Metamorfoz
İnsan həyatının ilk illərində başqalarının həqiqətləri ilə yaşayır. Ona deyilənləri doğru qəbul edir, öyrədilən qaydaları isə dəyişməz qanun hesab edir. Lakin zaman keçdikcə həyat elə sınaqlar gətirir ki, illərlə inandığın düşüncələr bir-bir çatlayıb dağılır. Məhz o an anlayırsan ki, həqiqət hazır şəkildə heç kimə verilmir. Hər kəs onu öz yolunda, öz səhvləri, itkiləri və seçimləri ilə kəşf edir.
Bəlkə də insan üçün ən böyük təhlükə yalan eşitmək deyil, eşitdiyini sorğulamadan həqiqət kimi qəbul etməkdir. Sorğulanmayan fikir zaman keçdikcə inanca çevrilir, inanc isə bəzən insanı reallıqdan uzaqlaşdırır. Halbuki həqiqət rahatlıq vəd etmir. O, bəzən bütün bildiklərini dağıdır, səni sarsıdır, amma eyni zamanda gözlərini açır və həyata daha ayıq baxmağı öyrədir.
Həyatın ən qiymətli dərsləri məktəb partalarının arxasında keçirilmir, kitabların son səhifəsində yazılmır. Onlar gecənin səssizliyində peşmanlıqlarla üz-üzə qaldığın anlarda, səni dəyişən ayrılıqlarda, güvəndiyin insanların xəyanətində və hər şey bitmiş kimi görünərkən yenidən ayağa qalxmaq məcburiyyətində qaldığın anlarda gizlənir.
Ona görə də hər deyilənə inanmağa tələsmə. Hər fikri öz ağlından, hər həqiqəti isə öz vicdanından keçir. Çünki başqaları sənə yolu göstərə bilər, amma o yolu necə gedəcəyini, harada dayanacağını və kimə çevriləcəyini yalnız həyatın özü öyrədə bilər.
Müəllif: Dəniz Aslanlı
Dəniz Aslanlının digər yazıları
Oxuyun >> Gözündə tük var