Ömürdü başından düman da keçər,
Ürəyi gözünün suyunu içər,
İnsan var yüz yaşda dünyadan köçər,
Adam var yüz ildir doğula bilmir.
Bəzən ağır olur qəlbinin yükü,
Ağrını yaş edib gözündən tökür,
Zaman namərd olur belini bükür,
Adam var yüz ildir doğrula bilmir.
Toxunar ruhuna fələyin sözü,
Yandırar könlünü məhəbbət közü,
İnsan var ölməyə gəlmir ki,üzü,
Adam var yüz ildir doğula bilmir.
Yaxşılar doğulur yüz ildə tək-tək,
Yaxşının qədrini biləsən gərək.
İnsan var libasın dəyişən mələk,
Adam var yüz ildi doğula bilmir.
Ümidim ayrılmır hələ xülyadan,
Bəlkə də görməyib dünya hələ dan,
Təvəkgül doğuldu getdi dünyadan,
Yadigar hələ də doğula bilmir.
Müəllif: Yadigar TƏVƏKGÜL
Mustafa Müseyiboğlu adına kitabxana
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru