QADAN ALIM
Həsrətin canımı yandırıb-yaxır,
Külümü sovurur yel, qadan alım!
İki kipriyimin arasındasan,
Yumum gözlərimi gəl, qadan alım!
Gəl nəfəs-nəfəsə, qucaq-qucağa,
Sarılıb Səninlə sarılı qalım,
Mən gündə yüz dəfə ölləm Səninçün,
Mənimlə bir dəfə öl, qadan alım!
Vəfasız yar kimi ömür bivəfa,
Gedir karvanımız düzülüb safa,
Gəl keçən anları incitək sapa,
Düzüb gərdanıma sal, qadan alım!
Bal kimi zəhərsən, zəhərtək balsan,
Başqası sənə yar, sən mənə Yarsan,
Yaxşı ki, görmüşəm, yaxşı ki, varsan,
Uzaqdan-uzağa Yar, qadan alım!
Düşmüşəm sevdanın mən tək, selinə,
Batdıqca batıram, enirəm dərinə,
Əlimi uzadıb sənin əlinə,
Gəl çıxaq bu seldən bir, qadan alım!
Müəllif: QƏNDAB
Zaur Ustacın “Buta”sı haqqında
Oxuyun >> Gözündə tük var