WWW.YAZARLAR.AZ

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Təvəkkül Goruslu – A kəndim

İyul 26, 2024 www.bitik.az Bir şərh yazın

A KƏNDİM

Mənim uşaqlığım, gəncliyim səndə,
qalıbdı, özümə qaytar, a kəndim.
Dinim, təhəmmülüm, dincliyim səndə,
qalıbdı, özümə qaytar, a kəndim.

Mənim ocaq yerim, mənim pir yerim,
Mənim xeyir yerim, mənim şər yerim,
Məni mən eyləyən səndə hər yerim,
qalıbdı, özümə qaytar, a kəndim.

Mənim evim səndə, eşiyim səndə,
Taxta sınıq- salxaq beşiyim səndə,
Layla oxunulan “keşiyim” səndə,
qalıbdı, özümə qaytar, a kəndim.

Mənim ” ana” deyən dillərim səndə,
Məktəbə getdiyim yollarım səndə,
Ən şirin, ən məsum illərim səndə,
qalıbdı, özümə qaytar, a kəndim.

Diləməm mən səndən nə gül, nə yarpaq,
Halalın adının adaşı bulaq,
Ölürkən mərzindən bir ovuc torpaq,
Dirilər gözümə atar, a kəndim!

2024

Müəllif: Təvəkkül GORUSLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

BU YAYIN BÜRKÜSÜ NƏFƏSLƏR KƏSİR

İyul 21, 2024 www.bitik.az Bir şərh yazın

BU YAYIN BÜRKÜSÜ NƏFƏSLƏR KƏSİR

Səması tutqundu görünmür günəş,
Can yaxır alovdan sonrakı atəş,
Yaşıl tarlaları eyləyib küləş,
Bu yayın bürküsü nəfəslər kəsir!

Tutqun göyün altda qovrulur torpaq,
Ağacda, kollarda tərpənmir yarpaq,
Yağışsız, yağmursuz, havası quraq,
Bu yayın bürküsü nəfəslər kəsir!

Küləyi səngiyib, durğundu hava,
Təndiri andırır quşlara yuva,
Sellənə buludu yanğından sova,
Bu yayın bürküsü nəfəslər kəsir!

Fərq etmir gecəsi, səhər, axşamı,
Günorta andırır əriyən şamı.
Allahım, qəbul et aciz duamı…
Bu yayın bürküsü nəfəslər kəsir!

2024

Müəllif: Təvəkkül GORUSLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Təvəkkül Goruslu – ŞUŞAYA QOYMAYIN BİZİ – şeir

İyul 17, 2024 www.bitik.az Bir şərh yazın

ŞUŞAYA QOYMAYIN BİZİ

Özünüz yüz kərə, min kərə gedin,
Siz Allah Şuşaya qoymayın bizi!
Torpağın, qayasın ziyarət edin,
Siz Allah Şuşaya qoymayın bizi!

Bizdən turust olmaz Şuşa yönünə,
Qoyun həsrət qalaq azad gününə,
Özünüz keyf edin düzü, eninə,
Siz Allah Şuşaya qoymayın bizi!

Qoy Şuşa bizimçün mələyə dönsün,
Əlçatmaz, ünyetməz diləyə dönsün,
Yenə də alınmaz qalaya dönsün,
Siz Allah Şuşaya qoymayın bizi!

Duyub sevincini gülərik birdən,
Sevinc gözyaşların silərik birdən,
Qəlbimiz tab etməz, ölərik birdən,
Siz Allah Şuşaya qoymayın bizi!

Qoy yolu sizlərə “su yolu ” olsun,
Sinəniz vüqarla, qürurla dolsun,
Qoymayın sevinən “yad qulu ” olsun,
Siz Allah Şuşaya qoymayın bizi!

Qələbə çalsaq da həsrət çəkirik,
Yenə də sailik, yenə fəqirik,
Xarıbülbülü də burada əkirik,
Siz Allah Şuşaya qoymayın bizi!

