گزدیم
گزدیم قاریش-قاریش وطن تورپاغین
هر داغدا، درهده ایزیم وار منیم
هله کئچیلمهمیش اوجا داغلارین
اوجا زیروهسینده گؤزوم وار منیم
گزدیم یورولمادان آرانی، داغی
سئیر ائتدیم ان اوجا چمنی، داغی
هئچواقت قیمامادیم زامانی، چاغی
چوخ بولاق باشیندا اوزوم وار منیم
گزدیم بو تورپاغی من اویماق، اویماق
ان عادی داشا دا اولموشام قوناق
هر اوتون، چیچهیین حالین سوراراق
سینهمه ییغدیغیم سؤزوم وار منیم!!!
مؤلیف: زائور اوستاج