsın intiqamları. Vətənə xor baxan, kor nadanları, Malik: Şeirinlə, pisləmisənmi? Müəllif: Malik Tağızadə
“Bu gün Azərbaycan müsiqisinin beşiyi və şərqin konservatoriyası olan Şuşanın işğalı günüdü. Şuşa şəhərinin erməni faşistləri tərəfindən işğal olunduğunu unutmadıq və heç vaxt unutmarıq. Şuşaya qovuşacaq günümüz üzaqda deyil.” – Etibar Vəliyev MƏN ƏSGƏR ANDINI İÇİB GƏLMİŞƏM Çəkil yağı düşmən, Qarabağımdan. Şuşa qalasından, uca dağımdan. Çəkil qabağımdan, keç qabağımdan, Mən əsgər andını içib gəlmişəm. * * * Sülh deyib, sizlərə zaman vermişik. Sən demə zalıma aman vermişik. Apreldə cavabın yaman vermişik, Mən əsgər andını içib gəlmişəm. * * * Xocalı, Xocavənd, Xankəndi mənim, Zəngilan, Cəbrayıl başımda çənim, Ağdərə, Qubadlı yuxuma qənim, Mən əsgər andını içib gəlmişəm. * * * Ağdam, Fizulidən keçib gələrəm, Kəlbəcər, Laçına səcdə edərəm, Mən cavan Heydərəm, baba Heydərəm, Mən əsgər andını içib gəlmişəm. * * * Qələbə müjdəsi, sorağı məndə, Canım Azərbaycan, bayrağı məndə, Çəkiçi məndədi, orağı məndə, Mən əsgər andını içib gəlmişəm. * * * Xəstədi, düşmənin vardı mərəzi, Anamla etmişəm razi-niyazi, “Ya şəhid olaram, ya da ki qazi,” Mən əsgər andını içib gəlmişəm. 18.10.2016 Müəllif: Etibar Vəliyev
VƏTƏN OĞULLARI Vətən oğulları, başınız uca, Üzünüz bəxtiyar,daim ağ olsun. Vətənim yaşasın dünya durduqca, Millətim salamat,Vətən sağ olsun. * * * Vətənə arxasız, millətə dayaq, Gəlin, bu dözümdən usanaq, doyaq, Yağıya “toy” tutaq, əlacsız qoyaq, Həmləniz düşmənə, çarpaz dağ olsun. * * * Vaxtdır, pasın açın silah, yarağın. Sizdən alaq, böyük zəfər sorağın, Cənnətə döndərin yurdun torpağın, Vətən başdan-başa bağça,bağ olsun. * * * Cavanlar,ömrünüz açsın tər çiçək Özünüz yüz yaşan,bəxtiniz göyçək, Azad edin, doğma yurdlara köçək, Qürür,and yerimiz, Qarabağ olsun. Müəllif: Mayil Dostu
CIDIR DÜZÜ Dərədə möcüzə, dağda möcüzə, Torpağa bu qədər vurulmamışdım. Gözəllik önündə heç vaxt, heç vədə, Belə təzələnib durulmamışdım. * * * Dili tutulubmu torpağın, daşın, Görən niyə belə səssizdir bu yer. Haçansa Üzeyir ayağı dəyib, Yəqin ona görə əzizdi bu yer. * * * Sükuta bürünüb Cıdır düzümüz, Bülbülün səsinə dalandan bəri. Torpaq dərd əlindən qayalaşıbdı, Ellər Natəvansız qalandan bəri. * * * Göz dikib bu yerə yağılar yadlar, Su olub düzündə axa bilməyib. Nə qədər zirvələr fəth edib Qacar, Amma bu zirvəyə qalxa bilməyib. * * * Burda daşları da qoruyaq gəlin, Hansı bir daşdasa Vaqif qanı var. Bura yaddaşıdır obanın, elin, Burda hər bir nəslin öz ünvanı var. * * * Deyirəm, dünyada sevgi tapılmaz, Övladın torpağa sevgisi kimi. Bu yurd yaddaşımda qalacaq mənim, Tarixin möcüzə sərgisi kimi. 1979
