“Boşluqdan qaçıb” xilas, yəni nicat yolu axtaranda”həmfikri, daha doğrusu, “həmcinayəti” Nəcəf Əsgərzadə ilə iki dəfə “Fikir cinayətləri” üstündə tutulanda “Düşünən başlar ölkəsinə” qaçıb canını qurtarmaq istəyən Nicatın cinayət əməllərini öz ədalət məhkəməmdə ədalətli hakim kimi çözüb ona amnistiya vermişəm. Fikirləşmişəm ki, belə cinayətləri gənclər nə qədər çox etsələr, yəni belə silsilə cinayət sahibləri olsalar “İşığımız sönməyəcəkdir”.
Nicat gənc yaşlarından rahat yaşamaq yolundan imtina edib “vicdanlı insan rahat yaşaya bilməz” fəlsəfi düşüncəsinə sadiqdir. Əlbəttə, indi də gəncdi, düşüncələri isə qos-qoca.
Nicat sözlə o qədər kübar davranır ki, “bizim məmləkətimizin insanları (əlbəttə, bəziləri) unutqan (yəni manqurtabənzər) deyil, sadəcə xatırlamaq istəmirlər” yazır.
Nicat səhv eləmirəmsə, beş kitab müəllifidir. Hər kitabı yazanda özünə sual verir: “mən niyə yazıram?!” Tezliklə altıncı dəfə özünə bu sualı verəcək. Ürəyinin, təxəyyülünün, istedadının hökmüylə yazır, onların əmrindən çıxa bilmir, daha dəqiq desəm, çıxmaq istəmir.
Yaz, Nicat, yaz, HƏQİQƏTi yazmaq ali missiyadır, sivil mübarizədir. Nə olsun ki, sən missioner deyilsən? Həqiqət yalandan fərqli olaraq, çılpaqlığı ilə gözəldir. Elə çılpaq gözəllikdən yaz, ona heç vaxt pafosla don geydirmə. Qoy donsuz qalsın. Eybəcər, kor gözlülər onsuz da həqiqəti sevmirlər.
Nicat bəyə Cəfər Cabbarlının Sonası, Markesə yazı makinası almaq üçün nişan üzüyünü satan Mersedesi, Lev Tolstoyun nəhəng “Hərb və sülh” romanının yeddi dəfə üzünü köçürən Sofyası, dekabristlərin xanımları kimi cəfakeş, vəfalı, milli ruhumuza uyğun desəm, halal süd əmmiş el gözəli, ömür-gün yoldaşı, sirdaşı arzulayıram. Bu arzum tezliklə çin olsun. Hər kəsin uğurunun bir qismi də cəfakeş, dözümlü xanımının payına düşür. Çexov həqiqəti deyirdi: “qadınla yaşamaq olmur, qadınsız da”.
Bir də tez-tez özün özünə “mən niyə yazıram?!” deyəsən…
Agile Azerbaijan International Summit 2024 – Böyük uğur
22 oktyabr 2024-cü il tarixində keçirilən Agile Azerbaijan International Summit böyük uğurla başa çatdı və 300-dən çox iştirakçını bir araya gətirdi. “Synergy in Action” mövzusu altında keçirilən tədbirdə məruzələr, panel müzakirələri və praktik məşğələlər təqdim olundu.
Əsas spiker Askhat Urazbaev Agile metodologiyasının inkişafı ilə bağlı çıxış etdi. Ardınca, Maxim Evdokimov (Kapital Bank, CPO) tərəfindən moderasiya olunan Leadership Panel baş tutdu. Burada Calal Orucov (PASHA Bank, İdarə heyətinin üzvü, COO), Samir Məmmədov (PASHA Pay, CEO) və Rüstəm Məmmədov (PASHA Life, COO) Agile-in biznesə təsiri ilə bağlı müzakirələr apardılar.
Tədbirdə dünya səviyyəli ekspertlər aşağıdakı mövzuları təqdim etdilər:
Magdalena Firlit – “From Gut Feeling to Informed Decisions in Product Management”
Maria Glonti – “Failing Forward: Power of Premortems in Agile Teams”
Anna Suvorova – “Overcoming Resistance in Agile Transformation and What is Next”
John Coleman – OKR-lar üzrə müzakirələr və seminarlar
Ahmet Ozcan və Murat Yurdakul – “QBR: Is It Enough to Drive Impact in an Ecosystem”
Sammitin xüsusi məqamlarından biri Kapital Bank-dan Samirə Əliyeva tərəfindən moderasiya olunan “Epic Agility: We Don’t Talk About That at Work” mövzusunda keçirilən Exchange Panel oldu. Burada Qismət Babayev, Şahnaz Nuri və Nərminə Əliyeva mühim mövzuları müzakirə etdilər.
AI və Agile proseslərinin inteqrasiyasına xüsusi diqqət ayrıldı. Dinesh Sharma “Leveraging AI for Enhanced Agility”, Nəriman Əsədov isə “Transforming Banking: Our Journey to Implementing AI in Products” mövzularında çıxış etdilər.
Tədbir Trendyol-un Agile transformasiya təcrübəsini paylaşan Erhan Harmankaya-nın təqdimatı ilə yekunlaşdı. Sammit, iştirakçılara Agile innovasiyasını təşkilatlarında tətbiq etmək üçün yeni strategiyalar təqdim etdi.
Sammit Kapital Bank-ın eksklüziv sponsorluğu, PASHA Bank və PASHA Həyatın platin sponsorluğu, PASHA Pay-in gold sponsorluğu ilə keçirildi.
Daha çox məlumat üçün: https://agileazerbaijan.com/
“Xəzan” jurnalının sentyabr-oktyabr, 2024 sayı çapdan çıxıb. Bu, jurnalın cari ildə çıxan növbəti payız saylarından biridir. Jurnal 2016-cı ildən davamlı olaraq ən azı iki ayda bir dəfə çıxır. Növbəti nömrə 98 səhifədir. Bu nömrədə jurnalın redaksiya heyəti şair ƏHMƏD HAQSEVƏRİ 70 yaşı münasibətilə təbrik edib. Onun yaradıcılığına həsr olunmuş iki yazı (Nəsib Abid və Arzu Heydərovanın) və şairin yaradıcılığından nümunələr jurnalın səhifələrində yerləşdirilmişdir. Eyni zamanda özbək ədəbiyyatından nümunələr də daxil olmaqla jurnalın növbəti sayında rəngarəng poeziya və nəsr nümunələri çap olunmuşdur. Beləliklə, jurnalda çap olunan materialların yazı düzümü aşağıdakı kimidir:
Redaktor guşəsi -“Sərgi, yarmarka, yoxsa kitab bazarı?”
Publisistika -Nəsib ABİD – “Uşaq dünyasına sevgi şairi” (Əhməd Haqsevərin 70 yaşına) -Arzu HEYDƏROVA – “Yurdumun haqsevər şairi” (Ə.Haqsevərin yaradıcılığı haqqında) -Şahlar HACIYEV – “Cavabsız suallara cavab axtarışı” (Əli bəy Azərinin “İki zəngəzurlu zabit” romanı haqqında) -Əhməd HAQSEVƏR – “Fəridə Köçərli yaradıcılığının özünəməxsusluğu” -Əli BƏY AZƏRİ – “Damət Salmanoğlunun şeirləri özbək dilində” -Ülviyyə ƏBÜLFƏZQIZI – “Yazıçı müstəntiq deyil ki, təsvir etdiyi hadisələrin səbəblərini araşdırsın” (Yazıçı Əli bəy Azəri ilə müsahibə) -Təranə DƏMİR – “Səmimiyyətdən yoğrulan şeirlər” (Zaur Ustac yaradıcılığı haqqında) -Ramiz İSMAYIL – “Dərin mənalı bayatılar” (Həqiqət Şamillinin “Rəssam, çək şəklimi” kitabı haqqında) -Fəridə HİCRAN – “Həqiqət Şamillinin vətənpərvərlik şeirləri”
Tanınmış qələm adamı Təranə Dəmirin sayca doqquzuncu kitabı işıq üzü görüb. Özünün xüsusi ənənələri olan “Maarif” nəşriyyatında nəfis şəkildə tərtib olunaraq, nəşr olunmuş kitabın redaktoru Qulu Ağsəsdir.
Qısa arayış: Təranə Dəmir – Dəmirova Təranə Ağaqardaş qızı – 1970-ci il dekabrın 16-da Sabirabad rayonunun Kolanı kəndində anadan olub. Kolanı kənd orta məktəbini medalla bitirib. 1988-1993-cü illərdə BDU-nun jurnalistika fakültəsində təhsil alıb. AYB-nin və AJB-nin üzvüdür. 9 kitab müəllifidir. Şeirləri lap gənc yaşlarından dərc olunur. Dəfələrlə AzTv-nin müxtəlif proqramlarında qonaq olub. İndi də müxtəlif mətbu orqanlarda dərc olunur. Ailəlidir, iki övladı var.
Əlamətdar hadisə barədə sevincini Təranə xanım sosial şəbəkə hesabından: Təranə Dəmir – “Qulu Ağsəsin redaktorluğu ilə “Sərhədsiz sərhədlər ” işıq üzü gördü. “Maarif” nəşriyyatına və əməyi keçən hər kəsə dərin təşəkkürümü bildirirəm.” – məzmunlu paylaşım edərək, öz izləyicilərilə bölüşüb.
“YAZARLAR” olaraq, TƏRANƏ xanımı təbrik edir, qarışdakı bütün həyat və fəaliyyətində yeni-yeni nailiyyətlər arzulayırıq! Uğurlarınız bol olsun!
Daşkənddə “Mədəni İrs Beynəlxalq həftəsi” çərçivəsində “Yeni Özbəkistanda mədəniyyət və incəsənət sahəsində islahatlar” adlı forum keçirilib.
Forumda Özbəkistanın mədəniyyət naziri Azadbek Nazarbekov, TÜRKSOY-un Baş katibi Sultan Rayev, TÜRKPA-nın Baş katibi Mehmet Surayya Er, Türk Mədəniyyəti və İrsi Fondunun prezidenti Aktota Raimkulova, tanınmış Azərbaycan yazıçısı, tarixi romanlar müəllifi Yunus Oğuz, Türkiyə, Fransa, Qazaxıstan, Qırğızıstan, Tatarıstan və digər respublikalardan nümayəndələr iştirak edib.
Forumu Azadbek Nazarbekov açaraq Türk dünyasında əlaqələrin daha da genişləndirilməsi, inteqrasiya proseslərinin gücləndirilməsi istiqamətində görülən işlərdən danışıb. Nazir deyib ki, bizim əcdadlarımız maariflənməyi cəhalətdən üstün tutublar, öz ağıl və bacarıqlarını elmin və mədəniyyətin inkişafına sərf ediblər. Xarəzmi, Fərqani, əl-Biruni və Zəməxşari bu torpaqda birdən-birə yaranmayıb. Əlişir Nəvai və Babur Mirzə anadan şair doğulmayıb. Dünyada tanınan bu böyük alimlər, filosoflar və ədibləri yaşadıqları dövrün elmi və mədəni mühiti yetişdirib.
Sonra Sultan Rayev, Mehmet Surayya Er, Aktota Raimkulova və başqaları mədəniyyət və incəsənət sahəsində Özbəkistanda və digər Türk dövlətlərində mədəniyyət və incəsənət sahəsində aparılan islahatlardan danışıblar.
Sultan Rayev qeyd edib ki, Özbəkistanın Mərkəzi Asiya respublikaları və Türk dünyası ilə bütün sahələrdə apardığı praqmatik xarici siyasət bu dövlətlər arasında münasibətlərin daha da möhkəmlənməsinə, mədəni-humanitar istiqamətdə əlaqələrin dərinləşdirilməsinə xidmət edir. TÜRKSOY çərçivəsində münasibətlərin inkişafı yeni mərhələyə qədəm qoyub. Təşkilatın üzvü olan bütün dövlətlərdə, o cümlədən Özbəkistanda və digər qardaş respublikalarda mədəniyyət və incəsənət günləri, gənclər və teatr festivalları, yaradıcılıq forumları və digər bu kimi tədbirlər keçirilir ki, bu da TÜRKSOY-un və bütün Türk dünyası mədəniyyət nazirliklərinin maraq dairəsindədir.
Yunus Oğuz Türk dövlətlərində mədəniyyətin inkişafı sahəsində TÜRKSOY-un rolunu yüksək qiymətləndirib, böyük Azərbaycan şairi Hüseyn Cavidin şeirindən bir beyt söyləyib:Turana qılıncdan daha kəskin, ulu qüvvət, Yalnız mədəniyyət, mədəniyyət, mədəniyyət!
O, Türk Dövlətləri Təşkilatının bütün sahələrdə, o cümlədən mədəniyyət istiqamətindəki rolundan söhbət açıb, təşkilatın üzvü olan dövlət başçılarının dostluğunu ön plana çəkib. Azərbaycan və Özbəkistan prezidentləri İlham Əliyevlə Şavkat Mirziyoyevin yaxlın dostluq münasibətləri təbii ki, mədəniyyətlərimizin inkişafına böyük təsir göstərir. Bu sözləri digər türk dövlətlərinin başçıları haqqında da demək olar.
O ki qaldı Azərbaycan və Özbəkistanın mədəni sahədə əməkdaşlığına, o nə bu gün, nə də dünən yaranıb, bu əlaqələrin min illik tarixi var. Böyük strateq və sərkərdə Əmir Teymurun Azərbaycanda olması, qışlamanı Qarabağda keçirməsi faktı heç kəsə sirr deyil. Əmir Teymur Azərbaycanda olarkən Beyləqanı tikib, oraya su kəməri çəkib. Böyük sərkərdə deyib:”Dilimiz bir, dinimiz bir, mədəniyyətimiz bir, tanrımız birdir”.
Bir zamanlar Azərbaycanda “Molla Nəsrəddin” jurnalı çap edilib, bu jurnalın Özbəkistanda abunəçiləri olub, Azərbaycan türkcəsində olan bu jurnalı özbəklər alıb, oxuyub və anlayıblar, biz o vaxtlar bir-birimizi daha yaxşı başa düşürdük.
Sonra Yunus Oğuz “Əmir Teymur” romanını Azadbek Nazarbekova təqdim edib.
Olaylar.az xəbər verir ki, yazıçı-publisist, tarixi romanlar müəllifi Yunus Oğuz sözügedən tədbir çərçivəsində Türk Mədəniyyəti və İrsi Fondunun prezidenti Aktotı Raimkulova ilə də görüşüb. Görüşdə türk dünyası ədəbiyyatı və irsinin yaşadılması,inkişaf etdirilməsi yönündə müzakirələr aparılıb. Söhbət zamanı bu sahədə yaxın və uzaq hədəflərdən danışılıb.
Təklifinizi, şikayətinizi bizə yazın. Sizi dinlərik. 055 634 88 31
Bakı Dövlət Universiteti ilə Azərbaycan Milli Kitabxanası arasında əməkdaşlığa dair anlaşma memorandumu imzalanıb
Oktyabrın 25-də Bakı Dövlət Universitetində (BDU) bu təhsil ocağı ilə Azərbaycan Milli Kitabxanası arasında əməkdaşlıq haqqında anlaşma memorandumu imzalanıb və BDU-nun İnformasiya və sənəd menecmenti fakültəsində Milli Kitabxananın xüsusi auditoriyasının açılışı keçirilib.
Memorandumu BDU-nun rektoru Elçin Babayev, Milli Kitabxananın direktoru Kərim Tahirov imzalayıblar.
