Yaman kövrəlmişəm
Yaman kövrəlmişəm bu günlər, ana,
Oyan, həzin layla çal mənim üçün.
Uyuyum, səsinin sehrinə düşüm,
Oyan, həzin layla çal mənim üçün…
Sənin bənzərin var Aya, Günəşə,
Ocaqda qovrulan közə, atəşə,
Ana, sənsiz ruhum çat verən şüşə…
Oyan, həzin layla çal mənim üçün…
Axı gözüm həsrət çiçəyə, gülə,
Dönmüşəm çəmənsiz xarıbülbülə,
Dur, boya dünyamı bəyaz, ağ tülə,
Oyan, həzin layla çal mənim üçün…
Bir payız axşamı düşüb sorağa,
İsti qucaq açdın, ana, torpağa,
Qucduğun topağa ollam sadağa,
Oyan, həzin layla çal mənim üçün…
Bürüyüb dövrəmi zülmət, qaranlıq,
Sevinc üz döndərib, ömür viranlıq,
Qayıt həyatıma, qayıt bir anlıq,
Oyan, həzin layla çal mənim üçün…
05.08.2016
Müəllif: Naibə YUSİF
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
