1927-ci ildə görkəmli bəstəkarlarımız Üzeyir bəy Hacıbəyov və Müslüm bəy Maqomayev ilk dəfə olaraq “Azərbaycan türk el nəğmələri” kitabını cap etdirirlər. 33 xalq mahnısından ibarət topluda xalq mahnılarını Üzeyir bəy və Müslüm bəy nota almlşlar. Kitab Müslüm bəy Maqomayevin ümumi redaktorluğu ilə çap olunub.
Bu nadir kitabın əldə olunmasında göstərdiyi əvəzsiz xidmətlərinə görə araşdırmaçı – jurnalist Dilqəm Əhmədə təşəkkür edirik!
Təhsildə inkişaf və innovasiyalar üzrə IX qrant müsabiqəsinin nəticələri elan olunub
Etibar Babayev adına Qax şəhər 4 nömrəli tam orta ümumitəhsil məktəbi adından böyük sevinc hissi ilə bildiririk ki, məktəbimizin iki dəyərli müəllimi müsabiqənin qalibi olublar!
Şahin Abdurrahmanov “Əmanətlərin sağlam gələcəyinin keşiyində” layihəsi və Nurlanə Əzimova “Rəqəmlərin dünyasında addımla” layihəsi fərqlənib.
Əmink ki, bu layihələrin uğurlu icrası, təhsilin inkişafına əhəmiyyətli dərəcədə töhfə verəcəkdir.
Dəyərli müəllimlərimiz, sizinlə fəxr edir, uğurlarınızın davamını arzulayırıq!
Etibar Babayev adına Qax şəhər 4 nömrəli tam orta ümumitəhsil məktəbi
ŞAİR MÜBARİZ SÜLEYMANLI YARADICILIĞINDAN
BAL KİMİ GƏTİRİN DİLƏ HÖRMƏTİ
Gədalar, nadanlar meydan sulayır,
Yaltaqlar ortada quyruq bulayır…
Acgözlər kasıbın malıın talayır,
Güyaki edirlər belə hörməti.
Binamus danışır abır-həyadan,
Oğru kündə tutur haram mayadan…
Kimlər razı qalar belə dünyadan?!
Odurki veririk yelə, hörməti!
Nə böyük bilinir, nədə ki kiçik,
Tula tək hürməyə tələsir küçük..!
Ömür çox qısadır,könülsə incik,
Bəs nədən atırıq çölə hörməti?
Kəsəri azalıb kişi sözünün,
Yeri çox görünür elin gözünün…
İnsandı varlığı bu yer üzünün,
Qaytarın yenidən elə hörməti!
Sözə slğal çəkin, haqqı səsləyin,
Dosta sadiq olub,sevgi bəsləyin…
Ağsaqqal, ağbirçək yolun gözləyin,
Bal kimi gətirin dilə hörməti !
Vəfasız zamandan bezdi, Mübariz !
Yaşayıb,hər dərdə dözdü, Mübariz !
Dünyanı dolaşıb, gəzdi Mübariz !
Çalışdı hər kəslə bölə hörməti!
YAXŞILIQ EYLƏSƏN, YARADAN BİLƏR
Heç vaxt könül qırıb ,ürəyə dəymə,
Sən qəlbi sevindir, onu şad eylə!
Varına güvənib , özünü öymə,
Axırı ölümdür ,onu yad eylə.
İsit fəqirlərin soyuq komasın,
Yoxsulun halını duymağı bacar!
Eşitsən, sızlayan bir körpə səsi,
Əl uzat, yardım et, qalmasın naçar !
Bir yardım edəndə elə car çəkmə,
Düşünki, Yaradan hər şeyi bilər!
Dünyanın varına gözünü dikmə,
Günahın olsada, mələklər silər !
Tanrını tanıyan ümidsiz olmaz,
O, arzu-istəyi Allahdan dilər…
Etdiyin yaxşılıq cavabsız qalmaz,
Saxla ürəyində, Yaradan bilər!
” Mülkü – Süleymana qalmayan dünya ” ,
Bəxti bağlılara qapılar açar….
Mübarizi yada salmayan dünya,
Axırda özüdə bil,qalar naçar!
BİR ŞEİR QALACAQ ELİN YADINDA
Bir koma görünür şair ocağı,
Bir şair ömrünün başlanacağı,
Ömrün bahar fəsli xoşbəxtlik çağı,
Bir elin obanın haray səsidi.
Bir tale görünür qapısı bağlı,
Bir sinə görürəm necə də dağlı,
Bir damla göz yaşı sirli-soraqlı,
Bir çayın çağlayan zümzüməsidi.
Bir günəş bəs edir cümlə-cahana,
Bir misra bəs edir onu duyana,
Kiçik hədiyyədir Azərbaycana,
Bilsinlər şairin bu haqq səsidi.
Bir hikmət yaşayır onun adında,
Bir sevgi qüruru var inadında,
Bir şeir qalacaq elin yadında,
Ömür karvanının fəlsəfəsidi.
B İ L M İ R Ə M
Əynimdə bir yırtıq çuxa,
Gəlləm yoxuş çıxa-çıxa.
Dünya adlı alaçığa,
Mən sahib ola bilmirəm.
Gördüm dostu, kirvəni də,
Badalağı, zərbəni də…
Mən lap uca zirvəni də,
Alınmaz qala billmirəm.
Ömrüm-günüm döyüş, cəngdir,
Ruhum göydə çərpələngdir.
Mənimki şirdir, pələngdir,
Mən tazı, tula bilmirəm
Ulayıram bir qurd kimi,
Qocalıram Qorqud kimi,
Hərdən qara bulud kimi,
Dolub boşala bilmirəm,
Dərddir o yanım, bu yanım,
Yoxdur həyanım, duyanım
Mən özümü bu dünyanın,
Yadına sala bilmirəm.
KİŞİLƏR
Yaşayar mərdanə ömür payını,
Haramı ömürdən silər kişilər!
İtirməz dünyanın haqqı –sayını,
Düşmənin bağrını dələr kişilər!
Dayanar kişitək sözünün üstə,
Çörəyi saxlayar gözünün üstə.
Qoymaz ləkə düşə izinin üstə,
Dünyanın dərdini bölər kişilər!
Qoruyar yağıdan doğma elini,
Qamətin düz tutar, əyməz belini..!
Uzadar kasıba kömək əlini,
Yurdunun qədrini bilər kişilər.
Unutmaz kəsdiyi duzu, çörəyi,
Köksündə döyünər məğrur ürəyi…
Yaxına buraxmaz hiylə-kələyi,
Dar anda hayına gələr kişilər!
Tanıyar soyunu, ulu babasın,
Qoruyar vicdanla, elin ,obasın!
Qalayar , içində insaf sobasın,
Yaltağa,rəzilə, gülər kişilər!
Papağı qeyrətdir,namusdur, ardır,
Vətənə arxadır ,sipərdir, yardır…!
Nə yaxşı həyatda kişilər vardır,
Bir dəfə yaşayıb,ölər kişilər!
SÖZÜN SÖZ OLSUN GƏRƏK
Başında papağın, altında atın,
Məqsədin, niyyətin düz olsun gərək.
Könlünü ram etsin ağıllı qadın
Sevincin, xoş günün yüz olsun gərək
Yediyin çörəyi etməsin zəhər,
Üzünə açılsın hər gün xoş səhər,
Canında qüvvətin,dizində təpər,
Kişitək hər sözün söz olsun gərək
Tanısın yerini, bilsin həddini
Qoymasın bükülə ər tək qəddini,
Aşmasın heç zaman sözün səddini
Küsüb barışmağa üz olsun gərək.
Gərəkdir nazını sən də çəkəsən,
Qayğıya, diqqətə, eşqə bükəsən.
İzi düşən yerə güllər əkəsən,
Atdığın hər addım öz olsun gərək.
ÇIXAR YADINDAN
Belə qandıraram səni,
Külə dandıraram səni,
Elə yandıraram səni, Odun da çıxar yadından.
Dumanını cinlədərəm,
Bir dərdini minlədərəm
Sazı bəmdə inlədərəm,
Udun da çıxar yadından
Qarsız edərəm qışını,
İlişdirərəm xışını, Dağıdaram yaddaşını,
Adın da çıxar yadından.
YAZILIB YADDAŞIMA
Atam ev tikən olub,
Ev yıxan olmayıb ki…
Yıxılandan yapışıb,
Xor baxan olmayıb ki….
Qabarlı əlləriyə,
Sığal çəkib başıma.
Hər müdrik nəsihəti,
Yazılıb yaddaşıma.
Anamın ocağında,
Qazanımız qaynayıb.
Nənəmin qucağında,
Xəyallarım oynayıb.
Qoymayıb utanaq biz,
Qonum – qonşu yanında.
Canı sızıldayanda,
Gizlədibdir canında.
Eldə, evdə ,eşikdə,
Sahib olub sözünə.
Alnı açıq, üzü ağ,
Baxıb elin gözünə !
Sözündə, söhbətində,
Məğrur bir kişi idi.
Yıxılana əl tutmaq,
Onun vərdişi idi.
