Xəyal
Oturub bir əsər yazacam bir gün,
Mən özüm olacam baş qəhrəmanım.
Finalda o qədər yüksəldəcəm ki,
Xata çıxardacaq şöhrətim-şanım.
Xata çıxardacaq şöhrətim-şanım,
Çəkib deyəcəklər: -Eyy, həddini bil!
Yıxıb sürüyəcək qlobal tənqid,
Deyəcək: -Bu süjet həyatı deyil.
Deyəcək: -Bu süjet həyatı deyil,
Xoşa gəlməyəcək xəbər-mübtədam.
Deyəcək: -Bu adam xəyalpərəstdi,
Bu qədər ucalmaz sıravi adam.
-Bu qədər ucalmaz sıravi adam,
Eləyir şübhəli fikrə meyil o.
Təftiş eləyəcək sosioloqlar:
-Siyasi cəhətdən yetkin deyil o.
-Siyasi cəhətdən yetkin deyil o,
Qələmi olsa da, bilmir həyatı.
Düz yola qayıdıb ola bilərdi
Dövlət Mükafatı laureatı!
05.11.23.
Müəllif: Rafail İncəyurd
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru