Çiçək əsimi
İnsanlıq sömürgəsi, –
papazın qələmində.
Qəbilə davasının
ən son modeli yayılır yer kürəsinə.
Əvvəl daş-qalaqla son qoyulardı,
sonra dəmirə öpdürdülər
insan vücudunu.
Tüfəngə bələdilər
körpələrin işıq çöhrəsini…
Və nəhayət silah-sursat çeşidləri
qan yağışında yaşam işığına əl atdı.
PUA çıxdı təpəmizə!
İndi qan bir saniyədə çilənir
təbiətin solmuş taleyinə.
Quşları budağındaca külə döndərən
çiçək əsimi gəlmiş ömrümüzə.
Ləçəklərin parçalanan rəng damarında
insan qəhqəhəsi…
Alova bürünmüşlər
ağlayır ürəyimdə.
“Tomahawk” mələyi uçurur əbədiyyətə.
28.02.26.
MÜƏLLİF: GÜLNARƏ İSRAFİL
Oxuyun >> Gözündə tük var
Zaur Ustacın şeirləri haqqında