Ətrafında sevənin, Oğul, uşaq, nəvənin, Ləzzətini güvənin Dada bilsən, oğulsan!
Dərd bükməsin qolunu, Nə sağını, solunu. Əzrayılın yolunu Güdə bilsən, oğulsan!
İNCƏYƏ YAĞIŞ YAĞIR Gün batır, axşam çökür, Göyə bax, ahmır tökür. Elə bil hönkür-hönkür İncəyə yağış yağır.
Palçığı sözə baxmır, Tutduğunu buraxmır. Suyu sellənib axmır, İncəyə yağış yağır.
Nərğizə bax, oyanmır, Sarı rəngə boyanmır. Neçə gündü dayanmır, İncəyə yağış yağır.
Günü güzəranı yox, Dayanmır, amanı yox. Bu palçıqda canı yox, İncəyə yağış yağır.
İslandıqca kürəyim, Buza dönür ürəyim. Biləmmirəm nə deyim?! İncəyə yağış yağır.
Keçib amandan ahdan, Qorxusu yox sabahdan. Bərəkəti Allahdan, İncəyə yağış yağır.
DİL VURAN ARANIN SÖHBƏTİ BİTMİR Bu yaşda bir şeyi anlayammıram, Dil niyə dinc durmur, kimisə satır. İnsanıq, söz deyib danlayammıram, Mənim gücüm ancaq sözümə çatır.
Şuğulluq qədimdən köhnə sənətdi, Donluğu danışan dilə bağlıdı. Belə götürəndə bir qarış ətdi, Deyəsən qazancı yaman yağlıdı.
Burda alət olan kəlmədi, sözdü, Dilinə dolayıb çatdırır sənə. Bilsə ki, hər işi qarsayan közdü, Bəlkə cana doyar, yorular çənə.
Məndən sənə demək, səndən də mənə, Sən demə peşəymiş, çox qədim peşə. Utanmır, iyrənmir, usanmır yenə, Fərasəti budur, keçirdir işə.
Sözün qabağında yalmanmaz kişi, Çəkinməz, nə varsa düzünü söylər. Görüm zəhrimara dönsün o işi, Səni el içində bir qəpik eylər.
Qeybətin bir ucu sənin əlində, Danışma, ayıqdı, söz güdür çoxu. İnsanı danışdır, nə var dilində, Oxu sifətindən, gözündən oxu.
Kişiyə yaraşmaz, yapışmaz qəti, Qeybətin səs-küyü yaddaşdan itmir. Möhkəm tut ağzında yüz qram əti, Dil vuran aranın söhbəti bitmir.
AĞILLI İNSANA SÖZ GƏRƏK DEYİL Ağlımdan nə keçir, başıma gəlir, Vallah çəkinirəm nəsə deməyə. Kimə danışıram qımışıb gülür, Bircə yazıq səbrim gəlir köməyə.
Yaxşıya dəyişmir görürəm illər, Ruhum çox yorulub, rahatlıq gəzər. Bu gün çəkdiyimi sabah silirlər, Yoxsa bu ağrıya səbirmi dözər.
Gəzib dolaşıram başımı qatıb, Bircə rahat olum, yorulum yatım. Köhnə fikirləri ağlımdan atıb, İlahi, kömək ol, yetmişə çatım.
Bilirəm taleyim sözümə baxmır, Yazılı kitabdı ağzı qapalı. Nə mənə gün verir, nə də buraxmır, Bir gülən görmədim məni tapalı.
Bilirəm ömürdü, qismətim bəlli, Taleyin quluyam, yüz gərək deyil. Bir gün deyib-gülmək yalnız təsəlli, Ağıllı insana söz gərək deyil.
GƏRAYLI Nə yaxşının, nə də pisin, Başı gora titrəməsin. Yüz yaşayıb ölən kəsin, Günahını yuyanı var.
Dəlisinin danlayanı, Bir nəsilin sonluyanı, Hər ocağın anlayanı, Ağıllısı, duyanı var.
Çayı, salı, bu bərəni, Dam üstündə hər kərəni, Dünya adlı bir kürəni Öz yerinə qoyanı var.
Kim ayrılır, gözü nəmdi, Günü qara, bəxti kəmdi. Hamı keçən bir dönəmdi, Günlərini sayanı var.
Baxsan, dünya bir möcüzə, Özü köhnə, sözü təzə. Murad görür gəzə-gəzə, Bundan betər o yanı var.
TURAN ELLƏRİNİN SÖZ ÇƏLƏNGİ (nəşr olunmuş bir yeni kitabın təqdimatı) Son günlər nəşr olunmuş yeni kitabım Odlar Yurdu Azərbaycan tarixində bir ilk imza sayılan bədii əsər, əslində isə ədəbi məcmuə və antalogiyadır. Bu kitab milli kimlik, türkçülük, Turan və turançılıq məfkurəsi ilə bağlı maraqlı məlumatlarla yanaşı, şairlər diyarı olan doğma Cəlilabad ədəbi mühitinin nümayəndələrindən bir qrup şairin uyğun mövzuda qələmə aldıqları bir-birindən qürurlu və dərinmənalı şeirlərin toplusudur.
Ümumi məlumat: Kitabın adı: “Turan ellərinin söz çələngi” (Ədəbi məcmuə) Müəllif: İlqar İsmayılzadə Nəşrə hazırlayan: “Həməşəra” mətbu orqanı Naşir: “Elm və təhsil” nəşriyyatı, Bakı Nəşr olunduğu il: 2026 Çap növbəsi: Birinci Kağız formatı: 60×90 1/16 Səhifə sayı: 104 səhifə.
Kitab barədə: Milli kimlik, türkçülük, Turan və turançılıq məfkurəsi mövzusunda qələmə alınaraq tərtib edilmiş və nəfis şəkildə işıq üzü görmüş həmin kitab Azərbaycan Yazıçılar Birliyinin üzvü, Turan Yazarlar Birliyinin sədri, Turan Xalq şairi, “Turan Ödülü” və “Həməşəra” Fəxri Diplomu laureatı, ədəbiyyatşünas, ədəbi təhlilçi və tənqidçi, türkoloq, aşıq, yazıçı-şair Ustad Niftalı Göyçəli, Əmək veteranı və Əmək zərbəçisi, “Həməşəra” və “Dədə Qorqud” Fəxri Diplomları laureatı, təqaüdçü pedaqoq Hacı Paşa Rüstəmov və “Musavat” Partiyasının Cəlilabad Rayon Təşkilatının sədri, tarix müəllimi, qazi atası, “Həməşəra” Fəxri Diplomu laureatı Azər Əsgər müəllimin rəyləri ilə başlamış, müəllifin ön sözü ilə davam etmişdir. Bunun ardınca kitabın içindəkilər aşağıda göstərilən iki əsas fəsildə hazırlanmış və təqdim edilmişdir: Birinci fəsil: Türk kimliyi və turançiliq: kökdən məfkurəyə; İkinci fəsil: Turan ellərinin söz çələngi. İlk fəsildə milli kimlik, Türk, Turan, turançılıq məfkurəsi, Türklərin ilk inanc sesitemi, Turan ideyasının yaranma tarixi və Türk Dövlətləri Təşkilatı (TDT) barədə zəruri və maraqlı bilgilər, ikinci fəsildə isə yalnız Cəlilabad ədəbi mühitinə aid olan 20-dən çox şairin türkçülük, Turan və turançılıq məfkurəsi mövzusunda qələmə aldıqları şeir və poeziya nümunələri təqdim edilmişdir. Burada şeirləri təqdim edilmiş şairlər arasında Azərbaycan Yazıçılar Birliyi və Turan Yazarlar Birliyinin üzvləri olan ustad şairlərlə yanaşı, orta yaşlı və gənc şairlərimiz də yer almışdır… Kitab mövzusu və yazılış üslubuna görə təkcə Cəlilabad rayonu və ölkənin Cənub bölgəsi deyil, bütün respublika səviyyəsində ilk imza olaraq səciyyələndirilə bilər. Məlumat üçün qeyd etmək lazımdır ki, bu ədəbi məcmuə indiyədək işıq üzü görmüş sayca 54-cü kitabımdır.
Təşəkkür və arzular! Fürsətdən istifadə edib, bu layihədə iştirak etmiş və ədəbi məcmuədə şeirləri dərc edilmiş dəyərli şairlərimizı ürəkdən təbrik edir, eyni halda ədəbi məcmuənin nəşrində fəstəyi olmuş bütün dəyərli xanımlar və bəylərə, ustad şairlərimizə, həmçinin, bu ədəbi topluya rəy yazmış əziz və dəyərli ustadlarımız və ziyalı simalarımız: Ustad Niftalı Göyçəliyə, ziyalı pedaqoq Hacı Paşa Rüstəmova və ziyalı pedaqoq Azər Əsgərə öz səmimi minnətdarlığımı bildirir, Ulu Tanrıdan onların hər birinə uzun, sağlam və mənalı-məsud ömür, yeni-yeni yaradıcılıq uğurları diləyirəm! Bu arada “Elm və təhsil” nəşriyyatının rəhbərliyi və bacarıqlı əməkdaşlarına, xüsusilə də texniki redaktor Rövşanə xanım Nizamiqızına və peşəkar dizayner Zahid bəy Məmmədova göstərdikləri diqqət, peşəkarlıq və səmimiyyətə görə təşəkkürümü bildirir, onların hər birinə işlərində davamlı uğurlar diləyirəm! Son olaraq bu ədəbi-milli toplunun öz milli kimliyimizə dəyərli bir töhfə olacağına inanır, onun müasir və gələcək nəsillərimiz üçün faydalı bir ədəbi ərməğan olacağına ümid edirəm!
İlqar İsmayılzadə fəlsəfə üzrə fəlsəfə doktoru, “Həməşəra” mətbu orqanının təsisçisi və baş redaktoru, AJB, AYB və TYB-nin üzvü, TYB-nin İdarə Heyətinin üzvü, “Ziyadar” Mükafatı, “Qızıl Qələm” və “Zəfər” Media Mükafatları, TYB-nin xüsusi ödülü və “Həməşəra” Fəxri Diplomu laureatı, teoloq, araşdırmaçı, tərcüməçi, yazıçı-publisist 19.05.2026
ANAMA Hərə bir az atdı səni, Hərə bir azca qoydu tək. Səndən gedən ilk biz olduq, Sən bizi sevdin sonadək.
Öncə atam qoyub getdi Beş uşaqla bu dünyadan. Bizsə evdən doyub getdik, əvvəl bacım, sonrasa mən.
Daha sonra qardaşlarım Bir-bir öpüb atdı səni. Bir boş yuva, bir ana quş, Dərd önünə qatdı səni.
***
Ən böyük ürəklər anada olar, Övladın yetimi anadan olar. Sən çox çalışdın ki, biz “adam” olaq, Biz “adam” olanda tapmadıq səni. İstərdin böyüyüb tez yaşa dolaq, Biz yaşa dolanda tapmadıq səni. Müəllif: QABİL NƏBİ
