Laçında qürub çağı. Fotoqraf: Natəvan Uğurlu
QÜRUB VAXTI QƏRQ OLMAĞIN ŞEİRİ
Mənə çox da qərib gəlməz suların yadı,
Fırtınalar qərq olmağa doğma ad sayır.
Adam var ki, başı batmış, adam var adı,
Sinəm altda ürək dolu ağrı çağlayır.
Üzmək olmur sərt dalğalar önü kəsəndə,
Ümmanların yaddaşında bəlkə də varıq.
Bu qaydadır – istəsən də, istəməsən də,
Biz qürubda unudulmuş son şüalarıq.
Əl-qol atmaq mənasızdır alatoranda,
Nə fərqi var, qopsa tufan, yağsa qar daha.
Yolu azmış bir gəmiyəm düşüb boranda,
Göz qırpmaz gəlişimə mayaklar daha.
Bir arzu da suya düşdü ümid səfimdən,
İstəmirəm nə danışa, nə dinə ağrı.
Bir cərəyan ötüb keçdi sağ tərəfimdən,
Sol yanımda ürək adlı bir sinə ağrı…
Müəllif: SÜLEYMAN ABDULLA
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru