SƏYAHƏT
İmkan ola, bir ömür dünya səyahətinə çıxasan.
Gözlərini qıyıb, Yaponiyadan Amerikaya baxasan, elə oradan Nyu- Yorka, Vaşinqtona güllər atasan… Göylərindən atom- atom, çiçək yağa, ləçək yağa… Sonra gəlib, Amerikadan başlayasan utanmağa…
Keçəsən ordan Kanadaya, yaşıl çəmənliklərdə, möhtəşəm bir ağacın altda süfrə sərəsən, yeyib- içib dincələsən. Dincəlməkdən yorulasan, bezəsə, lap uzqlara baxasan, Avstraliyada kenqurulara göz vurasan… Gəlib çıxdın dünyadan ayrı düşmüş qitə- adaya, kisələrdə pul yox, colux- cocux görəsən. Öz- özündən fikir, xəyal hörəsən.
Üzüb gedəsən Antarkitidaya, buz dağlarda gəzəsən, qar yağa qar aləmlərə, üşüyəsən, sonra yavaş- yavaş sən də orda donasan, buz içində buz parçası olasan…
Erkən yazda əriyəsən, Afrikaya axasan. Qara- qara, başda lələy, əldə nizə gəzəsən, xəyalında keçmişini görəsən. Avropadan gələn ağlar, təbiəti, insanları qaralayır, yaralayır… Qucaq – qucaq qan içində hərnə gördü qamarlayır…
Ağarıb gedəsən Avropaya, çıxasan Eyfel qülləsinə Afrikadan üzr istəyəsən, baxıb Londona, Berlinə əsalı qitəyə gülümsəyəsən.
Gedəsən, gedəsən Evrestə çıxasan. Üçrəngli bayraq taxasan, görünsün dünyanın hər yerindən, öpəsən rənglərindən. Ordan Şuşaya əl eyləyəsən, Şəhidlərə rəhmət deyəsən!
Enib gələsən vətənə,
Görəsən dost- yoldaş çıxıb gedib,
Təkcə sən qalıbsan pir çinar,
Öpəsən üçrəngli torpağını,
Cənnət elə səniymişsən!- deyəsən,
Azərbaycanda öləsən.
Müəllif: Sadıq QARAYEV
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru