Əllərin çox istidi
Əllərin çox istidi,
ürəyin yanır, deyən;
odun məni də tutub,
elə bil, od üstəyəm;
göydən bir ulduz dərdim,
dərib çəməndə sərdim;
deyirlər, yoxdu dərdin,
gəlmişəm dərd istəyəm;
yarpağam, büküləcəm,
payızdan töküləcəm;
göylərə çəkiləcəm,
boz bulanıq tüstüyəm;
payız yeli əsdimi,
ömür-gün tələsdimi;
həsrət alıb üstümü,
dumandayam, sisdəyəm;
burdan hara yol açım,
çoxalıb, ağrım-acım;
hələ yoxdu, əlacım,
həkim çağır, xəstəyəm.
DÜNYANIN KƏNARI UÇRUM
Dünyanın kənarı uçrum,
qayıdım, dönüm geriyə;
arxaya baxmıram daha,
dağlar üstümə yeriyər;
ulduzlar sellənib axır,
buluddan qara daş yağır;
qarşıma bir fələk çıxır,
gözü səyriyə-səyriyə;
alnıma nə yazılıbdı,
yazılanlar pozulubdu;
göy üzündən asılıbdı,
Günəş- əriyə-əriyə;
o kimdi, dərdi bağlıyır,
bağlıyıb kimə saxlıyır;
Tanrı uşaq tək ağlıyır,
nə bilim, nə vaxt kiriyə;
Allahım, məndən incimə,
dünyanı vermisən, kimə;
canımı çəkdim içimə,
ruhumu duman bürüyər.
02.04.2025
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
BİR AZ ÜRƏYİMDƏ QAL
Gəl, səni ürəyimin
köynəyindən keçirim;
bir az ürəyimdə qal,
gör, mən nələr çəkirəm;
qaradı, ağdı, yuxum,
hələ oyaqdı, yuxum;
gecələr yoxdu, yuxum,
ulduzları sökürəm;
göydə bulud ləliyir,
damcı-damcı çiliyir;
fələk tumu əliyir,
mən də, bostan əkirəm;
hanı, yolun axırı,
geri qaytar, naxırı;
payız qonaq çağırır,
yarpaqları bükürəm;
mən, dərd daşıdım, burda,
dağlar yaşıdım, burda;
bəsdi, yaşadım burda,
uzaqlara köçürəm;
YARPAQ
Bu yarpaqdan bir köynək tik,
ilmələri yaşıl-yaşıl;
yaxasını ağca elə
düymələri yaşıl- yaşıl;
adımı da “ağ atlı” yaz,
gəlib məni oyatdı, yaz;
kürəyinə bayatı yaz,
kəlmələri yaşıl-yaşıl;
yaxşı toxu, qəşəng elə,
oxşamasın xəzan gülə;
naxışını üç rəng elə,
gölmələri yaşıl-yaşıl;
bulud ötür dəstə-dəstə
məndən bir şirin söz istə;
bir ağac var, yolun üstə,
meyvələri yaşıl-yaşıl.
baxışından sevgi yağır,
gedəndə, məni də çağır;
bulaq üstən qızlar baxır,
geymələri yaşıl-yaşıl;
ömür gödək, dünya qarı,
yarpaq könlümün qubarı;
ölmələri sarı-sarı,
gəlmələri yaşıl-yaşıl.
20.03.2025.
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
MƏNİ DOLANDIR BAŞNA
Mənim əllərim toxunub,
bir günahın naxışına;
gəlim, öpüm əllərindən,
məni dolandır, başına;
kimdi, mənə səndən yaxın,
perikib dağlardan ahım;
onsuz da çoxdu, günahım,
birini də bağışlama;
daha unut acıları,
dərdin sınıq bacıların;
bulanıb bulud saçların,
gözlərinin yağışına;
kimdi, könlümü güldürən,
gəlmişəm, yenə gül dərəm;
məni oxlayıb, öldürən,
o kirimiş baxışına;
dərd gedə, heçim ağlıya,
həsrət bir biçim ağlıya;
az qalır, içim ağlıya,
yolum qayıdır, axşama.
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
HƏSRƏTMİN OCAĞI
Səslənir qulağımda
uzaqların sorağı;
indi qanadlarım var,
bacarıram uçmağı;
bəxtimə bulaq düşüb,
yoluma çıraq düşüb;
kipriyimə ağ düşüb,
qaşlarımdan aşağı;
harda bir ağ gül əkək,
bulud yağış güləcək;
kim oxuya biləcək,
göy üzünün qırağın;
gəl bulağın üstünə,
alışım, bax tüstümə;
dəyir dağın üstünə,
buludlrın saçağı;
könlüm sözə üz tutur,
əllərim də söz tutur;
tüstülənib köz tutur,
həsrətimin ocağı.
