Zalım dostlar
(eyni adda 2-ci şeir)
Xain tövrünüzdən sındı ürəyim,
Quru təsəllilər deyil gərəyim.
Heç kim qulağına yemir çörəyi,
Elə bilməyin ki, heç nə bilmirəm.
Tapdaq elədiniz halal haqqımı,
Kəsdi nəfəsimi hava vakkumu.
“Xeyir-dua”nızla uddum zəqqumu,
Elə bilməyin ki, heç nə bilmirəm.
Araya kim girdi sizin bazarda? –
Nırxı dəyişdirdi sizin bazarda.
Yağ da, şor da birdi sizin bazarda,
Elə bilməyin ki, heç nə bilmirəm.
Eşşək quyruğuna bağlanan dəvə
Nifrin yağdırmazmı sizə hər dəfə?
Səhv addım ya sondu, ya da ərəfə,
Elə bilməyin ki, heç nə bilmirəm.
Dinmirəm, sanmayın, avamam, avam,
Nə siz ovçusunuz, nə də mən ovam.
Davam gətirməzsiz başlansa davam,
Elə bilməyin ki, heç nə bilmirəm.
10.05.26.
Müəllif: Əlir Nəcəfxanlı
Oxuyun >> Gözündə tük var
Zaur Ustacın şeirləri haqqında