ŞUŞA Min şəhər adı var dillər əzbəri, Adların ən üstün adıdı Şuşa. Musiqi notudur cüt hecasıyla: Şu-Şa Dilimin şəhdidir, dadıdı Şuşa. * * * Ciyərdə nəfəsdir, damarda qandır, Ruha qanad verən sirli məkandır, Bilib eşidəndir, güc artırandır, Qoşundur, əsgərdir, ordudur Şuşa. * * * Qoynuna hər gələn yüz xəyal eylər, Qıraqda qalanlar qeylü-qal eylər, Birini coşdurar, birin lal eylər, Tilsimdir, ovsundur, cadudur Şuşa. 2021
ANAR Xalq yazıçısı, Azərbaycan Yazıçılar Birliyinin sədri
Bu gün Xalq yazıçısı Anarın doğum günüdür! Doğum günü münasibəti ilə Anar müəllimi təbrik edir, uzun ömür, can sağlığı, fəaliyyətində yeni-yeni nailiyyətlər arzulayırıq! Bu xoş gündə, “Şuşa ili”ndə sevimli yazarımızın Azərbaycanın mədəniyyət paytaxtı Şuşanın işğaldan azad olunması münasibətiylə yazdığı “Yaşa, Şuşa!“ şeirini (525.az) oxucularımıza təqdim edirik:
YAŞA, ŞUŞA
Otuz illik həsrətimiz Qırx dörd gündə çatdı başa, Azad edildi Qarabağ Azad oldu gözəl Şuşa, Doğma vətənin qoynunda Şuşa, sonsuzadək yaşa!
Cıdır düzü, Qırx pilləkan, “Ərim gəldi” bir tamaşa, Natəvanlı, Üzeyirli, Nəvvablı, Bülbüllü Şuşa, Xarı-bülbül güllü Şuşa!
Düşmənə ismarış etdik: Dinc yolla rədd olub getsin. Çağırdıq sülhə, barışa. Hikkəsindən, lovğalıqdan Sözümüzü eşitmədi, İş qaldı hərbə, savaşa. Şəhid verdik, zəfər çaldıq, Sahib çıxdıq yurdumuzun torpağında hər qarışa, “Sən bu gün azadsan, Şuşa!”
Məscidlərin ucalıbdır Minarələr qoşa-qoşa, Öz dininlə, öz dilinlə, öz xalqınla azad yaşa.
Cıdır düzümüzdə yenə Köhlənlər çıxsın yarışa, Yenə muğamlar səslənsin hər tərəfdə, doğma Şuşa. Daşaltı da fərəhlənsin, axıb getsin köpüklənib sevincindən daşa-daşa, Canımızsan, gözümüzsən, özümüzsən, əziz Şuşa.
Pənahəli xan dövründən Düşmənlərin hər həmləsi, hər hiyləsi axırda çıxıbdır boşa, sən bunu bilirsən, Şuşa.
İbrahim xan nəslinin faciəli taleyini “Qarabağnamələr” diliylə bizə danışa-danışa günümüzə gəldin, Şuşa
Dolayları aşa-aşa, Bir gün sivri yamaclarla Qaya dırmaşa-dırmaşa, Düşmənlərlə əlbəyaxa, Mərdcə vuruşa-vuruşa, Ölüm-dirim məqamında bəxtlə dalaşa-dalaşa neçə əsgər qazi oldu, neçə cavan şəhid oldu qocalıb dolmadan yaşa Sənin yolunda şəhərim, Şəhərlər şəhəri Şuşa
Getsin o günlər gəlməsin, Yağı özün qalib bildi, Araq içib gəldi cuşa, Cıdır düzündə rəqs etdi Sevincindən coşa-coşa, Əl qol atdı çaşa-çaşa Boş-boşuna danışdı hey Dili topuq çala-çala, Dili dolaşa-dolaşa. Belə səfeh əbləhlərə Ürəyində güldün, Şuşa
Zəfər çalan ordumuz da, Haqlı vətən davasından Dəmir yumruqtək birləşib, Qalib çıxan yurdumuz da Layiqdir min-min alqışa. Mətanət qalası Şuşa, Həmişə, hər vaxt, hər zaman Qeyrətin qalası Şuşa
