Dərdimiz olmaz
Bir az uzaq olsaq yer kürəsindən,
Səpsək göy üzünə göz yaşımızı,
Unutsaq həsrəti, ayrılıqları,
Pozub təzələsək yaddaşımızı,
Dərdimiz olmaz.
Versək könlümüzü Göyə bircə gün,
Ulduzla sevişsək , Ayla sevişsək.
Qovsaq başımızdan ölüm sevdasın,
Təzədən yaşamaq eşqinə düşsək,
Dərdimiz olmaz.
Dünyanın yadından çıxsaq bircə gün,
Unutsa dənizlər, dalğalar bizi.
Ölkələr, şəhərlər, yollar , limanlar
Raketlər, güllələr, qovğalar bizi,
Dərdimiz olmaz.
Düşsək göy üzünün aydınlığına,
Bircə gün günəşi borc ala bilsək,
Şeytan aldatmasa bizi bircə gün ,
Bir gün özümüzlə bacara bilsək,
Dərdimiz olmaz.
Müəllif: Təranə DƏMİR
AYB – nin və AJB -nin üzvü.
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru