ƏSGƏR ANASI
“Cəsur döyüşçü” və “Suqovuşanın azad edilməsinə görə” medalları ilə təltif edilmiş əsgər Murad Hüseynovun anası Şəhla xanımın timsalında bütün əsgər analarına həsr olunur…
Evi isti olsa da,
özünü soyuq səngərdə sanar,
əsgər anası.
Xörəyi soyuyar qarşısında,
keçmişə boylanar,
qüssə içində gülümsəyər və
öz-özünə söylənər:
“-Ac deyilsən ki, balası?”
Yığar, bükər, bağlayar,
hər şeyin ən yaxşısını
ona saxlayar…
Bir gözü gülər, bir gözü ağlayar,
həmişə narahat, səksəkədə olar,
əsgər anası.
Hər kəsdən əvvəl oyanar,
Yaradana dua edər uzun-uzun,
balasını tapşırar, əsgər anası.
Telefonu həmişə yanında saxlayar,
gecələr baş ucuna qoyar,
bütün zəngləri onunku sanar və
zəng gəlincə ürəyi çırpınar,
səsini duyunca sanki, yenidən doğular,
əsgər anası.
Günləri sayar, təqvimi vərəqləyər,
yağışda üşüyər, qarda titrəyər,
əsgər anası.
…O bir vəfalı qadın, cəfakeş ana,
Vətən üçün oğul böyüdər,
Buna görə adı Vətənlə qoşa öyülər
Ana Vətən olar,
Vətən Ana,
Cənnət ayağının altında,
Mübarək qadındı
əsgər anası…
BİR PAYIZDI, BİR DƏ MƏN
Baxıram heç bənzəmir
Fəsillər adamlara.
Payıza bax, möhtəşəm!
Bir də, yaşananlara…
Payız nə mehribandı
Günəşi gülümsəyir.
Yağışın damlaları
Könlümdə rəqs eləyir…
Külək mənə bənzəyir
Gah küsür, gah da gülür.
Həzin-həzin əsəndə
Heyva qoxusu gəlir.
Sanki dünya boş qalıb
Bir payızdı, bir də mən.
Yarpaq qonur çiynimə
Pıçıldayır: “Çəkmə qəm!”
QUŞLAR HİMNİ OXUYUR
Yuxudan oyanıb görəm
Bir möcüzə baş verib.
Görəm qapımın ağzına
Çiçəklər xalı sərib.
Hər bir tərəf ağaclardı
Quşlar himni oxuyur.
Dünya elə qəribədi,
Hava çox xoş qoxulu.
Tut tökülür ot üstünə
Uşaqlar, quşlar yeyir.
Tut satan qonşu yox deyə,
Anam dua eləyir…
QAR DƏNƏSİ
Gəl, bir türkü söyləyək,
Qar dənəsi, səninlə.
Qəlbim sınıq-sınıqdı
Apar məni özünlə.
Billəm, yox olacaqsan
Varlığa gülə-gülə.
Mən də yoxam onsuz da
Əridim gilə-gilə.
Bu ağ-qara dünyada
Buz bağlayıb qapılar.
Kimsəm yox, qar dənəsi
Məni özünlə apar…
KÜLƏK
Ay külək, sən də mənimtək
Bərk hirslisən, deyəsən.
Yerə-göyə sığışmırsan
Ağacları döyürsən.
Əsəbimi sərtliyinlə
Ora-bura çırpırsan.
Görürsən ki, dincəlmədim
Bir segah qaldırırsan.
Nə yaxşı ki, varsan, külək
Ürəyimdə əsirsən.
Mənimlə nəğmə deyirsən,
Mənimlə bir küsürsən.
BİR CÜT QUŞ KİMİ…
Bir cüt quş kimi
İki balam var.
Səs-səsə verib
Hey oxuşurlar.
Kimsə qəlb qırır
Gülməyə qoymur.
Bu nəğmə məni
Olməyə qoymur.
BİR KƏLMƏ ÇAY
…Hərdən hər şey sözə dönür
dilində
Bir də gördün çaşıb deyir:
“Ay uşaqlar, icazə verin,
bir kəlmə çay süzüm özümə…”
YAĞIŞ YUYAR KƏDƏRİMİ
Yağış yağır… çox sevirəm
Yağışı seyr etməyi.
Yağışın sehrinə düşüb
Uzaqlara getməyi…
Balaca bir dünya qurub
Oynaram uşaq kimi.
Yağış yuyar kədərimi,
Görən tanımaz məni.
Həyat necə ürək yaxan
Qəmli nəğmə, hey kədər.
Hərdən bəxtəvər oluram
Yağışın ömrü qədər…
Bax, yenə də bir div gəlib,
Gözəl dünyamı yıxır.
Başım elə qarışıb ki,
Bir də görrəm od yağır…
NƏ YAXŞI
Nə yaxşı qonaq oluruq
Çox qalmırıq dünyada.
Üstü bəzək, içi soyuq,
Ürəyi buz dünyada.
Adamlar niyə ağlayır
Görən ondan ötəri?
Hər gün ölüb-dirildiyi
Bir aləmdən ötəri.
Şənbə günü sıxılıram
Nə yaxşı ki, bazar var.
Nə yaxşı bazardan sonra
Həm həyat, həm məzar var.
ADAM İSTƏSƏ…
…Avtobusa bənövşə mindi, deyəsən
Bənövşə qoxusu bürüdü aləmi…
Demək, adam istəsə bənövşə olar,
qızılgül olar, günəş olar, bulud olar…
Adam istəsə dünyanı dəyişər –
Müharibələr olmaz, uşaqlar ölməz…
Amma o, dünyaya kin bəsləyir…
Adam İNSAN olmaq istəmir hələ
robot olmaq istəyir…
Müəllif: Mina RƏŞİD
YAZARLAR.AZ
===============================================
<<<<<<WWW.YAZARLAR.AZ və WWW.BİTİK.AZ >>>>>>
Əlaqə: Tel: (+994) 70-390-39-93 E-mail: zauryazar@mail.ru