Qoymayın yoluna izimiz düşər,
Göz dəyər, hüsnünə gözümüz düşər,
Vəsfinə bir misra sözümüz düşər,
Siz Allah Şuşaya qoymayın bizi!

2024

Müəllif: Təvəkkül GORUSLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Təvəkkül Goruslunun doğum günüdür!

İyul 1, 2024 www.bitik.az Bir şərh yazın

YAZARLAR cameəsi adından Azərbaycan Yazıçılar Birliyinin üzvü, tanınmış şair Təvəkkül GORUSLU nu doğum günü münasibətilə təbrik edir, qarşıdakı bütün fəaliyyətində yeni-yeni nailiyyətlər arzulayırıq!
Hörmətlə: Zaur USTAC

Təvəkkül GORUSLUnun öz doğum gününə yazdığı şeiri sizə təqdim edirik:

ÖMÜR QAT

Bir ömür yaşadım əlimdə qələm,
Rəqəmlər, hərflər həyanım oldu.
Bir ömür rəqəmlər oldusa şələm,
Hərflər söz olub, duyanım oldu.

Həm ondan, həm bundan yaranan dünya,
Bir yandan cəbr oldu, bir yandan atəş.
Rəqəmə həkk olub daranan dünya,
Hərfə pənah etdi, doğuldu günəş.

“Ol”,dedi Yaradan, tək bircə kəlmə,
Gücü bəyan oldu ikicə hərfin!
Hələ də bir sirdir, indi də elmə,
Bilən yox varlığın gizli tərəfin.

Qapılıb rəqəmə, qapılıb hərfə,
Deyəsən dərinə baş vurdum, heyhat.
Tanrıdan ömr adlı qoyulan zərfə,
Hərəyə dünyadı verilən həyat.

Mənə də bu zərfdən biri verildi,
Verildi, xoşbəxtəm, bəşərəm mən də.
Önümə kainat, dünya sərildi,
Duam var Tanrıya, doğum günümdə!

Deyirlər təzədən bölünür dünya,
Cavabsız sorudan doğur min soru.
Vədəsiz doğuşdan boğulur dünya,
Tanrım, millətimi, ölkəmi qoru!

Mənim də ömrümə bir az ömür qat,
Duyum qələmimin səsi, ününü.
Qədim torpaqlarım olunca azad,
Vəsf edim Vətənin bütöv gününü!

2024

Məlumatı hazırladı: Tuncay ŞƏHRİLİ

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Təvəkkül Goruslu – SÖZÜ İÇİNDƏ

May 12, 2024 www.bitik.az Bir şərh yazın

SÖZÜ İÇİNDƏ

Rahatlıq gətirmir, ha danış, ha çöz,
Qəlbində yaralar açılıb göz- göz.
Daha pöhrələmir sözləri söz- söz,
Dindirmə, öləni sözü içində!

Gözləri nursuzdu, baxışları lal,
Dəymişi budaqda, töküləni kal,
Duyğusu kütləşib…soruşma əhval,
Dindirmə, öləni özü içində!

Üzlərdən içincə üzlünün üzü,
Düzlərdə qalıbdı düzlünün düzü,
Odur ki, yerimir sözlünün sözü,
Dindirmə, öləni düzü içində!

Ha çalış köhnədən biçilməz təzə,
Goruslu yorulub, gəlibdi dizə,
Ölənin nəşini bükərlər bezə,
Dindirmə, öləni bezi içində!

2024

Müəllif: Təvəkkül GORUSLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Təvəkkül Goruslu – Sevməz

May 7, 2024 www.bitik.az Bir şərh yazın

SEVMƏZ

Ömrümüz, günümüz fələk oyunu,
Daha seçmək olmur qurdu, qoyunu.
İnsan anlamırsa kökü , soyunu,
Vətənini sevməz, xalqını sevməz!

Bəndə meyl eləyib əqlə, kamala,
Gərək xidmət etsin saf bir amala.
Hərissə dövlətə, hərissə mala,
Vətənini sevməz, xalqını sevməz!

Ötüşər əsrlər, dəyişər zaman,
Dil olar milləti yaşadan loğman.
Öz doğma dilini sevməyən insan,
Vətənini sevməz, xalqını sevməz!

Vətən torpağının yeyənlər barın,
Sevirsə gülünü sevəcək xarın.
Sevmirsə anasın, sevmirsə yarın,
Vətənini sevməz, xalqını sevməz!

Dünya vəfasızsa, ömür qısasa,
Dəyişməz insanı təsbehlə, əsa.
İmanı allahsız, dini saxtasa,
Vətənini sevməz, xalqını sevməz!

05.05.2017.

Müəllif: Təvəkkül GORUSLU

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Təvəkkül Goruslu – ÖTƏSİ YALAN

Aprel 24, 2024 www.bitik.az Bir şərh yazın

ÖTƏSİ YALAN

İnsanın doğulub böyüdüyü yer,
Könlünə, ruhuna ilk sevgi, ilk yar,
Yox belə intizar, yox belə qubar,
Vətən həsrətindən ötəsi yalan!

Yolunu gözləyən iki göz kimi,
Bağrını yandıran isti köz kimi,
Dodağın çatladan iti söz kimi,
Vətən həsrətindən ötəsi yalan!

Gecələr röyayla, yuxuyla gələn,
Nəfəsin təngidən…göz yaşın silən,
Oyancaq rəsmiylə gözündə ölən,
Vətən həsrətindən ötəsi yalan!

İllərdi ətrini ala bilməyən,
İnciyib özünə bala bilməyən,
Öləndə məzarın ola bilməyən,
Vətən həsrətindən ötəsi yalan!

Deyirlər zamandır məlhəm hər şeyə,
Bəxtsiz sevənlərə, ərə, kişiyə,
Yurd, ocaq həsrəti başqa haşiyə,
Vətən həsrətindən ötəsi yalan!

2024

Müəllif: Təvəkkül GORUSLU

TUNCAY ŞƏHRİLİNİN KİTABI

===============================================

<<<< WWW.YAZARLAR.AZ və WWW.USTAC.AZ >>>>

Əlaqə: Tel: (+994) 70-390-39-93 E-mail: zauryazar@mail.ru

www.USTAC.az

Azərbaycan Yazıçılar Birliyinin üzvü tanınmış şair Təvəkkül GORUSLUnun “Damcı izi…” adlı yeni kitabı işıq üzü görüb.

Aprel 23, 2024 www.bitik.az Bir şərh yazın

Azərbaycan Yazıçılar Birliyinin üzvü tanınmış şair Təvəkkül GORUSLUnun “Damcı izi…” adlı yeni kitabı işıq üzü görüb. Sözə dəyər verən Şakir Həsənovun maliyyə dəstəyilə “Adiloğlu” nəşriyyatında ərsəyə gəlmiş kitabın naşiri Zaur Qafarzadə, redaktoru isə Zaur Ustacdır.

Kitaba ön sözü Əli Kərim adına Sumqayıt şəhər Poeziya Evinin direktoru görkəmli şair İBRAHİM İLYASLI yazıb.

Dəyərli şeirsevər oxucularımız kitabı Bakı şəhərində 28 may metrosunun yaxınlığında yerləşən KİTABEVİM.AZ kitab evindən əldə edə bilərlər.

YAZARLAR olaraq, TƏVƏKKÜL müəllimi KİTAB və MÜƏLLİF günündə belə gözəl nailiyyət münasibətilə təbrik edir, yeni-yeni nailiyyətlər arzulayırıq!! Uğurlarınız bol olsun, TƏVƏKKÜL müəllim!

Məlumatı hazırladı: Tuncay ŞƏHRİLİ

YENİ KİTAB İŞIQ ÜZÜ GÖRÜB