Sənəddə BDU ilə Milli Kitabxana arasında müasir kitabxana texnologiyaları, rəqəmsal xidmətlər və süni intellekt texnologiyaları sahəsində birgə layihələrin hazırlanması, innovativ tədqiqat laboratoriyaları və tədris məkanlarının yaradılması, gənclərin və təhsilalanların elmi-mədəni inkişafını dəstəkləyən layihələrin həyata keçirilməsi, eləcə də rəqəmsal informasiya resurslarının inteqrasiyası, elektron resurs mübadiləsinin təşkili, rəqəmsal kitabxana xidmətlərinin birləşdirilməsi və genişləndirilməsi, Milli Kitabxananın elektron arxivlərinə BDU-nun təhsilalan və tədqiqatçılarının çıxışının təmin edilməsi nəzərdə tutulur.
Eyni zamanda memorandumda Azərbaycan elmi, tarixi, mədəni irsi ilə bağlı mövzularda müxtəlif səpkili birgə tədbirlərin təşkili, müştərək nəşr layihələrinin həyata keçirilməsi əksini tapıb. Bundan əlavə, kitab fondlarının birgə istifadəsi, kitab mübadiləsi və yeni elmi ədəbiyyatın təmin edilməsi, xüsusilə nadir kitabların, arxiv materiallarının tədqiqi və mühafizəsi sahəsində əməkdaşlıq da sənəddə qeyd olunub.
Mərasimdə çıxış edən mədəniyyət naziri Adil Kərimli BDU-da Milli Kitabxananın xüsusi auditoriyasının açılmasının elm, təhsil və mədəniyyət ictimaiyyəti üçün önəmli hadisə olduğunu deyib. Bildirilib ki, Ümummilli lider Heydər Əliyev Bakı Dövlət Universitetini Azərbaycan xalqının milli sərvəti kimi qiymətləndirib. Azərbaycan Milli Kitabxanası da ölkə mədəniyyətinin əsas mərkəzlərindən biridir: “BDU-da yüksəkixtisaslı kadrların yetişdirilməsi işinə daim dəstək göstərməyə hazırıq. Mədəniyyət sahəsində elm və təhsilin inkişafı prioritetlərimizdən biridir. Bu auditoriyadan universitetin professor-müəllim heyəti, tələbə və tədqiqatçıları faydalanacaq”. Nazir çıxışında həmçinin son illərdə BDU-da magistratura səviyyəsində mədəniyyət hüququ ixtisaslaşmasının yaradılmasının əhəmiyyətini də yüksək qiymətləndirib.
BDU-nun rektoru Elçin Babayev qeyd edib ki, universitetdə müasir dövrün çağırışlarına cavab verən yeni texnologiyaların tətbiqinə xüsusi önəm verilir, əmək bazarının tələblərinə uyğun yeni ixtisas və ixtisaslaşmalar açılır. Xüsusi auditoriyanın açılışı ilə yanaşı, BDU və Azərbaycan Milli Kitabxanası arasında bu gün imzalanan anlaşma memorandumu da əməkdaşlıq baxımından yeni imkanlar yaradır.
Qeyd edək ki, açılış mərasimində Milli Məclisin Elm və Təhsil Komitəsinin sədri Anar İsgəndərov, Mədəniyyət Komitəsinin sədr müavini Günay Əfəndiyeva, Azərbaycanda Atatürk Mərkəzinin direktoru akademik Nizami Cəfərov, ziyalılar və alimlər iştirak ediblər.
