Olan oldu, keçən keçdi, sən məni,

Olanlara, keçənlərə bağışla,

Öz bətnində sirrimizi gizlədən,

Bu qaranlıq gecələrə bağışla

Xarabanı tərk etməyən bayquşa,
Bu quşdan yan ötən müqəddəs daşa,
Lap elə bu unudulmuş əyyaşa,

Vətən olan küçələrə bağışla

Biz dərdlərdən düşdük, çölün düzünə,
Gəl, tüpürək ayrılığın üzünə,
Bu soyuqda yem gəzərkən özünə

Şaxta vurmuş sərçələrə bağışla.

****

Sənsizliyin çiləsinə düşəndə
Bildim, gəldi yaz ömrümə qış mənim
Gələcəyin yoldan asılı qaldı,
Qurumadı gözlərimdə yaş mənim.

Yastığımda aradım tellərini
Dodağımla daradım tellərini
Gedib gömdüm qoynumda əllərimi,
Əllərindən qoyduğun gün boş mənim

Günəş deyil, başın üstə dayanan,
Gördüyün o əksimdir göydə yanan.
Göz yaşımdır, ahımla buxarlanan ,
Qəfil səni haqlayan yağış mənim.