Bir addım o yana, bir addım bu yana.
Böyüyən ruh kimi bədənə sığmasam,
Hissimdəm daşanı içimə yığmasam,
Heç nə olan deyil, özümdən çıxmasam,
Bir addım o yana, bir addım bu yana.
Həyatla ölümün arası bir qarış,
Ya bu dünyadan küs, ya həyatla barış,
Tarazlığı saxla, dayanmağa çalış,
Bir addım o yana, bir addım bu yana.
Bükülən qəlbimin içində bağlama,
Açma, sirrli qalsın, çalış ki, yoxlama,
Gedən hər bir anı özündə saxlama,
Bir addım o yana, bir addım bu yana.
Dualar nəfəsdi, həyata üz verər,
Qaranlıq içində Tanrımız göz verər,
Bir işıq seli var, yolunu düz verər,
Bir addım o yana, bir addım bu yana.
Bədənim bir dünya, gözlərim şəhərim,
Duyğular çılğın at, əlimdə yəhərim,
Ölsəm də, qalsam da açılır səhərim,
Bir addım o yana, bir addım bu yana.
Bu dünya tərəzi, adamlar da yükdü,
Yükün də yükü var, kiminki böyükdü?
Ləngər vura-vura dünya bizi çəkdi
Bir addım o yana, bir addım bu yana.
Müəllif: Xanım İSMAYILQIZI
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru