AY ANA!
Düz keçəmmədim yolu, ay ana,
Təpənin üstündən əl etdin mənə.
İçim kədər, nisgil dolu, ay ana ,
Yelləndim, yel kimi tez gəldim sənə.
Sıxdım dodağımı gülər gözünə,
Qəlbimə yeridi daşın sərini.
Əl çəkdim şalına, nurlu üzünə,
Öpdüm mələyimi, öpdüm pərimi!
Baxışların elə mehribandı ki,
Çiçək nəfəsini duydum, ay ana!
Bu elə duyğulu mərhəm andı ki,
Başımı dizinə qoydum, ay ana!
Xəyalım təndirə apardı məni,
Lavaşın ətiri burnuma dəydi.
Xəyalım dünyadan qopardı məni,
Bu bir röya idi, yoxsa ki, nəydi?
Saçıma əl çəkdin, təsəlli verdin,
Dedin, ” özünə gəl, ağlama oğul “.
Dedin, ” mənə gəlsin qəhərin, dərdin ,
Daha qəm çələngi bağlama oğul “!
Bağışla, naxələf oğlunu, əfv et,
Hər gün gələmmirəm sənə, ay ana!
” Dayanma ay oğul”, Ruhum deyir, ” get “,
Darıxma gələcəm yenə, ay ana!
09. 08. 2016
Müəllif: Təvəkkül GORUSLU
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru