Turan Uğur:“Səməd Yusifcanlı ssenarilərimi, mətnlərimi həmişə əla oxuyur. Böyük həssasiyyətlə mətni duyur, hər sözün, hər kəlmənin haqqını verir. Hiss etdim ki, Səməd bəy bu gün “Türk ellərində Novruz ənənəsi” mövzusunun kadrarxasını daha şövqlə səsləndirdi. Məncə, çocuqluq illərinin Ağdam – Yusifcanlı xatirələri gözündə canlandı, ruhunu Novruz bayramının əzəmətinə aşiyan sandı, mətni oxuduqca təzələndi, sanki qırışığı açıldı. Allah canını sağlam, səsini qüvvətli, sözünü otkün eləsin!”
ZAUR USTAC: “Sözün əsl mənasında Ağdam rayonunun Yusifcanlı kəndində Novruz şənlikləri; Çilə gecəsi, Yelləncək qurma, Qarqara çıxmaq və digər bir-birindən maraqlı elementlərilə bir başqa idi… Bu şənliklər min illərdən bəri 1990-cı ilə qədər davam etdi. Yaxşı ki, o qədər keyfiyyətli olmasa da 1989-cu ildə AzTv bu tədbiri çəkib (bayram şənliyi bizim kəndimizdə – Yusifcanlı da çəkilsə də o vaxtkı icra-idarəetmə strukturu quruluşuna uyğun olaraq sovetliyin adı ilə Ağdam rayonu Novruzlu kəndi kimi təqdim olunub). Yəqin ki, AzTv-nin arxivində olar bu çəkiliş. Son 30 ildə bütün Şimali Azərbaycanı qarış-qarış gəzmiş bir şəxs olaraq qeyd etmək istəyirəm ki, başqa heç yanda bu qədər dəqiq və geniş ssenari üzrə zəngin təbii Novruz şənlikləri görmədim (bir az oxşayan Qazax -Tovuz bölgəsində var). 1979-1989, düz on il ərzində hər il bu şənliklər gözümün önündə keçirib və iştirakçısı olmuşam. Bütün elementlər hələ ki, yaddaşımda yaşayır…”
100 İLİN TÖHFƏLƏRİ Azərbaycan Radiosu-100, Azərbaycan Televiziyası -70
Ənənələrimizi, milli-mənəvi dəyərlərimizi ehtiva edən – bütöv bir türk millətinin, Azərbaycan xalqının aynasına çevrilən Azərbaycan Radio və Televiziya Verilişləri QSC təkcə yaxın keçmişimizin deyil, həm də bugünümüzün haqq səsidir.Mənəvi irsimizin layiqli daşıyıcısı olan bu mübarək məkan hərdaim dövlət – millət vəhdətinin təcəssümü rolunda, qiyafəsindədir.Bir əsri haqlayan radiomuzda “Bulaq”, “Axşam görüşləri”,
“Şənbə söhbətləri” kimi proqramların mütəmadi efir dalğalarında dinlənilməsi həmin gələnəklərə sədaqət nümunəsidir.Bu həm də bir vəfa borcudur – ulularımıza, ucalarımıza ehtiramın əsl təzahürüdür. Fevralın 14-də yaranmasının 70 illiyini qeyd etdiyimiz Azərbaycan Televiziyası da son illərdə çağdaşçı mövqeyi, yenilənmə görkəmi, vizual tərəqqisi ilə ənənələrdən gələn missiyaya yeni tərz qazandırıb.Xəbərlərə hər zaman böyük önəm verən Ana televiziyamız 44 günlük Zəfər Savaşımzda ən operativ, ən dəqiq xəbər mənbəyi kimi çıxış etdi.Xalqımızı gecə-gündüz cəbhə bölgələrindən alınan yeniliklərlə tanış elədi, Azərbaycan auditoriyasını işğaldan azad edilmiş torpaqlarımızla qovuşdurmağa nail oldu.Nə xoş ki, sevincli, fərəhli xəbərləri ilk olaraq bu məbəddən almağa müvəffəq olduq.”Xəbər” demişkən, AzTV öz proqram siyasətində xəbərlərə daha çox yer ayıraraq qlobal informasiya savaşında Dövlətimizin müdafiəçisi kimi çıxış edir. Qeyd edək ki, AzTV – nin “Həftə” Analitik-İnformasiya proqramı həftəlik xəbərlərin toplusu kimi yayımlanır və Əməkdar jurnalist Rövşən Raqifoğlunun təqdimatında izləyicilərə uğurla çatdırılır. Maarifləndirici verilişlərə də böyük üstünlük verən televiziya ənənəyə sədaqət nümayiş etdirərək Vətənimizə hizmətdə bulunur. “Vətənim” –Akademik Rafael Hüseynovun müəllifi və aparıcısı olduğu veriliş belə adlanır.Hər həftənin 1-ci günü Mədəniyyət Tv-də yayımlanan veriliş öz sanbalı, publisistik yükü ilə seçilir.AzTV illərdir tamaşçılara klassik Azərbaycan ədəbiyyatını sevdirən – o taylı – bu taylı, güneyli-quzeyli, Təbrizli-Bakılı məmləkətimizi Nizami, Məhsəti, Füzuli, Xətib Təbrizi, Əssar Təbrizi kimi ədəbi dühalarla bir daha tanış etməyi özünə qutsal bir borc sayır.Rafael müəllim həm radiomuza, həm də televiziyamıza 50 ildən artıq verdiyi töhfələrlə bu gün də bizim azman alimimiz, etibarlı tədqiqatçımızdır.
Milli ruha sarılmış, qədim köklərə söykənmiş “Türk yurdu”, “Tarixin izi ilə”, “Anın tarixi” “Tarixin oyunu” kimi verilişlərin müntəzəm yayımlanması, “Vətənim Azərbaycan”, “Divarların sirri”, “Otuz ikidən biri” kimi maarifləndirici, elmi-kütləvi, elmi-publisistik proqramların ərsəyə gəlməsi qənaətlərimizi bir daha təsdiq edir. Mədəniyyət Tv-də ayda 2 dəfə izləyicilərin görüşünə gələn “Türk yurdu” verilişi təkcə Azərbaycan auditoriyasını yox, həm də bütün türk dünyasını əhatə edir.Bu verilişdə çözələnən mövzular: ortaq türk dilləri, ortaq türk folkloru, ortaq türk mifologiyası, habelə “Türk Dövlətləri Təşkilatının Zirvə görüşləri”, “Türkoloji Qurultay -100” kimi mövzular günün həm tələbi, həm də prioritetidir.Verilişin ssenari müəllifləri Mahir Qərib, Turan Uğur, quruluşçu rejissoru Elnur Qədirov, rejissoru Aqil Abbasovdur.Şair Əkbər Qoşalının təqdimatında “Türk yurdu” verilişi bu gün ən çox baxılan proqramlardandır. ”Tarixin izi ilə” verilişində əksini tapan Qərbi Azərbaycan mahallarının zəngin tarixi bizi yurd yerlərimizə kökləyən vacib məsələ kimi çıxış edir.Bu həm də cənab Prezident İlham Əliyevin Qərbi Azərbaycanla bağlı çıxışlarından ilhamlanan yurddaş, peşəkar televiziyaçılarımızın önəmli görəvinin, vacib missiyasının göstəricisidir. Bu il Prezident sərəncamı ilə “Şəhərsalma və Memarlıq İli” elan edildiyini nəzərə alaraq, “Divarların sirri” verilişinin də funksiyasını təqdirəlayiq hesab edirik. Tarixi binalarımızın – “Səadət” sarayının, “İsmailiyyə” nin, “Filarmoniya” nın “Dövlət Kukla Teatrı” nın və.s tarixçəsi olan binaların xüsusiyyətini memarlıq tərəfdən araşdırmaq film estetikasında əla bir verilişin ərsəyə gəlməsini şərtləndirir.Xalq artisti Mehriban Zəkinin təqdimatında hazırlanan veriliş AzTV-nin -“Xüsusi layihələr studiyası” nın uğurlu layihələrindəndir.Ssenarisi yazıçı Turan Uğura məxsus olan verilişin quruluşçu rejissoru istedadlı gənclərdən olan Şövkət Fikrətqızıdır. “Otuz ikidən biri” –Bəli, məhz Abşeron, Bakı kəndlərinə həsr olunan veriliş belə adlanır.Artıq 3 ildir efir həyatı yaşayan verilişin müəllifi Xanım Parlakdır.Abşeronun qədim kəndlərinin qədim adətlərinə işıq salmaq verilişin yaradıcı heyətinin mübarək missiyasıdır. Novxanı, Maştağa, Nardaran, Balaxanı, Qala – daha neçə-neçə kəndlərimizin yaşayış tərzini, məşğuliyyətini bugünkü qloballaşan, kürəsəlləşən dünyada izləyicilərə aşılamaq əsl yurddaşlıq vəzifəsidir. AzTV bu gün müasir trendlərə də uğurla qoşulur. Gənclərlə disskusiyalara yer ayıran Mədəniyyət Tv “2X2” tok-şousu ilə hər həftə izləyicilərə – tələbələrə auditoriya qismində çıxış etməyə şərait yaradır.Verilişdə ən müasir mövzular – “karyera qurmaq bacarığı”, “süni zəka”, “rəqəmsal bacarıqlar” kimi istiqamətlər tez-tez müzakirə edilir.Auditoriyanın sərbəst sual vermə vərdişlərinin formalaşması olduqca uğurlu yanaşmadır.Ssenari müəllifi Faizə Mehdiyeva, quruluşçu rejissor Bəhram Yaqublunun səyləri nəticəsində tok-şou baxımlı bir verilişə çevrilib.Proqramın sonunda qaliblərin elan edilməsi, onlara hədiyyələrin təqdim olunması da stimullaşdırıcı vasitə kimi düşünülüb.Bu verilişdə özəlliklərdən birinin də aparıcının –spikerin televiziya aparcıları sırasından deyil, kənar mütəxəssislər arasından seçilməsidir. Bu gün serial çəkmək prosesinə bütün dünyanın qoşulduğunu rəhbər tutsaq, bu cəhətdə də AzTV yeniliklərə imza atan tərəf kimi görünər. İlk dəfə 2 hissəli tarixi məzmunda film ərsəyə gətirmək -“Azərbaycan Atabəyləri” kimi bədii-sənədli filmi uğurla təqdim etmək televiziya kollektivinə müyəssər oldu.Vaxtilə “Fatehlərin divanı” kimi çoxseriyalı film-tamaşanın davamı qismində 5 seriyalı ”Tarixin divanı” adlı bədi televiziya filminin bugünlərdə yayımlanması da əla effekt verdi.Filmə Xalq artisti Ramiz Həsənoğlunun quruluşunda izləmək imkanımız oldu. Həm texniki cəhətdən, həm də gənc kadrları ilə yenilənən Azərbaycan Televiziyası çoxşaxəli, çoxmərtəbəli missiyasını başarı ilə yerinə yetirir.AzTV xəbər vermək, maarifləndirmək, əyləndirmək kimi təyinatlarının haqqını verərək yeni on illiklərə, yüz illiklərə doğru iri addımlar atır. Bir sözlə, 100 ilin töhfəsi kimi görünən Azərbaycan Radiosu və Televiziyasının hazırkı nailliyyətləri bizi sevindirir.Odur ki, AzTV ailəsini təbrik edir, Televiziya Günündə kolleqalarımıza uğurlar diləyirik.Əziz həmkarlar, hər zaman görən gözümüz, yazan əlimiz, deyən dilimiz olasınız!
Etibar Həsənzadəyə KaracaKurt Köyleri Türkmen Derneği Genel Başkanı Serdar Güneşden anlamlı hədiyyə
Karacakurt Köyleri Türkmen Derneği Genel Başkanı Serdar Güneş tərəfindən Yazar Etibar Həsənzadəyə dəyərli və anlamlı hədiyyələr göndərilmişdir. Bu barədə Yazar Etibar Həsənzadə öz rəsmi sosial media hesablarında məlumat vermişdir. Məni və “Qarabağ Azərbaycandir” adlı layihəmin bütün iştirakçılarini Onur Belgesi ilə mükafatlandirdigina, mənə dəyərli və anlamlı hədiyyələr gondərdiyinə görə Karacakurt Köyleri Türkmen Derneği Genel Başkanı Serdar Güneş bəyə təşəkkürümü bildirirəm. Allah ömür versin, Allah sizdən razı olsun. Mənə göndərilən hədiyyələrin içərisində Türk Bayrağı Miniatür bağlama Türkmen Yaylığı (dərnəyin logosu ilə) Keyfiye (müxtəlif rəngləri olan yaylıq) Türk Bayrağı tokasi vardır.
Türkmen Yaylığı Türkmen alanında çox məqsədli istifadə olunan bir yaylıqdır. Əslində bu yaylıq (logosuz) süfrə kimi, içinə ərzaq məhsulları qoyub bağlayınca ərzağı daşımaq üçün, günəşdən qorunmaq üçün başa bağlanır, çiyinə asılaraq tər silmək üçün keçmiş zamanda istifadə olunurdu.Günümüzdə Türkmen toylarında və ya proqramlarda istifadə olunur. Keyfiye. Türkler Türküstandan Anadolu içlərinə böyük köç edərkən belə qərara gəlirlər ki, bir- birlərini tanımaq üçün göy qurşağındaki rənglərlə bəzədilmiş parçaları boyunlarına bağlayar, çadırlarının bir köşəsinə asardılar ki, bir-birlərini və ya bir obanı görərkən o kişinin Türkmen, obanın isə Türkmen obası olduğunu bilsinlər. Keyfinin üzərindəki rənglərin hər birinin bir anlamı var: Qırmızı rəng türklüyü və türk bayrağının rəngini; Yasil dinimizi; Sari bolluq və bərəkəti; Ag saflığı və durulugu; Bənovsəyi xoşgörünü təmsil edir. Karacakurt bir Türkmen obasınin adıdır. Karacakurt Türkmenleri Oğuz soy silsiləsində Bozok qolundan Yıldızhandan olma Beydilli boyuna bağlı bir Türkmen oymağıdir. Sıx olaraq Anadoluda, Kırşehir və Nevşehir bölgəsində yaşayırlar.
Azərbaycan Dövlət Mədəniyyət və İncəsənət Universitetinin (ADMİU) Kitabxana-informasiya mərkəzinə Azərbaycan Kinematoqrafçılar İttifaqı (AKİ) tərəfindən rus yazıçısı və dramaturqu Aleksandr Çervinskinin “Yaxşı ssenarini yaxşı qiymətə necə satmaq olar?” adlı kitabından 30 nüsxə hədiyyə edilmişdir. Sözügedən nəşr ssenari sənətinin nəzəri və praktiki əsaslarını əhatə etməklə, bu sahədə təhsil alan tələbələr, gənc ssenaristlər və yaradıcı mütəxəssislər üçün mühüm elmi-metodik mənbə kimi dəyərləndirilir. Müəllif kitabda ssenarinin mahiyyəti, onun struktur quruluşu, yazılış prinsipləri, dramaturji gərginliyin yaradılması və tamaşaçı diqqətinin cəlb olunması kimi fundamental məsələləri sistemli şəkildə təhlil edir. Aleksandr Çervinski, xüsusilə, vurğulayır ki, müasir dövrdə kino istehsalında texnoloji