MƏNSİZ
Yaşadığın ən uca dam,
Ən çox sevdiyin bir adam,
Bir gün sənə deyər,yadam
Nazlı sənəm ,gözü badam,
Gedər bir gün ,qalar sənsiz .
Verən yoxsa bir təsəlli
Ömür yolu olmaz bəlli,
Gözəl,göyçək şirin dilli
Tənha qalıb solar sənsiz
Zalımda heç olmaz vəfa
Xəbis adam tapmaz şəfa
Ömür boyu çəkər cəfa
Boyun büküb ölər sənsiz
Namərdin olmaz ürəyi,
Hey qurar, hiylə,kələyi,
Dizinin üstə çörəyi,
Halal malı bölər sənsiz
Ad da, san da ,şöhrət də,
Dil də,söz də,hikmət də,
Mal da,mülk də,sərvət də
Bir gün səndən gedər mənsiz
Müəllif: Mübariz SÜLEYMANLI (Ağaxan oğlu)
Azərbaycan Yazıçılar Birliyinin üzvü, teleradiojurnalist
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Ədəbiyyatımızın zadəgan qızı
Yüksək mədəniyyət, mehriban davranış, xeyirxahlıq kübarlıqdan irəli gəlir. Kübarlıq isə zadəganlıq əlamətidir, əsilzadələrə xas olur. Sadə, təvazökar, işgüzar və zəhmətkeş xanımdır. Yazıb-yartmaq, maarifləndirmək onun həyat kredosudur. Ərsəyə gətirdiyi əsərlərin hər biri insanlığa, mənəviyyata xidmət edir. Ünsiyyətdə nəzakətli və iltifatlıdır. Məhz elə bu keyfiyyətləri onu həmişə diqqət mərkəzində saxlayıb…
Gözəl adı var- Zemfira. Adının mənası ciddi, şanslı, aktiv və diqqətli deməkdir. Bir vaxtlar işğal altında olan torpaqlarımız uğrunda döyüşən fədakar qadınlar haqqında ərsəyə gətirdiyi “Qarabağ müharibəsi: zərif talelər” kitabı bəlkə də, bu mövzuda qələmə alınan ən gözəl publisist yazılar toplusudur. İndiyədək on beşə yaxın kitabı işıq üzü görüb. Onların əksəriyyətində məhz Qarabağdan söhbət açılır. Bu xanıma hakim kəsilən milli qeyrət, düşmənə nifrət yazdığı əsərlərdə də öz əksini tapıb. Bu da onun böyük vətənpərvər olduğunun təzahürüdür…
Deyir ki:- “Mən Qarabağ Veteran Qadınlar Təşkilatının fəxri üzvüyəm. İllər öncə, ilk təsis konfranslarında mənə üzvlük biletini təqdim etdilər. “Haqqımızda yazan, bizi tanıdan sizsiniz”,-deyirdilər. Bu sözlər mənim üçün qürurverici idi. Bayramlarda, həyatımın hansısa əlamətdar günündə, bəzən isə çətinlikləri olanda zəng edirlər. Kömək edə biləndə sevinirəm. Bizim üçün xüsusi bir gün var. 8 Mart Qadınlar Bayramı günü biz şənlik keçirmirik. Bir qucaq al qərənfillə Şəhidlər Xiyabanına gedir, bu müqəddəs məkanda uyuyan şəhid qızlarımızı yad edirik…”
1991-ci ildən mətbuatda həm də hərbi mövzuda yazılarla çıxış edir. Dəfələrlə “qaynar” nöqtələrdə olaraq Qarabağ müharibəsinin dəhşətləri, torpaqlarımızın bölünməzliyi uğrunda çarpışan oğul və qızlarımızın hünərini əks etdirən silsilə cəbhə reportajları hazırlayaraq dərc etdirib. 2010-cu ildə “Tərəqqi” medalına, 2018-ci ildə AYB-nin Beynəlxalq Rəsul Rza mükafatına layiq görülüb. 2018-2019-cu illərdə IX və X “The first” ödülləri ilə mükafatlandırılıb. Prezident mükafatçısıdır. 2003-cü ildə elmi iş müdafiə edərək pedaqogika üzrə fəlsəfə doktoru alimlik dərəcəsinə yiyələnib. Müəllifi olduğu bir sıra publisistik və bədii əsərləri ana dili ilə yanaşı rus, ingilis və türk dillərində çap olunub…
“Səmimi etiraf edim ki, ədəbi yaradıcılığımda bir telefon zəngi mühüm rol oynayıb. “Bakı” qəzetində işlədiyim zaman xalq şairi Hüseyn Abbaszadə mənə zəng etdi. 1997-ci ilin aprel ayı idi. Dedi ki, qızım mən sizin telefonunuzu xalq şairi Qabildən almışam. Onun əlində mənim ”Döyüşə qızlar gedir” kitabımı görübmüş. Sonradan bu kitabdakı sənədli hekayələrimi oxuyub və bəyənib. Böyük Vətən Müharibəsinin odlu yollarından keçən, sonradan “General” və “Qayıdanlardan biri” romanlarını qələmə alan yazıçımız məsləhət gördü ki, bədii yaradıcılığa başlayım. İnanın, məni əmin elədi ki, sizdə gözəl alınacaq. Ondan sonra bədii yaradıcılıqla məşğul olmağa başladım. “Ulduz”, “Azərbaycan”,”Yazıçı qadınlar” jurnallarında, “Söz”dərgisındə,”Ədəbiyyat”, “525-ci qəzet”, “Kaspi” və “Mir literaturı” qəzetlərində yazılarım dərc edilirdi.”- söyləyir.
