Bu yaşda
Ötsə də baharım, itsə də yazım
Bir canlıq gəzirəm canda bu yaşda
Coşub çağlayıram kəsərim olsun
Paslanıb qalmaram qında bu yaşda.
Gözəllər bağına baxıb sezirəm
Bağların ən zərif gülün üzürəm
Mən hələ bir dəli sevgi gəzirəm
Eşq ilə qaynayır qan da bu yaşda.
Kim deyir fanidir, yalandır həyat?
Bacarsan həyatın olar toy, büsat
Ömür qabaqdadır demə ay Murad
Alış da bu yaşda, yan da bu yaşda.
16.03.2021.
Müəllif: Murad Eloğlu
Oxuyun >> Gözündə tük var