yeniliklər və yeni dramaturji yanaşmalar geniş tətbiq olunsa da, peşəkar ssenari yaradıcılığının əsas estetik və məzmun prinsipləri dəyişməz olaraq qalır. Müəllif dünya kinematoqrafiyasının klassik nümunələrinə istinad etməklə oxuculara yaradıcı təfəkkürün inkişaf etdirilməsi və emosional baxımdan dolğun, bədii cəhətdən təsirli ssenarilərin yazılması yollarını təcrübi nümunələr əsasında təqdim edir. “Parlaq imzalar” nəşriyyatında işıq üzü görən kitab rus dilindən kinotənqidçi Aygün Aslanlı tərəfindən tərcümə edilmişdir. Nəşrin elmi redaktorları Azərbaycan Kinematoqrafçılar İttifaqının idarə heyətinin üzvü, sənətşünas və pedaqoq Nadir Bədəlov, həmçinin Toğrul Musayevdir. Layihənin rəhbəri AKİ-nin icraçı katibi Əli İsa Cabbarovdur. Qeyd etmək lazımdır ki, Azərbaycan Kinematoqrafçılar İttifaqı gənc ssenaristlərin və kino ixtisasları üzrə təhsil alan tələbələrin peşəkar inkişafını dəstəkləmək məqsədilə hər il kino sənətinə dair müxtəlif elmi, nəzəri və metodik nəşrlərin hazırlanmasını və çapını ardıcıl şəkildə həyata keçirir. Bu qiymətli nəşrin ADMİU Kitabxana-informasiya mərkəzinə təqdim edilməsində göstərdiyi təşəbbüsə və ümumilikdə gənc yaradıcı nəslin elmi-intellektual inkişafına verdiyi davamlı dəstəyə görə Azərbaycan Kinematoqrafçılar İttifaqının rəhbərliyinə dərin təşəkkürümüzü bildiririk.
Bizim təmsil olunduğumuz səcərə kəndimizdə, (Bərdə.Yeni Daşkənd) el arasında RƏSULLU adı ilə tanınıb, çağrılır. Səcərəmizin hər zamanda xalq üçün, dövlət üçün, el üçün gərəkli, layiqli çox nümayəndələri olub. Bu təmsilçilik bir çox sahələri əhatə edir ki, buraya ötən əsrin əvvəllərində Qərbi Azərbaycanın Göyçə mahalında (Daşkənd kəndi) ermənilərə qarşı mübarizə aparmış, adları tarixə düşmüş igidlər, elin, xalqın yaddaşında yaşayan saz-söz adamları, müharibə iştirakçıları, qəhrəman şəhidlər, alimlər, dövlət adamları, general və qazilər, hörmətli ağsaqqallar, ziyalılar, müxtəlif peşə sahibləri və s. aiddir. Və səcərə üzvü olaraq biz hər zaman öz səcərəmizlə fəxr edib, səcərəmizin tanınması üçün təbliğatlar aparmışıq. Bu təbliğatın daha yüksək səviyyədə bariz nümunəsi isə səcərəmizin çox layiqli nümayəndəsi, təkcə elimizdə, kəndimizdə deyil, elmi və bədii araşdırmaları, publisistik məqalələri, folklorumuza töhfə verən bir çox kitabları ilə, eyni zamanda efir və radio çıxışları ilə tanınan, çox böyük auditoriya tərəfindən sevilən, Azərbaycan Jurnalistlər Birliyinin və Azərbaycan Aşıqlar Birliyinin üzvü Araz Yaquboğlunun bu günlərdə Elm və Təhsil nəşriyyatında çapdan çıxmış “Soyumuz, kökümüz, özümüz” adlı iri həcmli kitabıdır. Qeyd edim ki, müəllif təxminən 1750–ci ildən 2025–ci ilin sonlarına qədər yaşamış bütün səcərə üzvlərini doğum və ölüm tarixləri, ailə üzvləri ilə dəqiqliklə qeydə almışdır. Əlbətdə bu müəllifdən çox böyük diqqət və bacarıq tələb edir ki, Araz müəllim bü işin öhdəsindən layiqincə gəlmişdir. Ondan irəli gələrək, kitab çapdan çıxan elə ilk gündən nəinki səcərə üzvlərinin, hətda başqa səcərə təmsilçilərinin də böyük marağna səbəb olmişdur. Bu mənada 08 fevral 2026-cı il tarixdə başda müəllif özü olmaqla səcərinin onlarla üzvünün iştirakı ilə çay masası ətrafında kitabın təqdimatı qeyd olunmuşdur. Tədbirdə iştirak edən səcərə üzvləri kitabın müəllifi Araz Yaquboğluna və kitabın nəşri üçün maddi dəstək göstərmiş, müəllifin qardaşı Eldəniz Hacıyevə öz minnətdarlıqlarını çatdırmışlar. Təqdimat tədbirinin vidio-yazısı burada: >>>>>> Bax
Tarixdə “Teymur məğlub oldu” yazılmayıb Sıfırdan qurduğu “Böyük Teymurilər İmperatorluğu” ilə 3 qitəni titrədən, 27 sultanı diz çökdürən, 20 böyük yürüşün hamısında qalib gələn, heç birində məğlub olmayıb adını tarixə “Yenilməz Xaqan” kimi yazdıran Əmir Teymur yüzlərlə müharibə aparmışdır.
Sibirdə mənfi 40, Hindistanda 60 dərəcə istidə döyüşdü.İştirak etdiyi heç bir müharibədə məğlub olmadı, 4 milyon kvadrat kilometr ərazi ilə demək olar ki, bütün Asiyaya hökm etmiş, Avropanın bütün krallarından beyət məktubları almışdır. Osmanlının 3 dəfə mühasirəyə alaraq ələ keçirə bilmədiyi İzmiri, O, 7 gündə almışdır. Çingiz xanın çətin şərtlər üzündən geri döndüyü, İskəndərin 6 ildə ələ keçirə bilmədiyi Hindistanı 12 ayda fəth etmişdir. Halbuki tarix İskəndəri Böyük, Teymuru isə barbar adlandırmışdır.
Ancaq unutmayaq ki, tarixin heç bir səhifəsində “Teymur məğlub oldu” yazılmayıb.
1963-cü ildə Qaxdan hava reysi var idi – Şəkidən Qaxa 25 dəqiqəyə uçuş 1963-cü ildə indiki Şəki şəhərindən (o dövrdə Nuxa) Qax rayonuna müntəzəm hava reysi fəaliyyət göstərib. Arxiv sənədlərinə əsasən, Nuxa Ticarət Limanının 1963-cü il mayın 15-dən noyabrın 14-dək olan uçuş cədvəlində Qax istiqaməti rəsmi şəkildə yer alıb. Cədvələ görə: Marşrut: Nuxa – Qax Təyyarə tipi: AN-2 Uçuş vaxtı: saat 09:35 Çatma vaxtı: saat 10:00 Uçuş müddəti: təxminən 25 dəqiqə Biletin qiyməti: 3 manat İqtisadi müqayisələrə görə, 1963-cü ildə ödənilən 3 manat bu günün pulla təxminən 25–35 AZN-ə bərabərdir. Bu da onu göstərir ki, həmin dövrdə Qax kimi bölgələrə hava nəqliyyatı dövlət tərəfindən subsidiyalaşdırılan və əhali üçün əlçatan bir xidmət olub. Həmin illərdə sərnişinlər 5 kiloqrama qədər yükü pulsuz daşıya bilir, 12 yaşına qədər uşaqlar üçün isə 50 faiz güzəşt tətbiq olunurdu. Bu fakt Sovet dövründə Qax rayonunun hava nəqliyyatı şəbəkəsinə daxil olduğunu və qısa məsafələr üçün belə aviasiyadan aktiv istifadə edildiyini göstərir. Bu gün artıq fəaliyyət göstərməyən həmin marşrut bölgənin nəqliyyat tarixində maraqlı və az bilinən bir səhifə hesab olunur.