Sadə, təvazökar, zəhmətsevər, işgüzar xanımdır. Məhsuldar işləməyi bacarır. Ərsəyə gətirdiyi əsərlərin hər biri mühüm tarixi hadisədir- insanlığa, mənəviyyata xidmət edir. Məhz, elə bu keyfiyyətləri onu həmişə diqqət mərkəzində saxlayır. Bir sözlə, yazıb-yartmaq, maarifləndirmək onun həyat kredosudur…
Deyir ki:- “Bəzən gənclərin “hüquqşünas olmaq istəyirdim, balım çatmadı, jurnalist oldum” kimi fikirlərinə rast gəlirik. Bu, günümüzün həqiqətləridir. Indiki Bakı Dövlətt Universitetinə qəbul olunduğumuz 1973-cü ili göz önünə gətirirəm. 50 yer uğrunda 1000-dən çox abituriyent mübarizə aparırdı. O vaxtlar test üsulu yox idi. 4 imtahanın hər birindən 4 qiymət alan neçə gənc bu fakültəyə qəbul oluna bilmədi. Bu müsabiqəyə qanı-canı ilə jurnalist olmaq istəyənlər qatılmışdı. Fəxr edirəm ki, Nəsir İmanquliyev, Şirməmməd Hüseynov, Qulu Xəlilli, Nurəddin Babayev, Nəriman Zeynalov, Famil Mehdi, Yalçın Əlizadə, Cahangir Məmmədli kimi müəllimlərdən dərs almışam. Qeyd edim ki, bu gün jurnalistikamızda ümid verən gənclər çoxdur. Bütün bunlara baxmayaraq, problemlər də qalmaqdadır. O zaman baş redaktorumuz Nəsir İmanquliyevin yaxşı bir sözü var idi. Deyirdi ki, yazını gərək elə yazasan ki, sim kimi cingildəsin. İndi isə dil qaydalarının pozulması yaralı yerimizdir. Özüm təmiz üslubun tərəfdarı olduğumdan bəsit, cılız, qrammatik qaydalara riayət edilməyən yazılara düşmənəm. Bu xüsusiyyətimə görə də inanın ki, bütün yazılarıma divan tuturam…”
Çox gözəl xanımdır. Onun yardımsevər, həssas, nəcib və incə olması bu gözəlliyə xüsusi rəng qatır. Bundan əlavə başqalarının qayğısına qalmaq və yaxşılıq etmək onun üçün əsl həyat nümunəsidir. Odur ki, xoş duyğularla yaşayan insanlara qarşı nəzakətli və mehribandır. İşlərini elə qurur ki, uğur yolunda gərəksiz maneələrlə üzləşmir. Problemsiz bir həyat onun ən böyük arzusudur. Xaraktercə zərif və cəlbedicidir. Cazibədarlığından necə istifadə etməyi bilən bu insanda uşaq səmimiyyəti var. Yalan danışmağı, bayağılığı, fiziki gərginliyi sevmir. Düşüncələrində müstəqil, fəaliyyətində azaddır. Bir sözlə, haqqında söhbət açdığım yazıçı-publisist Zemfira Məhərrəmli necə deyərlər, istiqanlı, insanpərvər xanımdır…
Tezliklə Azərbaycan xanımına xas olan ən gözəl xüsusiyyətləri özündə birləşdirən Zemfira xanımın 70 yaşı tamam olur. Onu yubileyi münasibəti ilə təbrik edir, möhkəm cansağlığı, yaradıcılıq uğurları arzulayıram.
Hörmətlə, Elman Eldaroğlu
ZEMFİRA MƏHƏRRƏMLİNİN YAZILARI
>>>> Zemfira Maharramli. The Swallow’s Nest.
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Bu gün görkəmli şərqşünas alim Aida İmanquliyevanın anım günüdür
Bu gün Azərbaycanın birinci xanımı Mehriban Əliyevanın anası, görkəmli şərqşünas alim və tərcüməçi, ilk qadın elmlər doktoru, professor Aida İmanquliyevanın anım günüdür.
Professor Aida İmanquliyeva Azərbaycanda Şərq-Qərb ədəbi əlaqələrini sistemli şəkildə araşdıran, Şərqlə Qərb mədəniyyətlərinin bir-birinə təsirini elmi cəhətdən əsaslandıran ilk azərbaycanlı qadın alimdir.
Sevgi dolu ürəyə, incə və həssas qəlbə malik Aida xanımın xatirəsi bu gün də yaddaşlarda yaşayır, əsərləri müasir dövrümüzdə Azərbaycanla ərəb ölkələri arasında ədəbi-elmi körpü rolunu oynayır. Onun təkrar-təkrar oxunan, təhlil və tədqiq edilən, müxtəlif dillərə tərcümə olunan əsərləri, elmi monoqrafiyaları dövrümüzdə də aktuallığını qoruyub saxlayır.
Aida İmanquliyeva 1992-ci ilin 19 sentyabrında vəfat edib.
Çoxşaxəli yaradıcılıq və ictimai fəaliyyətinə baxmayaraq, Aida xanım Şərq qadınına xas olan incə ruhunu qoruyub saxlayan görkəmli şərqşünas alim, istedadlı pedaqoq olmaqla yanaşı, səmimi, mehriban, nəcib insan, gözəl övlad və həyat yoldaşı, fədakar ana idi. Qısa, lakin mənalı ömründə həm elmin zirvəsini fəth edə bildi, həm də əhatəsində olduğu insanların əbədi sevgisini qazandı.
Bu gün onun həyatını övladları və nəvələri davam etdirir. Xatirəsi isə şəxsiyyətini və elmi irsini yüksək dəyərləndirən insanların qəlbində yaşayır.
Yazını hazırladı, Aynurə Əliyeva,
ADPU-nun ETM-nin elmi işçisi, Filologiya fakültəsinin müəllimi.
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Əfqanıstanın Qızılbaş icması üzvündən gözəl əl işi
Kabildə fəaliyyət göstərən Əfşar Ulduzu Tədris Mərkəzinin Azərbaycan bölməsi şagirdi (solda) Həyatullah Əfşar Azərbaycan bayrağının təsvir olunduğu gözəl bir xalça toxuyub.
Əməyi incəsənətə çevirən soydaşımıza təşəkkürlər.
Qeyd edək ki, 2004-cü ildə qəbul edilmiş Əfqanıstan Konstitusiyasında Qızılbaşlar ölkədə ayrıca bir Xalq kimi tanınır və bu etnik birlik daxilində ‘Əfşar’, ‘Bayat’, ‘Cavanşir’ kimi tayfaları birləşdirir. 2006–2021-ci illər arası Əfqanıstan Dövlət Himnində Qızılbaşların adı da çəkilirdi. Araşdırmalara görə, Əfqanıstan əhalisinin təxminən 1%-ni Qızılbaşlar təşkil edir.
© Qızılbaş Qlobal İrsi Təşkilatının sosial media moderatoru Vahid İbayev
Mənbə: Milli Kimlik
MİLLİ KİMLİK ARAŞDIRMALARI QRUPU
Məlumatı hazırladı: Tuncay ŞƏHRİLİ
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Qoy gözlərimdə otursun
sərin baxışlarının işığı,
ruhumu isidən iqlimin
örtük kimi sarılsın çiynimə.
Dodaqlarının çiçək balı
zindan qapısına düşsə belə,
yenə də içimdə
azadlıq qönçələri açdırar.
Həsrət kor sabahlarıma,
Yadlığın kar nəbzimə
Buruq fəryad qoparır.
Unutmağın damlasını içməyi
Qovrulmuş qəlbim arzulayır.
Dünənin soyuq qar çiçəkləri
Bu gün qırmızı qan ləçəklərinə dönüb…
həm üşüyürəm, həm də havalanaram
Dəftərə söykənən qələmin üstə.
17.09.2025.
Müəllif: Firuzə Quliyeva
“ƏDƏBİ OVQAT” ədəbi-bədii dərgisinin (təsisçisi Rəfail Tağızadə, baş redaktoru Vaqif Osmanlı, rəssamı Sehran Allahverdi) növbəti – 17-ci sayı oxucularının görüşünə gəlib.
Bu sayda Bəxtiyar Vahabzadənin, Barat Vüsalın, Əkbər Qoşalının, Sevinc Qəribin, Müşfiqə Baləddinin, Banu Muharremin, Aysel Kərimin, Səadət Qəribin, Almaz Alıqızının, İbrahim Şaşmanın şeirləri, Arif Ərşadın “Babamın xalçası”, Hümbət Həsənoğlunun “Dua”, “Son arzu”, Vüsal Nurunun “Diş qatili”, Könül Nuriyevanın “Ağıllı çərənləmə”, “Əhmədli Ayna Asim qızının “Ulu məhkəmə”, Qızlarxan İbrahimovanın “Güvən”, Qoşqar İsmayılzadənin “Məsləhətli adam axtarılır”, “CV əhvalatı” nəsr nümünələri çap edilib.
“Təhlil” bölməsində Lütviyyə Əsgərzadənin “Yada düşər xatirələr – Cəlal Bərgüşad”, Mərdan Baltayevin “Vətənpərvər və görkəmli ədəbiyyatşünas alim”, Xəyalə Ağayevanın “Səbəbkar bəduğur quşdur, yoxsa insan” (İmamverdi İsmayılovun “Bayquş və qarovulçu” hekayəsi haqqında), Əlabbasın “Bizim Eyvaz” (Eyvaz Zeynalovin “Nadir çah” romanı haqqında), Vaqif Osmanlının “Milli ruh candan ayrılmaz” (Mikayıl Bozalın lirik duyğularına essevari baxış bucağı) yazıları nəşr olunub.
Rəfail Tağızadə “Şuşanın gecələri” essesi Qala şəhərimizin bu gününün lirik təqdimidir.
“Bütün həyatım “fədakarlıq” deyiminə ekvivalentdir” Firuzə Məmmədli ilə maraqlı müsahibədir.
Bu sayda “Çeçen ədəbiyyatından nümunələr” bölməsində Səidbəy Arsanovun “Tapıntı”, İsa Sakriyevin “Evimin ruhu” və “Sal” hekayələrini oxuya bilərsiniz. PDF>>>ƏDƏBİ OVQAT – 17
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Şair Əlisəmid Kürə
Üzünün qırışlarında min ilin ağrıları,
Baxışlarında min ilin təəssüfü var.
Arada gülümsəyirsən əzabların üzünə,
Ancaq mən gülüşünün altından axan göz yaşlarını yaxşı görürəm, şair.
həsrətə təşnəsən deyə gülümsədikcə bir az da susuzlayırsan,
Ciyərin yanır ayrılıqdan sarı.
Sən susadıqca təptəzə Söz doğulur ayrılıq rəngdə.
Danışdıqca bir az da böyüyürsən həqiqətin gözündə,
Susduqca bir az da …
Bilirəm, nigaransan dünyadan,adamlardan, ağaclardan, ağaclara daş atan uşaqlardan,
Qar altında dən axtaran quşlardan, qarışqalardan –
Hər şeydən, hər kəsdən nigaransan,
Elə özündən də
Əllərin cibindən, cibin sərçələrdən utananda göy üzünə yağış ismarlayırsan arada,
Bilirsən ki, səmada bizə ən yaxın buludlardı, buludlar.
Sən kədəri qədəh-qədəh başına çəkdikcə hardasa bir ümidin üstünə qapqara kölgə düşür,
Hər gün bir qədəh ümidsizləşirsən beləcə.
Hələ əzablara, həsrətə, tənhalığa qədəh-qədəh meydan oxumağını demirəm,
Mən çox şeyi gizlədirəm səndən,
Çox şeyi demirəm, şair.
Eh, nöqtələr, suallar, nidalar!!
AYB -nin və AJB-nin üzvü, şair -publisist.
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Sentyabrın 18-i Azərbaycanın musiqi və mədəniyyət təqvimində həm də xatirə günüdür: Şuşanın dərin musiqi-əxlaqi atmosferindən çıxmış, milli professional musiqi və operanın banisi, tanınmış ictimai xadim, jurnalist, yazıçı Üzeyir bəy Hacıbəyov 1885-ci ildə təqvimin bu günündə dünyaya gəlib. Bu il — 2025 — Üzeyir bəyin 140 illik yubileyi ilə üst-üstə düşür və bu yubileyə həsr olunmuş nəşrlərdən biri də şair-yazıçı və tədqiqatçı Zaur Ustacın “Üzeyir Hacıbəyov -140” monoqrafiyasıdır. Bu kiçik, lakin məzmunlu kitab həm yubileyi qeyd etməyi, həm də Üzeyir bəyin irsini daha canlı, daha müasir oxucuya çatdırmağı hədəfləyir.
Zaur Ustac, müasir ədəbi mühitdə şair, redaktor və bəzən elmi-populyar mətnlərin müəllifi kimi tanınır. Onun nəşrləri arasında həm şeirlər, həm redaktə işləri, həm də ön sözlər, tərtibatçılıq fəaliyyətləri diqqət çəkir; bu da Ustacın yalnız ədəbi deyil, eyni zamanda tədqiqatçı və publisist köklü bir yazar olduğunu göstərir. Belə bir müəllifin Üzeyir bəy Hacıbəyli mövzusuna müraciəti gözlənilən bir addımdır — çünki “Üzeyir Hacıbəyov” mövzusu həm mədəniyyət tarixi, həm də müəllifin poetik-estetik duyumu üçün zəngin material təqdim edir.
“Üzeyir Hacıbəyov -140” oxucuya dahi bəstəkarın həyatı və yaradıcılığını təkcə bioqrafik faktlar kimi təqdim etmir; həmin illərin mədəni-iqtisadi kontekstində Üzeyir bəyin rolunu musiqiçi – bəstəkardan daha çox yazıçı – publisist kimi qabardır. Zaur Ustacın bu kitabı Üzeyir bəy Hacıbəylini jurnalist, publisist, yazıçı, satirik, dramaturq kimi təqdim etmək baxımından böyük əhəmiyyət kəsb edir. Əsəri əhəmiyyətli edən vacib məqamlardan biri də Zaur Ustacın 10 fəsildən ibarət olan monoqrafiya boyunca daim mötəbər mənbələrə istinad etməsidir. Mətn monoqrafik formatın sərhədlərindən çıxaraq, publisistik ton və təhlilçi baxışla oxucunu həm tarixi faktlarla, həm də estetik refleksiyalarla qarşı-qarşıya qoyur.
Ustacın monoqrafiyasında diqqət çəkən məqam mətnin dili və strukturu arasındakı balansdır. O, müxtəlif mövzulu fəsilləri ustalıqla vahid süjet xətti kimi seçdiyi Üzeyir bəy Hacıbəylini “böyük ədib” kimi təqdim etmək ideyası ətrafında cəmləyə bilmişdir. Bu baxımdan kitab vahid mövzulu əsər təsiri bağışlayır. Zaur Ustac Üzeyir bəyin bəzi məqamlarda indiki dövrdə mürəkkəb görünə biləcək ifadə tərzini müasir oxucuya sadə, aydın və bəzən poetik ifadələrlə çatdırır. Bu yanaşma çox vaxt akademik mətnlərdə itən insani və emosional əlaqəni bərpa edir: oxucu Üzeyir bəyə təkcə tarixi şəxsiyyət kimi deyil, canlı yaradıcı kimi yaxınlaşır. Eyni zamanda Ustac faktları, tarixi hadisə-silsilələrini, müəllifin yaradıcılıq məkanını qısa, amma yığcam şəkildə təqdim etməyi bacarır ki, bu da monoqrafiyanı həm geniş oxucu, həm də araşdırmaçılar üçün əlçatan edir.
Monoqrafiyanın əsas yükünü təşkil edən arqument — Üzeyir bəy Hacıbəylinin yalnız bəstəkar yox, eyni zamanda pedaqoq, publisist və milli mədəni islahatçı kimi görünməsidir. Ustac bu arqumenti tarixdən gətirilən nümunələrlə, bəstəkarın pedaqoji və publisistik fəaliyyətinə işıq salan istinadlarla möhkəmləndirir. Oxucu üçün faydalı olan başqa bir məqam monoqrafiyada verilən xatirə, sənəd və faktların vacib hissələrinin vurğulanmasıdır; belə elementlər Üzeyir bəyin çoxşaxəli fəaliyyətinin daha aydın görünməsinə xidmət edir.
Hər bir yubiley-monoqrafiya kimi, “Üzeyir Hacıbəyov -140” da həm tərifə, həm də müəyyən tənqidi fikirlərə açıqdır. Bir tərəfdən, Ustacın publisist üslubu mətnə canlılıq qatır; digər tərəfdən, ciddi araşdırmaçı oxucu daha dərin arxiv işləri və istinadların genişliyini gözləyə bilər. Buna görə də monoqrafiyanı ideal şəkildə kontekstləşdirmək üçün oxucu mətnə əlavə olaraq elmi məqalələr, arxiv materialları və ədibin əsərlərinin təhlilinə yönəlmiş daha geniş tədqiqatlarla birlikdə müraciət etməlidir. Bununla belə, Ustacın işi “Üzeyir Hacıbəyov” mövzusunu geniş oxucu kütləsinə çatdırmaq baxımından əhəmiyyətlidir və yubiley çərçivəsində vacib bir pay sahibidir. Zaur Ustac özü də monoqrafiya boyunca müxtəlif başlıqlı məqalələrində tez-tez bu məqamı vurğulayır ki, onun əsas məqsədi yada salmaqdan, xatırlatmaqdan – təbliğat işindən ibarətdir.
“Üzeyir Hacıbəyov -140” həm yubiley xatirəçiliyi, həm də publisistik yanaşma ilə hazırlanmış bir monoqrafiyadır. O, Üzeyir bəy Hacıbəylinin irsini yenidən oxumağa, onun yaradıcılığının müasir oxucu üçün nə demək olduğunu yenidən düşünməyə çağırır. Monoqrafiya xüsusi olaraq tədqiqatçıların ixtiyarında olan mürəkkəb mətnləri sadələşdirir və geniş oxucu kütləsinə Üzeyir bəy Hacıbəylini daha yaxın, daha insani bir obraz kimi təqdim edir. Bu səbəbdən kitabı həm yubiley münasibətilə, həm də “Üzeyir Hacıbəyov” mövzusuna giriş kimi tövsiyə etmək olar.
Ədəbiyyat tarixə münasibətdə yalnız xatirə rolunu oynamır, həm də gələcəyə işıq tutan mayak kimi çıxış edir. Müasir Azərbaycan ədəbiyyatında fərdi üslubu ilə seçilən yazıçı-şair Zaur Ustacın “Üzeyir Hacıbəyov – 140” adlı monoqrafiyası da belə əsərlərdən biridir. Bu kitabda müəllif sadəcə hadisələri xatırlatmır, zamanın fəlsəfəsini çözür, oxucunu milli yaddaşla üz-üzə qoyur.
Monoqrafiyanın başlıca ideyası – Azərbaycanın tarixi inkişaf yolunu yüz illik zaman çərçivəsində dəyərləndirməkdir. Ustac göstərir ki, yüz il əvvəl milli mübarizədə arzulanan ideallar bu gün reallığa çevrilib. Dövlətçilik, müstəqillik, milli kimliyin qorunması – bütün bunlar indi həyatımızın gerçək faktlarıdır. Müəllif oxucuya sadə bir həqiqəti çatdırır: “Biz indi onlardan 100 il qabaqdayıq”. Yəni bizdən əvvəlki nəsillərin ümid etdiyi gələcək artıq bizim bu günümüzdür.
Kitabda diqqət çəkən əsas xətt – milli yaddaşa bağlılıqdır. Müəllif hesab edir ki, hər bir xalqın zaman qarşısında mövqeyi onun irsinə münasibəti ilə ölçülür. Dilini, ədəbiyyatını, mədəniyyətini qoruyan xalq zamanın fövqündə dayanır. Bu baxımdan monoqrafiya həm tarixi təhlil, həm də milli kimliyin dəyərinə çağırış xarakteri daşıyır.
Zaur Ustac bu əsərində sırf akademik üslubdan qaçaraq, publisistik təhkiyə ilə oxucuya müraciət edir. Tarixi faktlar canlı emosiyalarla təqdim olunur, analitik yanaşma bədii ifadələrlə zənginləşdirilir. Bu isə monoqrafiyanı həm elmi dairələr, həm də geniş oxucu kütləsi üçün maraqlı edir.
Zaur Ustac bu əsərdə sadəcə tarixdən bəhs etmir, həm də gələcəyə baxış təqdim edir. Onun fikrincə, xalqın qüdrəti zamanın nəbzini tutmaq bacarığında, yəni həm tarixi dərk etməkdə, həm də gələcəyi qabaqlamaqda gizlidir. “Üzeyir Hacıbəyov -140” adlı monoqrafiyanı vahid bir əsər kimi götürdükdə “Biz indi onlardan 100 il qabaqdayıq” fikrinin ana xətt kimi keçdiyini görürük. Bu ifadə həm də bir xəbərdarlıqdır: əgər biz milli dəyərlərimizi unutsaq, yüz il sonra gələcək nəsillər bizdən geri qala bilər.
“Üzeyir Hacıbəyov -140” monoqrafiyası Azərbaycan publisistikası və ədəbiyyatında mühüm hadisədir. Əsər oxucunu həm düşünməyə, həm də tarixdən nəticə çıxarmağa çağırır. Zaur Ustac bu kitabı ilə bir daha sübut edir ki, ədəbiyyat yalnız sözün gözəlliyi deyil, həm də milli düşüncənin, ictimai mövqenin ifadəsidir.
Zaur Ustac – “Üzeyir Hacıbəyov – 140” pdf
Müəllif: Günnur AĞAYEVA,
NAMİQ HACIHEYDƏRLİNİN YAZILARI
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru