TANKALAR
(Yapon şeir növüdür, mənaca qısa mahnı deməkdir, 5 misradan və 31 hecadan ibarət olur)
(5+7+5+7+7)
Uzandıqca yol,
Yaxınlaşır uzaqlar.
Yorulur adam,
Günəş enir qüruba,
Gündüz dönür axşama…
Salam, köhnə dost,
Necəsən, qoca palıd?
Təzə nə xəbər?
Gəlirmi balta səsi,
Sağ-salamatlıqdımı?…
Üzü qışadır
Qırov düşüb qar kimi…
Soyuyub günəş,
Payızın son ayında
Ayazıyıb havalar.
Kimsən, nəçisən?
Səni gözləyirəm, səni…
Ey tanımadığım,
Ey bilmədiyim adam…
Hardasan, kimsən axı?
Bir payız günü,
Uzanır qəmli gecə.
Sabaha çox var…
Qısalıb ömür kimi
Günün işıqlı vaxtı.
Bayırda yağır,
Pəncərə su içində.
Damır ürəyim
Köhnə, uçuq daxma tək…
Dünya başdan-başa su…
Əl boyda kağız,
Sevincdir dünya boyda.
Məktubdur, amma
Oxuya bilmir adam…
Nə yazılıb və kimə?
Aydınlıqdır su,
Yuxunu söyləməyə.
Pıçıltılarla…
Su dilə gəlib dedi:
Susmaq deyil susamaq…
Müəllif: SÜLEYMAN ABDULLA
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru