ЕЛГЕ САҒЫНЫШ

Өмир өзи сондай дейди адамлар,
Жасаўдың кәрўанын тартып барады.
Жас минген соң ойлап хожалығыңды,
Турмыс тәшиўишлери артып барады…

Безип үйден, алысларға атланып,
Қайнаған жаныңды қалпып барады.
Биреў жетер жетпес, биреў байлықлы,
Дәўранын қайра басып, шалқып барады…

Патшалық дәўирим балалық дәўран,
Шилтер көйлек кийип ойнаған тойда.
Жумыс аўырласса енди ол әрман,
Шаңғытып ойнаған жаслығым қайда?..

Гезип Қызкеткенниң жағаларында,
Бахытлы ҳәр күни атқан таңларым.
Қол ушы көтерип бетимнен сүйген,
Қаяқта баўырман туўысқанларым…

Гөззал көшелери Нөкис қаламның,
Жап жарық сүтиндей жарқырап турған.
Ыссы шөреклери жаўған Анамның,
Ҳәзир алысларда қайларда қалған ?…

Сағынаман Ана топырақ жеримди,
Сағынаман саҳра Арал шөлимди.
Бәлент жерге шығып қарай беремен,
Сағынаман Қарақалпақтай елимди…

Ақтөбе

YAZAR: BİBİMƏRYƏM

BİBİMƏRYƏMİN DİGƏR YAZILARI

КЕЎИЛ ЖАЗЫП БИР АЙЛАНЫП ҚАЙТПАСАМ

Тәшиўиши таўсылмас өткинши күнниң,
Дәртлериңди ақ қағазға айтпасаң.
Өзиң ойламасаң, ойлайды кимиң ?
Кеўил жазып бир айланып қайтпасам.

Әрманлар жүрекке толып баратыр,
Денлериң саў болып тыныш уйықласаң.
Наўқаслық асықпа дейди ,,тура – тур”,
Кеўил жазып бир айланып қайтпасам.

Неше жыллар шықпай үйден сарсылып,
Ана деген қәдиримди жойтпасам.
Наўқаспан деп айтыўғада арсынып,
Ҳаўа өзгертип бир айланып қайтпасам.

Таярланып бүгин жолды гөзледим,
Көрейин басқа жер
ҳаўаларынан.
Дениме саўлық ҳәм шыпа изледим,
Ақтөбе тәрептиң қалаларынан.

Ыңылдап ишимнен нәжатлар тилеп,
Тиленип Аллаға зикир айтайын.
Солай деп мендеги соғып тур жүрек,
Кеўил жазып бир айланып қайтайын.

19 – сентябрь 2025 жыл.

YAZAR: BİBİMƏRYƏM

BİBİMƏRYƏMİN DİGƏR YAZILARI

Кимсесиз жайлаўда жүрсемде азып,
Қыяллар сүремен кеўлим қулазып.
Қайларға кетеди арзыў әрманлар,
Муҳаббат туйғысы мен ушын азық.

Барымды илдирип сулыў денеме,
Жолыңа ашықтай қарағым келер.
Қашан келер екен ақ атлы кимсе,
Адам ойларына келмейди нелер…

YAZAR: BİBİMƏRYƏM

BİBİMƏRYƏMİN DİGƏR YAZILARI

ГҮЗГИ ТОЛҒАНЫС

Көргим келди, гүзги мәўрит тоғайды,
Алтын сыя түске енип атырған.
Қәлбим кимди дейди, кимди сорайды?.
Алыс – алыслардан илҳәм шақырған…

Бунша бояў берген қайсы сүўреткеш,
Қызыл, жасыл, сары көркемлик етип.
Ана тәбиятым сәлем Әссалам,
Сени көрмек ушын келдим мен жетип…

Бир гәпи бар еди айтқан ағайдың,
Зейниң ашылар деп кеўил сарайдың.
Және кеўлим ғаплет ойларға баттым,
“Тарзаны” бармекен деп мына тоғайдың…

Кинода көргендей кеп кетсе екен,
Сени сүйдим десе, деп кетсе екен.
Белимнен қушақлап, шақтан шақларға,
Деген қыял келер ап кетсе екен…

Гүзги көриниске көзим тоймады,
Тоғай жарасығы менде бир гүлмен.
Қараң тәбиятты, қараң гүзимди,
Сениң қушағыңда тентиреп жүрмен…

YAZAR: BİBİMƏRYƏM

BİBİMƏRYƏMİN DİGƏR YAZILARI

Күн темасына :

АҚ ОРАМАЛ ТАРТҚАН ҚЫЗ

Бурынғының үлгиси,
Мыйығында күлкиси.
Қазағымның бир қызы,
Ақ ораммал тартқан қыз.

Дәстүр – салтын әдемлеп,
Самоварда чай демлеп.
Усынар кеўлин жәмлеп,
Ақ орамал тартқан қыз.

Ески салтын умытпай,
Ақ отаўда бир жулдыз.
Бар хызметин аямас,
Ақ орамал тартқан қыз.

Оранып бақ бостанға,
Сырын айтпас душпанға.
Жасамақта тап ҳәзир
Қарақалпақстанда,
Ақ орамал тартқан қыз.

YAZAR: BİBİMƏRYƏM

BİBİMƏRYƏMİN DİGƏR YAZILARI

ЖҮЗ ЖАС ПЕНЕН ЖҮЗЛЕСКЕН
МАМАМЫЗ ГҮЛЗАБИРА
ӘЖЕМИЗГЕ

 АЛТЫН   ТОЙ

Бүгин ,, Орнек ” халқы жайнап жаснаған,
Дәстүр – салтын қолларында услаған.
Бир әсирлик уллы тойды баслаған,
Нсийип етип атыр бүгин Алтын той!..

Жүз жыл..аңсат емес айтылыўғада,
Тирисиз ҳақың жоқ жойтылыўғада.
Жеткерди қудайым той қылыўға да,
Бүгин уллы халқым берер
Алтын той!…

Ала – сапыранлы өткен көп күнлер,
Тәшиўиш қуўанышты арқалап кимлер.
Ҳажыныяз Ешинияз, Карамаддинлер,
Олар арзыў еткен бүгин Алтын той!…

Айтсаң өткен өмир үлкен тарыйх бул,
Сиңли – апа жайнап турған қызыл гүл.
Сиңлилери Оралхан ҳәм Генжегүл,
Ҳәммениң арзыўсы бүгин Алтын той!…

Алла өмир берди ҳәмде қоллады,
Талай қуўандырды талай алдады.
Мына заман келди, әрман қалмады,
Шүкирликте несийп етти Алтын той!…

Ақлық шаўлық қуўлық көрген көзлери,
Оларға сабақтай басқан излери.
Қызыл гүлдей орар жанып жүзлери,
Қәдирдан мамада бүгин Алтын той!…

Жайна Мамажаным қайта жасарып,
Отырмаң өткинши ойларға талып,
Қылған мәртлигиңди сыйлайды халық,
Қуўанышта бөлисейик Алтын той!…

Әжим басқан жүзиң жыллар дизбеги,
Мегзейсиз мийўеге пискен гүздеги.
Мыналар нәўшелер еккен издеги,
Бүгин шадланбақта болып Алтын той!…

Қандай бахыт жүз жас пенен жүзлесиў,
Жаңа заман менен тарыйх тиллесиў.
Дәўир басқышлары шәртли мингесиў,
Соны басқан мамам бүгин Алтын той!…

Сиздей уллы инсан заты көп келгей,
Ҳәммениде жасыңызға жеткергей.
Уллы тойды ойнап күлип өткергей,
Мамажаным қутлы болсын Алтын той !…..

Жансая ( Бийбимәрьям )
Утамбетова
23-Октябрь күнине 2025 жыл

YAZAR: BİBİMƏRYƏM

BİBİMƏRYƏMİN DİGƏR YAZILARI