SƏHV SALIB
Dünyanın kədəri göylərdən düşüb,
Cahanı Tanrının özü səhv salıb.
Tale yollarına vaxtsız çən düşüb,
Təbiət qış ilə yazı səhv salıb.
Bəm olan ömrümün zili gəlməyib,
Arzunun, həvəsin seli gəlməyib.
Ya bəxt yarıtmağa əli gəlməyib,
Ya Tanrı yazanda sözü səhv salıb.
Taleyim bezibdir amandan, daha,
Çoxu əl çəkibdir imandan, daha.
Günahım günahkar zamandı daha,
Doğrunu aldadıb, düzü səhv salıb.
Sona, gün görmədim bəxtin yolunda,
Tellərim ağardı qəm qırovunda.
Ürək hey çırpınır dərd tilovunda,
Onu həyatın bəd üzü səhv salıb.
Müəllif: SONA ABBASƏLİQIZI
Oxuyun >> Gözündə tük var
Zaur Ustacın şeirləri haqqında