ÜMİDİM VAR
Bəxtdə yatarmış bu qədər?
Döz ürəyim, döz bir təhər
Yatan bəxtim bir gün səhər
Oyanacaq, ümidim var.
Bəxt gərəkdir hər insana
Arzusu çatsın ünvana
Ömür bağım al əlvana
Boyanacaq, ümidim var.
Çatacam elin dadına
Yetişəcəm imdadına
Yanmayacam dərd oduna
O yanacaq, ümidim var.
Mən Muradam yaxşı tanı
Ölümə vermərəm canı
Yaşayacam bu dünyanı
Doyanacaq, ümidim var.
9.10.2023.
Müəllif: Murad Eloğlu
Oxuyun >> Gözündə tük var
Məndə sənin günündəyəm
Ay mənə əl açan insan
Məndə sənin günündəyəm
Qabağıma qaçan insan
Məndə sənin günündəyəm.
Çətinkəşib zaman, qoca
Halım olub yaman, qoca
Yaxın gəlmə, aman, qoca
Məndə sənin günündəyəm.
Düşmüşəm amana, aha
Gümanım yoxdur sabaha.
Ələ baxan oldum daha
Məndə sənin günündəyəm.
Ay əl açan ahıl qoca
Əl tuta bilmirəm aca
Möhtac oldum ehtiyaca
Məndə sənin günündəyəm.
Sən dilənib dolanırsan
Yalvarırsan, yalanırsan
Mən Muradam inanırsan?
Məndə sənin günündəyəm.
8.10.2023.
Müəllif: Murad Eloğlu
Oxuyun >> Gözündə tük var
Paradına qurban olum ey əsgər!
Vətən sevgisiylə, eşqilə səni
Yaradana qurban olum ey əsgər
İlk dəfə xalqına fərəh yaşadan
Paradına qurban olum ey əsgər!
Səngərdə üşüyən, donan əlinə
Şeh düşmüş torpaqlı, tozlu telinə
Qarabağ vətəndir deyən dilinə
Fəryadına qurban olum ey əsgər!
Yenə doğularmış Koroğlu, Nəbi
Yenə dirilərmiş o xan Çələbi
Adına layiqmiş “boz qurd” ləqəbi
Soyadına qurban olum ey əsgər!
Hünərlə alışdın, qeyrətlə yandın
Hər qarış torpağı müqəddəs sandın
Vətən arzuladın, zəfər qazandın
Muradına qurban olum ey əsgər!
24.09.2023
Müəllif: Murad Eloğlu
Oxuyun >> Gözündə tük var
Əfsər Abdullayevin ilk kitabı
Oğuz rayonunun Qarabulaq kəndində boya-başa çatmış gənc qələm sahibi Əfsər Abdullayevin “Abzas” adlı ilk şeirlər kitabı işıq üzü görüb. Müəllifin kitabına belə ad verməsi təsadüfi deyil. Əfsərə görə həyatda çox şey abzasdan başlayır.
Gənc şairin mövzu dairəsi geniş və rəngarəngdir. Onun özünəməxsus həyat fəlsəfəsi var, dünyaya, cəmiyyətə yeni gözlə baxır. Lirik şeirlərində çoxlarının istifadə etdiyi bədii ifadə vasitələrinə əl atmır. Özünəməxsus təşbeh və bənzətmələrin axtarışındadır. Şeirlərində yersiz uzunçuluq da etmir. Sözünü qısa və tutarlı deməyə çalışır. Cəmiyyətdə baş verən mənəvi çöküntü şairi sarsıtsa da, insanları xeyirxahlığa səsləyir, gözəllik axtarışı ilə özünə və oxuculara təskinlik verməyə çalışır. Bu baxımdan gənc şairin “İnsanlıq”, “İnsan ömrü”, “Bir qocanın xəyalıdır xəyalım”, “Bu dünyanın”, “Sabah” kimi şeirləri təsirli və yaddaqalandır.
Əfsər Abdullayevin “Abzas” kitabı gənc şairin oxucularla ilk görüşüdür. İnanırıq ki, gələcəkdə o, poeziya aləmində daha uğurlu addımlar atacaq, öz şeirləri ilə poeziyasevərlərin qəlbinə yol tapacaq.
İnsanlıq
İnsanlıq diz üstə sürünən zaman,
Nadanlıq yüksəlir topuqdan dizə.
Bu qədər qan töküb, can alırıqsa,
Kim deyər, kim axı, kim insan bizə?
Yatmayın, yuxudan ayılın artıq,
Nə fərqi rəngimiz qaradır, ağdır?
Köçəndə dünyadan arxayın köçək,
Bilək ki, insanlıq hələ də sağdır.
İnsanlıq yolunda, insanam deyən,
Çəkər min əziyyət, acı, sayılmaz.
Amma hər kəbədən təsbeh gətirən,
Əbalı molla da hacı sayılmaz.
Əsil insanlığa atılan ləkə,
Yalandan insanam deməkdir elə.
Nəyinsə xətrinə görülən əməl,
İnsanın haqqını yeməkdir elə.
Məlumatı hazırladı: Günnur Ağayeva
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Biz səni saxlaya bilmirik Ata
(Allah bütün xəstələrə şəfa versin inşallah)
Başını qatırıq quruca sözlə
Üzünə baxırıq axı nə üzlə?
Durduq keşiyində var gücümüzlə
Əziyyət əzaba hey bata-bata
Biz səni saxlaya bilmirik Ata.
Dilimdə gəlmir ki bir söz deməyə
Artıq təbiblər də yetmir köməyə
Gərdişə gücümüz çatmadı deyə
Utana-utana baxdıq həyata
Biz səni saxlaya bilmirik Ata.
Möcüzə göstərə uca yaradan
Səni qüdrətilə çıxarda dardan
Dərmanın tapardıq desələr hardan?
Gecəni gündüzə biz qata-qata
Biz səni saxlaya bilmirik Ata.
Yalvardıq Allaha biz neçə qardaş
Bu yaşda nə köçmək? Axı nə təlaş?
Kaş Allah möcüzə göstərəydi kaş
Gedəydi başından bu bəla, qada
Biz səni saxlaya bilmirik Ata.
19.09.2023
Müəllif: Murad Eloğlu
Oxuyun >> Gözündə tük var
Çox görmə atamı dünya
Güldüm gülüşümə qəhər gətirdin
Bircə yol sevinmək xətamı dünya?
Bu boyda qoynunda yerim dar oldu
Nə yaman sıxırsan adamı dünya?
Üzümə açılan sabahı sevdim
Bəxtimə yazılan min “ahı” sevdim
Mən səni sevmədim, Allahı sevdim
Məndən üz döndərdi o damı dünya?
Ömürdə yarıdır, canımda yarı
Çökdürmə yoluma dumanı, qarı
Mənə sevincindən qıymadın barı
Çox görmə, çox görmə Atamı dünya.
18.09.2023.
Müəllif: Murad Eloğlu
Oxuyun >> Gözündə tük var
Tək sənin xətrinə, sənin xətrinə
Gözüm gözəllərdən biganə qaldı
Tək sənin xətrinə, sənin xətrinə
Ruhum qanadlandı, ərşə ucaldı
Tək sənin xətrinə, sənin xətrinə.
Mən bu inadımnan dönən deyiləm
Məhəbbət dağından enən deyiləm
“Eşq”lə alışmışam, sönən deyiləm
Tək sənin xətrinə, sənin xətrinə.
Yolunda gül çiçək olub bitərəm
Sevgimdə hər zaman təzəyəm, tərəm
Hamıya bağlıdır ürək pəncərəm
Tək sənin xətrinə, sənin xətrinə.
Ömrünə ömürlük gəlirəm gülüm
Səninlə eşqimi bölürəm gülüm
Muradam, öl desən ölərəm gülüm
Tək sənin xətrinə, sənin xətrinə.
08.07.2023
Müəllif: Murad Eloğlu
Oxuyun >> Gözündə tük var
Əvvəldən mən ağlı çaş yaşamışam
Həyatdır, enişi yoxuşu vardır
Demirəm bir ömür xoş yaşamışam
Bəzən bahar kimi parlaq, günəşli
Bəzən ürəyimdə qış yaşamışam
Kürküm bildim zəhmətimi, büründüm
Bəzən abad, bəzən uçuq göründüm
Üzü gülər, eyni açıq göründüm
Xəlvət gözlərimdə yaş yaşamışam
İl artdıqca azaldı dost dağlarım
Söndü qohum adlı şux çırağlarım
Qurudu qayğılar adlı tağlarım
Mən indi bildim ki boş yaşamışam
Eloğlu, kimlərin çıxdı paxırı?
Gör kimlər unutdu axır-naxırı
Düz oldum düzlərdə qaldım axırı
Əvvəldən mən ağlı çaş yaşamışam
11.04.2023
Müəllif: Murad Eloğlu
Oxuyun >> Gözündə tük var
Özümə qənimdir xatirələrim
Həm məni yaşadan şirin xəyalım
Həm acı qəmimdir xatirələrim
Bəzən ürəyimi didən peşmanlıq
Bəzən həmdəmimdir xatirələrim.
Vüsala tamarzı kədərdən kalan
Qisməti intizar, sevgisi talan
Ötüşən ömürdən yadigar qalan
Saçımda dənimdir xatirələrim.
Dünəndən boylanıb güdür sabahı
Yığır ürəyimə amanı, ahı
Heç kimlə bölüşə bilmirəm axı
Tək mənim, mənimdir xatirələrim.
Eloğlu, getdi ta gedən dünənim
Havayı xərcləndi ömür dönəmim
Sirr kimi daşlaşıb sinəmdə mənim
Özümə qənimdir xatirələrim.
31.05.2023
Müəllif: Murad Eloğlu
Oxuyun >> Gözündə tük var
Gözəllər gözümə baxanda sən gəl…
Ay könül həmdəmim, a pünhan eşqim
Tənhalıq qəlbimi sıxanda sən gəl!
İntizar qovğası, həsrət atəşi
Sinəmi yandırıb yaxanda sən gəl!
Axı sən qayğıma qala bilirsən
Məhəbbət nəğməmi çala bilirsən
Qəmlənsəm könlümü ala bilirsən
Qəmlər can evimi yıxanda sən gəl!
Sən ki anlayırsan ‘düzü’ baxışdan
Eşq ilə alışıb yüzü baxışdan
Birdən ovunaram bəzi baxışdan
Gözəllər gözümə baxanda sən gəl!
Muradam, dözmərəm ülfəti qırsan
Səni səsləyəcəm nə qədər varsan
Eşq ilə alışsam, nalə qoparsam
Ahım səmalara çıxanda sən gəl!
15.05.2023.
Müəllif: Murad Eloğlu
Oxuyun >> Gözündə tük var