Mənbə və Ətraflı: https://www.millikitabxana.az/news/baki-dovlet-universiteti-ile-azzerbaycan-milli-kitabxanasi-arasinda-emekdashliga-dair-anlashma-memorandumu-imzalanib
Qubadlı şəhəri günü – bütün şəhidlərimizi rəhmətlə anırıq… Hər bir ifadənin yaddaşda konkret ekvivalent anlamı var. Bu qayda texnalogiya və insan üçün keçərlidir (hətta süni intellektdə də belədir). Qubadlı kəlməsi oxuyan və ya eşidən kimi gözümün önündə rəhmətlik Vüqar öz əzəməti, vüqarı ilə canlanır… Kənardan baxanda üfürsən yıxılar kimi ilkin olaraq yalnış təsəvvür yaradan bu cılız (artıq yüklərdən azad) bədəndə nə qədər böyük güc, enerji, əzm, qürur, vüqar var imiş, İlahi!? … Tale elə gətirib ki, xidmət dövründə Vətən Müharibəsi Qəhrəmanı Ağayev Vüqar (1999-2000) Ordubadda, Milli Qəhrəman Şükür Həmidovla (Qubadlıdan) (2000- 2002) Şahbuzda yollarımız kəsşib… Hər ikisi yaddaşımda nümunəvi şəxsiyyət kimi qalıb… Rəhmətlik Ağayev Vüqarın həyat hekayəsi isə heç bir dastana sığmayacaq qədər müdhiş bir reallıqdır…
Bu qeydlər bütün şişirtmə və pafosdan uzaq sadə bir yol yoldaşının, silahdaşın ürək ağrısı (yanğısı) ilə qələmə aldığı incə, hələlik həyatda olan hamının diqqət etməli olduğu məqamdan ibarətdir. Məqsədi, məramı da elə bu diqqətdir! Xatırlatmadır! Yaxşı ki, hələ həyatda sözümə qüvvət verəcək yol yoldaşları var: Mehdi Mahmudov , Şahin Əbdürrəhmanov , Mövsüm Mövsümov və başqaları… Şəhidlərimizin şəhərlərimiz naminə nələri qurban verdiklərini unutmayaq! Sadəcə Allah rəhmət eləsin… – deyib keçməyək! Adı …t dəftərində də olmayan ЖЕК müdirlərindən tutmuş ən yuxarı distansiyalara qədər diqqətli olaq… Rəhmətlik Həmdəmin timsalında yazdığım “SƏNƏTİN SEÇDİYİ ADAM” məqaləsi İlqara, Vüqara, Şükürə, kapitan Seyidova, mayor Quliyevə və digər real həyatda şəxsən tanıdığım – indi aramızda olmayan – onlarla qəhrəmana eyni dərəcədə aiddir… Yeri gəlmişkən dəyərli Qardaşımız Xan Resuloglu ( Xan Resuloglu ) da Qubadlıdandır!!! Həyatda olan-olmayan mərd insanlar, günümüz mübarək!!!
Bu günlərdə məşhur Türkiyə yazıçısı Rəşad Nuri Güntəkinin (1889-1956) yaradıcılığında önəmli yer tutan “Dəyirman” romanı yenidən yayınlanmışdır. İlk dəfə Azərbaycan oxucularına 1994-cü ildə kiril əlifbasında təqdim olunan romanı “Kritika” nəşriyyatının yenidən yayınlaması əsərin aktuallığı, ideya müasirliyi, dərin sosial məzmunu ilə bağlıdır. Azərbaycan türkcəsinə yazıçı Vaqif Sultanlının uyğunlaşdırdığı romanda Osmanlının İmperiyasının son dönəmlərində Anadolunun mərkəzdən uzaq, yoxsul bir qəsəbə olan Sarıpinar əyalətində uydurma zəlzələ xəbərinin böyüyərək ölkənin və bütövlükdə dünyanın gündəminə gəlməsi satirik üslubda təsvir edilir.
Əsərdə rəhbər vəzifədə çalışanların daxili-mənəvi dünyası canlandırılmış, fərdi xarakter cizgiləri ilə seçilən səriştəsiz, intriqaçı dövlət məmuru tipləri yaradılmışdır.
Romandan hasil olan sonuc budur ki, vazifə sahibləri olmayan hadisələri sanki baş vermiş kimi göstərməklə, yanlışları ört-basdır etməklə zəncirvari şəkildə daha böyük problemlərə yol açır, idarəçilik sistemini gülüş hədəfinə çevirərək dövlətin nüfuzunu zədələyir.
Qeyd edək ki, 1987-ci ildə Türkiyədə “Dəyirman” romanının motivləri əsasında Barış Pirhasanın ssenarisi əsasında Atıf Yılmaz tərəfindən eyniadlı bədii film çəkilmişdir.