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
XOCALI
O gecə qar yağmadı,
qan yağdı o şəhərə;
o şəhər o gecədən,
sağ çıxmadı, səhərə;
hansı bayquş uladı,
o şəhərin üstünə;
ölüm qanad sərmişdi,
o səhərin üstünə;
o gecədən səhərə,
yollar da görünmədi;
dağlar da, düşmən oldu,
dumana bürünmədi;
güllələr ilan kimi,
qıvrılırdı gecədə;
yüzlərlə ölüm vardı,
yolda, izdə, küçədə;
göy üzü qan qusurdu,
anaların səsinə;
adamlar qızınırdı,
ölümün nəfəsinə;
Xocalı can verirdi,
gecə qollarım üstə;
qırmızı qan axırdı,
sel tək yolların üstə;
Xocalı can verirdi,
gecənin ağuşunda;
vətən hamilə idi,
bir dərdin yağışına;
nə dünya, nə göy üzü,
nə də, Tanrı bilmədi;
Xocalının göz yaşın,
o gün kimsə silmədi;
o şəhər ağlar qaldı,
bu dünyünın heçində;
mən də, bir şəhid oldum,
o gecənin içində.
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
PAYIZ QAYIDAN KİMİ
Payız qayıdan kimi,
yarpağa sarı düşər;
göy üzü yırğalansa,
ulduzlar hara düşər;
ocaqdan od istəsəm,
Tanrıdan ad istəsəm;
bir köhlən at istəsəm,
bəxtimə Qır at düşər;
bu yol çıxır axıra,
naxır dönür axura;
qışda ova çıxmıram,
gözlərim qara düşər;
ömür çatır yarıya,
kim gedə, kim qarıya;
payız çəkər sarıya,
yaşıl bahara düşər;
gözlərin bir cüt xurma,
ürəyimi qovurma;
məndən uzaqda durma,
könlümə yara düşər.
BALLADA
Gecənin yaxasını,
bir bəyaz ulduz sökür;
bir səhər də açılır,
elə buna da şükür;
buludlar lələk-lələk,
göy üzündə bir mələk;
dodağında çiyələk,
məni çarmıxa çəkir;
mən nə bilim suçumu,
üzüm-gözüm acımı;
payız qara saçımı,
ağca yarpağa bükür;
bilmirəm, nədi bu səs,
içim boşca bir qəfəs;
min ildi nəfəs-nəfəs,
canımı bir dərd sökür;
göyün düz qırağında,
tanrının çırağında;
bir kağız varağında,
fələyin evi çökür;
payızın yağışları,
yuyur yor-yoxuşları;
göy üzünün quşları,
buludda bostan əkir;
yazım qışımın üstə,
üzüm daşımın üstə;
süzür başımın üstən,
ruhum hayana səkir;
hərə bir dərd hayında,
mələklər bal ayında;
tanrı öz sarayında,
ağlayır hönkür-hönkür.
Müəllif: NAZİM ƏHMƏDLİ
>>>> ƏN ÇOX OXUNAN HEKAYƏ <<<<
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
GƏL BİR YAXŞI ŞƏKLİMİ ÇƏK
Payızın saçı sarıdı,
gözlərindən ayaz damır;
gün keçir, ömür atdanır,
saçlarıma bəyaz damır;
buludlar ilmə-ilmədi,
payız üzümə gülmədi;
yüz illər tapa bilmədim
özümə oxşar adamı;
bu ocaq köz-köz qaralır,
ürəyimdə söz qaralır;
elə bil hər yer qar olur,
günəş qızdırmır odamı;
nə qaldı bu gələn qışa,
yollar dirənib yoxuşa;
bir bulağa, ya bir daşa,
bir yarpağa yaz, adımı;
yol uzanır, sonda itir,
qaranlıqlar danda itir;
kəlmə-kəlmə, sətir-sətir,
əriyir könlümün şamı;
göy üzü gömgöy şüşətək,
gəl, bir yaxşı şəklimi çək;
ulduzlar yerə düşəcək,
bir sərin payız axşamı.
07.08.2024.
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
UNTDUĞUM GÖY ÜZÜ
Unutduğum göyüzü,
tanrıya daha yaxın;
burdan dağlar görünmür,
hardan boylanım, baxım;
dünya bağlı qalaça
gedib harda qalacam;
bir cüt qanad alacam,
yeri tutmur ayağım;
mən daha nə görəcəm,
bağ becərəm, yer əkəm;
saçlarına hörəcəm,
çiçəklərin ən ağın;
ömrün qırışığı var,
dərdin qarışığı var;
üzümdə işığı var,
gözündəki çırağın;
günüm harda keçinə,
döndüm bulud köçünə;
nə yazılıb içinə,
alnımdakı varağın.
Müəllif: NAZİM ƏHMƏDLİ
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru