Apar məni buralardan.
Dayan, dəniz,uzaqlaşma, sözüm var,
Səndə olan azadlıqda gözüm var.
Dalğaların qucağına atılım,
Coşan, daşan sularına qatılım,
Apar məni buralardan…
Suyunda üzməyə canlı gəmim var,
Dinlə məni, ürəyimdə qəmim var,
Qoy dibində pəri kimi gizlənim,
Dalğalarda pıçıltıtək səslənim,
Apar məni buralardan…
Səhvlərlə doluyam, min günahım var,
Yaralı könlümdə min bir ahım var,
Hər deyilən xoş yalana inandım,
Bu həyatın çirkabına bulandım,
Apar məni buralardan…
Qəl qaytarma geri, bir mehmanın var,
Sənin dərdlər üçün min dərmanın var,
Alışdım içimdən mən oda yandım,
Nicatım göy sulu qoynunda sandım,
Apar məni buralardan….
Müəllif: Təranə Məmməd
“YAZARLAR” – SİFARİŞ ET
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru